ନୂଆଦିଲ୍ଲୀ,୨୭।୭: ଚାଇନା ସେନା ଆକ୍ରମଣରେ ୨୦ ଭାରତୀୟ ଯବାନ ଶହୀଦ ହେବା ପରେ ଭାରତ ସରକାର ଜାତୀୟ ସୁରକ୍ଷାକୁ ଧ୍ୟାନରେ ରଖି ପ୍ରାରମ୍ଭିକ ପର୍ଯ୍ୟାୟରେ ୫୯ ଚାଇନା ମୋବାଇଲ ଆପ୍ଲିକେଶନ ଉପରେ କଟକଣା ଲଗାଇଥିଲେ। ସୋମବାର ପୁଣି ଥରେ ୪୭ ଚାଇନା ଆପ୍କୁ ବ୍ୟାନ୍ କରାଯାଇଛି। ପୂର୍ବରୁ ବ୍ୟାନ୍ ହୋଇଥିବା ଆପ୍ଲିକେଶନର କ୍ଲୋନ୍ ଭାବେ ଏହି ଆପ୍ଗୁଡିକ କାର୍ଯ୍ୟ କରୁଥିବା ସରକାରଙ୍କ ୨ ଜଣ ବରିଷ୍ଠ ଅଧିକାରୀ ସୂଚନା ଦେଇଛନ୍ତି। ସରକାର ପୂର୍ବରୁ ବାଇଟ୍ ଡାନ୍ସର ଟିକ୍ଟକ୍, ଆଲିବାବାର ୟୁସି ବ୍ରାଉଜର ଭଳି ଅନ୍ୟ ଆପ୍ ଗୁଡ଼ିକୁ ଭାରତରେ ବ୍ୟାନ୍ କରିଛନ୍ତି। ବର୍ତ୍ତମାନ କେଉଁ ଆପ୍ଗୁଡିକୁ ଭାରତରେ ନିଷିଦ୍ଧ କରାଯାଇଛି ସେ ସମ୍ପର୍କରେ ସବିେଶେଷ ତଥ୍ୟ ମିଳି ପାରି ନ ଥିଲେ ହେଁ ଏହି ଆପ୍ଗୁଡିକ ୫୯ ବ୍ୟାନ୍ ଆପ୍ର କ୍ଲୋନ୍ ବୋଲି କୁହାଯାଇଛି। ସରକାରଙ୍କ ସ୍ପଷ୍ଟୀକରଣ ଆସିବା ପରେ ଯାଇ କେଉଁ ଆପ୍ ହଟାଯାଇଛି ସେ ସମ୍ପର୍କରେ ଜଣାପଡିବ। ସେହିଭଳି କେନ୍ଦ୍ର ସରକାର ୨୭୫ ଚାଇନା ଆପ୍ର ଏକ ତାଲିକା ମଗାଇଛନ୍ତି। ଏହି ଆପ୍ଗୁଡିକ ଦେଶର ଜାତୀୟ ସୁରକ୍ଷା ଏବଂ ପ୍ରିଭେସିକୁ କ୍ଷତି ପହଞ୍ଚାଉଥିଲେ ସରକାରଙ୍କ ପକ୍ଷରୁ ସେହି ଆପ୍ଲିକେଶନଗୁଡିକ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କୁହାଯାଉଛି।
ଏକ ଜାତୀୟ ଗଣମାଧ୍ୟମ ରିପୋର୍ଟ ଅନୁସାରେ ଜାତୀୟ ସୁରକ୍ଷାକୁ ବିପଦରେ ପକାଇବା ଆଶଙ୍କା ରହିଥିବା ଟେନ୍ସେଣ୍ଟ କମ୍ପାନୀର ପବ୍ଜୀ, ଆଲିବାବାର ଆଲି ଏକ୍ସପ୍ରେସ୍, ଫୋନ୍ ମେକର ସାଓମି, ବାଇଟ ଡାନ୍ସ କମ୍ପାନୀର ମ୍ୟୁଜିକ ଷ୍ଟ୍ରିମି ଆପ୍ଲିକେଶନ ରେସୋ ଆଦି ଉପରେ ବ୍ୟାନ୍ ଲାଗିପାରେ। ଭାରତ ସରକାର ୫୯ ଚାଇନା ଆପ୍ ଉପରେ କଟକଣା ଲଗାଇବା ପରେ ଏହା ସହ ସମାନ ଏବଂ କ୍ଲୋନ୍ ହୋଇଥିବା ଆପ୍ଲିକେଶନ ଗୁଗଲ ପ୍ଲେ ଷ୍ଟୋର ର଼୍ୟାଙ୍କିଙ୍ଗ୍ର ଟପ୍ରେ ରହୁଥିଲା। ଲାଇକି ଲାଇଟ୍, ସ୍ନାକ୍ ଭିଡିଓ ଭଳି ଆପ୍ଗୁଡିକ ଟିକ୍ଟକ୍ ଉପରେ ବ୍ୟାନ୍ ଲାଗିବା ପରେ ଲୋକପ୍ରିୟ ହୋଇଛି। ସ୍ନାକ୍ ଭିଡିଓ ଚାଇନା କମ୍ପାନୀ ଦ୍ୱାରା ସ୍ଥାପନ ହୋଇଥିବା ବେଳେ ଏହା ନିକଟରେ ୧୦ ନିୟୁତ ଡାଉନ୍ଲୋଡ୍ ହାସଲ କରିଛି। ସେହିଭଳି ସାଓମି ପକ୍ଷରୁ ଆସିଥିବା ଜିଲି ଆପ୍ ଟିକ୍ଟକ୍ର ବିକଳ୍ପ ହୋଇଛି। ଏହି ଆପ୍ର ଡାଉନ୍ଲୋଡ୍ ୧୬୭% ବଢ଼ି ୮ ନିୟୁତ ଛୁଇଁଛି। ଜୁନ୍ ୨୯ରେ ଜାରି ଏକ ଅନ୍ତରୀଣ ଅର୍ଡରରେ ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତି ମନ୍ତ୍ରଣାଳୟ ପକ୍ଷରୁ କୁହାଯାଇଥିଲା ଯେ, ଦେଶର ସୁରକ୍ଷାକୁ ଏହି ଆପ୍ଗୁଡିକ ପ୍ରଭାବିତ କରୁଛି। ଏହାକୁ ବିଚାରକରି ସରକାର ଆପ୍ଗୁଡ଼ିକ ଉପରେ ବ୍ୟାନ୍ ଲଗାଇବାକୁ ନିଷ୍ପତ୍ତି ଗ୍ରହଣ କରିଥିଲେ।