କୋଟା,୨୪।୩: ରାଜସ୍ଥାନର କୋଟା ସହରରେ ଏକ ହୃଦୟ ବିଦାରକ ମାମଲା ସାମ୍ନାକୁ ଆସିଛି। କୋଟା ଡିଭିଜନ ମୁଖ୍ୟାଳୟରେ ଅବସ୍ଥିତ ବହୁମୁଖୀ ପ୍ରାଣୀ ଚିକିତ୍ସାଳୟର ବରିଷ୍ଠ ପ୍ରାଣୀ ଚିକିତ୍ସକ ଅଖିଳେଶ ପାଣ୍ଡେଙ୍କ ଦ୍ୱାରା ଏକ ଗାଈର ପେଟ ଅପରେଶନ କରାଯାଇଛି। ଦୀର୍ଘ ୪ ଘଣ୍ଟା ଅପରେଶନ ପରେ ଗାଈ ପେଟରୁ ୪୮ କିଲୋ ପ୍ଲାଷ୍ଟିକ ବାହାରିଥିଲା। ଅଖିଳେଶ ପାଣ୍ଡେ କହିଛନ୍ତି ଯେ, ଗାଈର ପେଟରୁ ଅପରେଶନ ସମୟରେ ୪୮ କିଲୋଗ୍ରାମ ପ୍ଲାଷ୍ଟିକ ବ୍ୟାଗ ପଲିଥିନ ବାହାରିଛି। ଆହୁରି ମଧ୍ୟ ୮ଟି ଲୁହା ବସ୍ତୁ, ଦଉଡି, ବେଲୁନ, ରବର ବାହାରିଛି। ସାଧାରଣତଃ ଲୋକେ ଅସାବଧାନତାରେ କଠିନ ବର୍ଜ୍ୟବସ୍ତୁକୁ ପଲିଥିନରେ ବନ୍ଦ କରି ରାସ୍ତାରେ ପକାଇ ଥା’ନ୍ତି। ତାକୁ ଗାଈମାନେ ଖାଆନ୍ତି ଏବଂ ଏହା ସେମାନଙ୍କ ପେଟରେ ଗଚ୍ଛିତ ହୁଏ। ଅପରେଶନ ପରେ ଗାଈ ପେଟରେ ୧୪ଟି ସିଲେଇ ପଡିଛି। ଗାଈକୁ ଅପରେଶନ କରିଥିବା ଡାକ୍ତର ଲୋକଙ୍କୁ ନିବେଦନ କରିଛନ୍ତି ଯେ, ପ୍ଲାଷ୍ଟିକ ପଲିଥିନରେ ଅଳିଆ ଆବର୍ଜନା ପକାନ୍ତୁ ନାହିଁ, କାରଣ ଗୋରୁମାନେ ପଲିଥିନ ବ୍ୟାଗକୁ ସିଧାସଳଖ ଖାଆନ୍ତି ଏବଂ ଏଗୁଡିକ ପେଟରେ ବଣ୍ଡଲ ଆକାରରେ ଗଚ୍ଛିତ ହୁଏ। ଫଳରେ ଏହା ଗାଈଙ୍କ ମୃତ୍ୟୁର କାରଣ ହୁଏ।