ବ୍ରହ୍ମପୁର,୧୮।୯ : ବ୍ରହ୍ମପୁର ଟାଉନ ଥାନା ଅନ୍ତର୍ଗତ ବିଜିପୁର ସନ୍ତୋଷି ମା ମନ୍ଦିର ନିକଟରୁ ଅବକାରୀ ଗୋଇନ୍ଦା ଟିମ ବ୍ରାଉନନ୍ସୁଗାର ଜବତ କରିଛି। ଏକ ଅଟୋରେ ଦୁଇଜଣ ଲୋକ ବସିଥିବା ବେଳେ ତାଙ୍କୁ ଜେରା କରାଯାଇଥିଲା। ସେମାନଙ୍କ ନିକଟରୁ ୪୭ଗ୍ରାମ ବ୍ରାଉନସୁଗାର ଜବତ ହୋଇଛି।
ଅଭିଯୁକ୍ତମାନେ ହେଲେ ଟାଉନ ଥାନା ଅନ୍ତର୍ଗତ ବିଜିପୁରର କୈଳାଶ ଚନ୍ଦ୍ର ବେହେରା(୪୫) ଓ ଗୋପାଳପୁର ଥାନା ଅନ୍ତର୍ଗତ ଭାବିନାରାୟଣପୁରର ଜିତେନ୍ଦ୍ର କୁମାର ସାହୁ (୪୮)। ସେମାନଙ୍କୁ ମାମଲା ନମ୍ବର ୪୫୬/୨୩-୨୪ରେ ଗିରଫ କରାଯାଇ କୋର୍ଟ ଚାଲାଣ କରାଯାଇଛି। ବିଜିପୁର ବନ୍ଧ ନିକଟରେ ବ୍ରାଉନ ସୁଗାର କାରବାର ହେଉଥିବା ଖବର ପାଇ ଅବକାରୀ ଗୋଇନ୍ଦା ବିଭାଗ ସୋମବାର ଭୋରରୁ ସେଠାରେ ଚଢ଼ାଉ କରିଥିଲା। ସେଠାରେ ଏକ ଅଟୋ ନମ୍ବର (ଓ ୦୭ସି- ୩୨୪୧) ଭିତରେ ଦୁଇଜଣ ଲୋକ ସନ୍ଧେହଜନକ ଅବସ୍ଥାରେ ବସିଥିବା ଦେଖିବାକୁ ପାଇଥିଲେ। ସେମାନଙ୍କଠାରୁ ୪୭ଗ୍ରାମ ବ୍ରାଉନସୁଗାର ଏବଂ ବ୍ରାଉନସୁଗାର ବିକ୍ରି ଟଙ୍କା ୨୪୦୦ ଜବତ କରିଥିଲେ। ଅଭିଯୁକ୍ତଙ୍କୁ ଜେରା ବେଳେ ସେମାନେ ଉକ୍ତ ବ୍ରାଉନସୁଗାର ଖୋର୍ଦ୍ଧାରୁ ଆଣିଥିବା ସ୍ବୀକାର କରିଥିଲେ। ଗିରଫ ଅଭିଯୁକ୍ତ ଦ୍ୱୟ ପେଷାଦାର ବ୍ରାଉନସୁଗାର ମାଫିଆ ବୋଲି ଅବକାରୀ ଟିମ ପକ୍ଷରୁ ସୂଚନା ମିଳିଛି। କୈଳାଶ ଏହି କାରବାରର ମାଷ୍ଟେରମାଇଣ୍ଡ ବୋଲି ଅବକାରୀ ଟିମ୍ କହିଛି। ଜବତ ବ୍ରାଉନସୁଗାର ଓ ଅଟୋର ମୂଲ୍ୟ ୬ଲକ୍ଷ ୪୪ ହଜାର ଟଙ୍କା ହେବ ବୋଲି କୁହାଯାଇଛି।
ସୂଚନା ଥାଉ କି, ପୂର୍ବରୁ ଅବକାରୀ ଭ୍ରାମ୍ୟମାଣ ସଂସ୍ଥା ଓ ସଦର ଥାନା ପକ୍ଷରୁ ପୃଥକ ଭାବେ ୪ ସ୍ଥାନରେ ଚଢ଼ାଉ କରି ୧୦୭ ଗ୍ରାମ ବ୍ରାଉନସୁଗାର ଜବତ କରିଥିଲା। ଆଜିର ଏହି ଚଢ଼ାଉରେ ଅବକାରୀ ଗୁଇନ୍ଦା ଇନ୍ସପେକ୍ଟର ଗୀତାଞ୍ଜଳି ସାହୁ ଓ ତାଙ୍କ ଟିମ ସାମିଲ ଥିଲେ।