ନୂଆଦିଲ୍ଲୀ,୧୫ା୩: ଅନ୍ତଃରାଷ୍ଟ୍ରୀୟ ଶେୟାର ବଜାର ଏବଂ ଅର୍ଥନୀତିରେ ଏକ ପ୍ରକାର ଆଶଙ୍କା ଦେଖାଦେଇଛି। ବିଶେଷକରି ଆମେରିକାରେ ସୃଷ୍ଟି ହୋଇଥିବା ବ୍ୟାଙ୍କିଙ୍ଗ ସଙ୍କଟ ବିଶ୍ୱ ଅର୍ଥନୀତିକୁ ବେଶ୍ ପ୍ରଭାବିତ କରିଛି। କେବଳ ୩ଟି କାର୍ଯ୍ୟଦିବସରେ ଗ୍ଲୋବାଲ ଫାଇନାନ୍ସିଆଲ୍ ଷ୍ଟକ୍ସର ବଜାର ମୂଲ୍ୟ ୪୬୫ ବିଲିୟନ ଡଲାର (ପ୍ରାୟ ୩୮୩୦୦୦୦ କୋଟି ଟଙ୍କା) ହ୍ରାସ ହୋଇଥିବା ଜଣାପଡ଼ିଛି। ଏପରିକି ସିଲିକନ୍ ଭ୍ୟାଲି ବ୍ୟାଙ୍କ ଧରାଶାୟୀ ହେବା ପରେ ସାରା ବିଶ୍ୱର ନିବେଶକ, ଲ୍ୟାଣ୍ଡର୍ସ ନିଜ ନିଜର ଭାଗୀଦାରି ହ୍ରାସ କରିବାରେ ଲାଗିଛନ୍ତି। ବିଶେଷକରି ମଙ୍ଗଳବାର ଗ୍ଲୋବାଲ ଫାଇନାନ୍ସିଆଲ ଷ୍ଟକ୍ସରେ ବଡ଼ ଧରଣର ହ୍ରାସ ଦେଖିବାକୁ ମିଳିଛି। ଅପରପକ୍ଷରେ ଏମ୍ଏସ୍୍ସିଆଇ ଏସିଆ ପ୍ୟାସିଫିକ୍ ଫାଇନାନ୍ସସିଆଲ ସୂଚକାଙ୍କରେ ୨.୭% ହ୍ରାସ ଘଟିଛି। ଗତ ବର୍ଷ ନଭେମ୍ବର ୨୯ ପରେ ଏହା ସର୍ବନିମ୍ନ ସ୍ତରରେ ପହଞ୍ଚତ୍ଛି। ସେହିଭଳି ଜାପାନର ମିତ୍ସୁବିଶି ୟୁଏଫ୍ଜେ ଫାଇନାନ୍ସିଆଲ ଗ୍ରୁପ୍ରେ ୮.୩ % ହ୍ରାସ ଘଟିଛି। ଏପରିକି ଦକ୍ଷିଣ କୋରିଆର ହାନା ଫାଇନାନ୍ସିଆଲ ଗ୍ରୁପ୍ରେ ୪.୭% ହ୍ରାସ ହୋଇଥିବା ବେଳେ ଅଷ୍ଟ୍ରେଲିଆର ଏଏନଜେଡ୍ ଗ୍ରୁପ୍ ହୋଲ୍ଡିଙ୍ଗ୍ ଲିମିଟେଡ୍ର ଶେୟାରରେ ୨.୮% ହ୍ରାସ ଘଟିଛି। ସେହିପରି ଏମ୍ଏସ୍ସିଆଇ ୱାର୍ଲଡ ଫାଇନାନ୍ସିଆଲ ସୂଚକାଙ୍କ ଏବଂ ଏମ୍ଏସ୍ସିଆଇ ଇଏମ୍ ଫାଇନାନ୍ସିଆଲ ସୂଚକାଙ୍କରେ ସୂଚୀବଦ୍ଧ କମ୍ପାନୀଗୁଡିକର ବଜାର ପୁଞ୍ଜି ଶୁକ୍ରବାରଠାରୁ ପ୍ରାୟ ୪୬୫ ବିଲିୟନ ଡଲାର (୩୮୩୦୦୦୦ କୋଟି ଟଙ୍କା) ହ୍ରାସ ଘଟିଛି। ଅପରପକ୍ଷରେ ୟୁରୋପିଆନ ବ୍ୟାଙ୍କ ଏବଂ ବୀମା କମ୍ପାନୀଗୁଡିକର ଶେୟାର ମୂଲ୍ୟରେ ମଧ୍ୟ ବଡ଼ ଧରଣ ହ୍ରାସ ରେକର୍ଡ କରାଯାଇଛି। ବିଶେଷକରି କ୍ରେଡିଟ୍ ସୁଇସ୍ ଗ୍ରୁପ୍ ଏଜିର ଶେୟାର ୧୫% କମି ରେକର୍ଡ ସ୍ତରକୁ ଖସି ଆସିଛି। ଏପରିକି ଏହାର ବଣ୍ଡ୍ସର ଇନ୍ସ୍ୟୁରାନ୍ସ ମୂଲ୍ୟ ସର୍ବୋଚ୍ଚ ସ୍ତରରେ ଥିବାବେଳେ ଜାପାନର ଫାଇନାନ୍ସିଆଲ ଷ୍ଟକ୍ସରେ ମଧ୍ୟ ହ୍ରାସ ଦେଖିବାକୁ ମିଳିଛି।