ଛତ୍ରପୁର,୨୨।୭(ଡି.ଏନ୍.ଏ.): ଗଞ୍ଜାମ ଜିଲାରେ କରୋନା ଆକ୍ରାନ୍ତଙ୍କ ସଂଖ୍ୟା ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ଏଥିସହ ଦୈନିକ ୨୦୦ ରୁ ୩୦୦ କରୋନା ପଜିଟିଭ ଚିହ୍ନଟ ହେଉଛନ୍ତି। ୩ ରୁ ୫ଜଣଙ୍କ ଦୈନିକ କରୋନାରେ ଜୀବନ ଯାଉଛି। ଆହୁରି ଜଣାଯାଇଛି ଯେ, ପଜିଟିଭଙ୍କ ସଂସ୍ପର୍ଶରେ ଆସି ଶତାଧିକ ସଂକ୍ରମିତ ହେଉଛନ୍ତି। ଜିଲାବାସୀ ଭୟଭୀତ ଅବସ୍ଥାରେ ରହିଥିବା ବେଳେ ରାଜ୍ୟ ସରକାରଙ୍କ ପକ୍ଷରୁ କେତେକ ପଦକ୍ଷେପ ମଧ୍ୟ ନିଆଯାଉଛି।
ଅପରପକ୍ଷେ ବୁଧବାର ଗଞ୍ଜାମ ଡିଆର୍ଡିଏ ପକ୍ଷରୁ ଏକ ଗ୍ରାଫ ପ୍ରସ୍ତୁତ କରାଯାଇଛି। ସେଥିରେ କରୋନା ସଂକ୍ରମଣ ସମ୍ପର୍କରେ ତଥ୍ୟ ଦିଆଯାଇଛି। ଏଥିରୁ ଜଣାଯାଇଛି ଯେ, ଗଞ୍ଜାମ ଜିଲାର ୮୬ ପ୍ରତିଶତ ଗ୍ରାମାଞ୍ଚଳ ଗ୍ରୀନ୍ ଜୋନ୍ରେ ଏବଂ ୧୪ ପ୍ରତିଶତ ଗ୍ରାମାଞ୍ଚଳ ରେଡ୍ ଜୋନରେ ରହିଛି। ଜିଲାର ୩୧୫୭ଟି ଗାଁରେ ସର୍ଭେ କରାଯାଇଥିଲା। ସେଥିରୁ ୨୭୦୫ଟି ଗାଁ ଗ୍ରୀନ ଜୋନ୍ରେ ଥିବାବେଳେ ୪୫୨ଟି ଗାଁ ରେଡ୍ ଜୋନରେ ରହିଛି।
ଗ୍ରୀନ ଜୋନ୍ରେ କେହି କରୋନା ଆକ୍ଟିଭ ପଜିଟିଭ ନ ଥିବା ସୂଚନା ଦିଆଯାଇଛି। ଛତ୍ରପୁର, ହିଞ୍ଜିଳି, କବିସୂର୍ଯ୍ୟନଗର, ପୁରୁଷୋତ୍ତମପୁର, ଆସିକା, କୁକୁଡାଖଣ୍ଡି, ବେଲଗୁଣ୍ଠା ବୁଗୁଡ଼ା ପ୍ରମୁଖ ବ୍ଲକରେ ଅଧିକ କରୋନା ପଜିଟିଭ୍ ଆକ୍ଟିଭ ଅଛନ୍ତି।
