ନୁୟର୍କ,୨୭ା୧୨: ଆମେରିକାରେ ଭୟଙ୍କର ହିମଝଡ଼ରେ ୪୮ ଜଣଙ୍କ ଜୀବନ ଗଲାଣି। ହିମଝଡ଼ ଯୋଗୁ ଆମେରିକା ଏକ ଡିପ୍ ଫ୍ରିଜ୍ରେ ପରିଣତ ହୋଇଛି। ୪୮ଟି ରାଜ୍ୟରେ ତାପମାତ୍ରା ବିଯୁକ୍ତ ଡିଗ୍ରୀ ରହିଛି। ତୁଷାରରେ ଅନେକ ଘର ପୋତିହୋଇପଡ଼ିବା ସହ ପ୍ରାୟ ୧୭ ଲକ୍ଷ ଲୋକ ବିନା ବିଜୁଳିରେ ପ୍ରବଳ ଶୀତରେ ଫସିରହିଥିବାରୁ ମୃତ୍ୟୁସଂଖ୍ୟା ଆହୁରି ବଢ଼ିବା ଆଶଙ୍କା କରାଯାଉଛି। ତୁଷାର ଝଡ଼ ଯୋଗୁ ବିଭିନ୍ନ ରାସ୍ତାରେ ଗାଡ଼ିଗୁଡ଼ିକ ଅଟକି ରହିଛି। ଏଭଳି ଶୀତଦିନିଆ ଝଡ଼ ଅଭୂତପୂର୍ବ। କାନାଡ଼ାର ଗ୍ରେଟ୍ ଲେକ୍ସଠାରୁ ମେକ୍ସିକୋ ସୀମାରେ ଅବସ୍ଥିତ ରିଓ ଗ୍ରାଣ୍ଡେ ପର୍ଯ୍ୟନ୍ତ ଝଡ଼ ଲାଗିରହିଛି। ତୁଷାର ଝଡ଼ ଯୋଗୁ ରବିବାର ୧,୩୪୬ ବିମାନ ବାତିଲ ହୋଇଥିଲା। ଶୁକ୍ରବାର ୫,୯୩୪ ବିମାନ ବାତିଲ ହୋଇଥିଲା। ଭୀଷଣ ପାଗକୁ ନେଇ ଆମେରିକାର ନ୍ୟାଶନାଲ ଓ୍ବେଦର ସର୍ଭିସ ୨୪ କୋଟିରୁ ଊର୍ଦ୍ଧ୍ୱ ଲୋକଙ୍କୁ ସତର୍କ କରାଇଛି। ଶୀତରୁ ବର୍ତ୍ତିବା ଲାଗି ଲାଇବ୍ରେରି, ଥାନା ଆଦି ସର୍ବସାଧାରଣ ସ୍ଥାନରେ ଓ୍ବାର୍ମିଂ ସେଣ୍ଟର ଖୋଲାଯିବା ସହ ବାସହୀନଙ୍କ ପାଇଁ ଅସ୍ଥାୟୀ ଆଶ୍ରୟସ୍ଥଳର ବ୍ୟବସ୍ଥା କରାଯାଇଛି।
ବାତ୍ୟାରେ ବାୟୁମଣ୍ଡଳ ଚାପ ନିମ୍ନଗାମୀ ହେବା ସହ ତାପମାତ୍ରା ଅତ୍ୟଧିକ ହ୍ରାସ ପାଇଲେ ଏହାକୁ ବମ୍ବ ସାଇକ୍ଲୋନ୍ ବା ଶୀତଦିନିଆ ଝଡ଼ କୁହାଯାଇଥାଏ। ଗ୍ରେଟର ଲେକ୍ସ ଅଞ୍ଚଳରେ ବମ୍ବ ସାଇକ୍ଲୋନ୍ ସୃଷ୍ଟି ହେବା ଫଳରେ ବ୍ୟାପକ ଅଞ୍ଚଳରେ ପ୍ରବଳ ବେଗରେ ପବନ ବହିବା ସହ ତୁଷାରପାତ ଲାଗିରହିଛି। ଏହି ବାତ୍ୟାରେ ବୁଫାଲୋ ସର୍ବାଧିକ ପ୍ରଭାବିତ ହୋଇଛି। ସେଠାରେ ଘରଗୁଡ଼ିକ ବରଫ ଚାଦରରେ ଢାଙ୍କିହୋଇ ରହିବା ସହ ଜରୁରୀ ସେବା ସମ୍ପୂର୍ଣ୍ଣ ଅଚଳ ହୋଇପଡ଼ିଛି। ଶନିବାର ଫାୟାର ଟ୍ରକ୍ଗୁଡ଼ିକ ସହରରେ ଅଟକି ରହିଥିଲା। ମଙ୍ଗଳବାର ସକାଳ ପର୍ଯ୍ୟନ୍ତ ବିମାନବନ୍ଦର ବନ୍ଦ ରହିବ ବୋଲି ଅଧିକାରୀମାନେ ସୂଚନା ଦେଇଛନ୍ତି। ଜାତୀୟ ପାଣିପାଗ ସେବା ପକ୍ଷରୁ ଦିଆଯାଇଥିବା ସୂଚନା ଅନୁଯାୟୀ ବୁଫାଲୋ ନିଆଗରା ଅନ୍ତର୍ଜାତୀୟ ବିମାନ ବନ୍ଦରରେ ରବିବାର ସକାଳେ ୧୦୯ ସେଣ୍ଟିମିଟର ଉଚ୍ଚର ବରଫ ଜମି ରହିଛି। କାର୍ଗୁଡ଼ିକ ୬ ଫୁଟ ବରଫରେ ଢାଙ୍କିହୋଇ ରହିଛି। ବିଦ୍ୟୁତ୍ ଅଭାବରୁ ବ୍ୟାପକ ଅଞ୍ଚଳ ଅନ୍ଧକାରରେ ରହିଛି। ସୋମବାର ମଧ୍ୟ ତୁଷାରପାତ ସହ ୪୦ କିଲୋମିଟର ବେଗରେ କାଲୁଆ ପବନ ବହୁଛି। ବିଭିନ୍ନ ରାସ୍ତାରେ ଯାତାୟାତ ବନ୍ଦ ହୋଇଯାଇଥିବାରୁ ଜରୁରୀ ସେବା ପାଇ ନ ପାରି ଲୋକଙ୍କ ମୃତ୍ୟୁ ଘଟୁଥିବା କୁହାଯାଇଛି। କେତେଜଣ ଦୁଇଦିନ ହେଲା କାର୍ରେ ଅଟକି ରହିଛନ୍ତି। ୨୯ ଘଣ୍ଟା ହେଲା ବିଜୁଳି ନ ଥିବାରେ ଲୋକେ ସେମାନଙ୍କ ପାର୍କିଂ କାର୍ରେ ମୋବାଇଲ ଫୋନ୍ ଚାର୍ଜ କରୁଥିବା ଦେଖାଯାଇଛି।