କେନ୍ଦୁଝର, ୨୫ ।୧(ସ୍ବ.ପ୍ର.) କେନ୍ଦୁଝର ସହର ମଧ୍ୟ ଦେଇ ଯାଇଥିବା ବ୍ୟସ୍ତବହୁଳ କଲିକତା-ମୁମ୍ବାଇ ଏନ୍ଏଚ୍ ୪୯ରେ ଲାଇନ ଟ୍ରକ, ଲୁହାପଥର ବୋଝେଇ ଟ୍ରକ, ଟ୍ରେଲର ଆଦି ଭାରିଯାନ ଚଳାଚଳ ଯୋଗୁ ଦୀର୍ଘ ବର୍ଷ ହେଲା ଦେଖାଦେଉଥିବା ଟ୍ରାଫିକ ସମସ୍ୟା ସାଙ୍ଗକୁ ଦୁର୍ଘଟଣା ଯୋଗୁ ଜନ ଅସନ୍ତୋଷ ବୃଦ୍ଧି ପାଇବାରେ ଲାଗିଥିଲା। ଏ ନେଇ ଉକ୍ତ ରାସ୍ତା ପ୍ରଶସ୍ତିକରଣ କରାଯାଇ ସହର ବାହାରେ ନିର୍ମାଣ କରାଯାଇଥିଲେ ହେଁ ସମ୍ପୂର୍ଣ୍ଣ ହୋଇ ପାରିନଥିବାରୁ ବ୍ୟବହାର ହୋଇପାରୁ ନ ଥିଲା। ଗତ ଏକ ସପ୍ତାହ ମଧ୍ୟରେ ସହର ମଧ୍ୟରେ ଉକ୍ତ ରାସ୍ତାରେ ଦୁଇଟି ଦୁର୍ଘଟଣା ଘଟି ଧନଜୀବନ ହାନୀ ଘଟିବା ସହ ରାସ୍ତା ରୋକୋ ଭଳି ଆଇନଶୃଙ୍ଖଳା ପରିସ୍ଥିତି ଦେଖାଦେଇଥିଲା। ଏଣୁ ତୁରନ୍ତ ସହର ବାହାରେ ନିର୍ମାଣ କରାଯାଇଥିବା ବାଇପାସ୍ ରାସ୍ତାକୁ କାର୍ଯ୍ୟକ୍ଷମ କରିବାକୁ ଦାବି ହେବା ପରେ ସୋମବାର ଉକ୍ତ ରାସ୍ତାକୁ ଭାରିଯାନ ଚଳାଚଳ ପାଇଁ ଖୋଲି ଦିଆଯାଇଛି। ଏଣୁ ଲୋକଙ୍କ ହିତ ପାଇଁ ଏହି ରାସ୍ତା ଖୋଲିଦିଆଯିବା ଫଳରେ ସହରରେ ଟ୍ରାଫିକ ସମସ୍ୟା କମିବା ସହ ଦୁର୍ଘଟଣା ଓ ଧୂଳିଧୂଆଁ କମିବା ଆଶା କରି ସହରବାସୀ ଖୁସି ବ୍ୟକ୍ତ କରିଛନ୍ତି। ରାତିରେ ସୁରକ୍ଷିତ ଯାତାୟତ ପାଇଁ ରାସ୍ତା ପାର୍ଶ୍ୱରେ ଏଇଇଡି ଲାଇଟ ବ୍ୟବସ୍ଥା କରାଯାଇଛି।