କୋରାପୁଟ,୧୩ା୧୨(ଅମିତାଭ ବେହେରା): କୋରାପୁଟ ଜିଲାରେ ଗୁରୁବାରଠାରୁ ଆରମ୍ଭ ହେବ ଲକ୍ଷ୍ମୀ ବସ୍ ଯୋଜନା। କୋରାପୁଟସ୍ଥିତ ଲାଣ୍ଡିଗୁଡ଼ା ସରକାରୀ ମହାବିଦ୍ୟାଳୟଠାରେ ଆୟୋଜିତ ଏହି ବସ୍ ଶୁଭାରମ୍ଭ ଉତ୍ସବରେ ରାଜ୍ୟ ପରିବହନ ମନ୍ତ୍ରୀ ଟୁକୁନି ସାହୁ, ରାଜ୍ୟ ବିଭାଗୀୟ ପ୍ରମୁଖ ସଚିବ ଉଷା ପାଢ଼ୀ, ଦୀପ୍ତେଶ ପଟ୍ଟନାୟକ, ବିଭାଗୀୟ ସଚିବ ଅମିତାଭ ଠାକୁରଙ୍କ ସମେତ ଜିଲାର ସମସ୍ତ ବିଧାୟକ ଓ ବିଜେଡି ଜିଲା ସଭାପତି ଝିନ ହିକ୍କା, କୋରାପୁଟ ମ୍ୟୁନିସିପାଲିଟି ଅଧ୍ୟକ୍ଷ ଲଲାଟ ରଞ୍ଜନ ସେଠୀ, ପଦସ୍ଥ ଜିଲାସ୍ତରୀୟ ଅଧିକାରୀ ପ୍ରମୁଖ ଉପସ୍ଥିତ ରହିବେ। ପ୍ରଥମ ପର୍ଯ୍ୟାୟରେ କୋରାପୁଟ ଜିଲାର ଥିବା ୧୪ଟି ବ୍ଲକ ରୁଟ୍ରେ ସମୁଦାୟ ୪୮ଟି ଲକ୍ଷ୍ମୀ ବସ୍କୁ ଭି କନ୍ଫରେନ୍ସିଂ ଯୋଗେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି କାର୍ଯ୍ୟକ୍ରମକୁ ଶୁଭାରମ୍ଭ କରିବେ। ପରବର୍ତ୍ତୀ ସମୟରେ ଜିଲାରେ ଆଉ ୧୮ଟି ଲକ୍ଷ୍ମୀ ବସ୍ ଚାଲିବ ବୋଲି ବିଭାଗ ପକ୍ଷରୁ ଜଣାଯାଇଛି। ଏହାଦ୍ୱାରା ବିଶେଷ କରି ଛାତ୍ରୀଛାତ୍ର, ଚାଷୀ, ମହିଳା, ବୟସ୍କ ବ୍ୟକ୍ତିମାନେ ସୁଲଭ ଦରରେ ଯାତ୍ରା କରିପାରିବେ। ଏହାଦ୍ୱାରା ଗ୍ରାମାଞ୍ଚଳ ଲୋକେ ସୁବିଧାରେ ଜିଲା ସଦର ମହକୁମା ଓ ବ୍ଲକ ସଦର ମହକୁମାକୁ ଏହି ଲକ୍ଷ୍ମୀ ବସ୍ ଯୋଗେ ଯିବା ଆସିବା କରିପାରିବେ ବୋଲି କୋରାପୁଟ ଆଞ୍ଚଳିକ ପରିବହନ ଅଧିକାରୀ ମାନସ ମିଶ୍ର ସୂଚନା ଦେଇଛନ୍ତି। ବୁଧବାର ଏନେଇ କୋରାପୁଟରେ ସମସ୍ତ ପ୍ରସ୍ତୁତି କାର୍ଯ୍ୟ ଶେଷ ହୋଇଛି।