ସୋନପୁର,୧।୫(ନି.ପ୍ର.): ସୁବର୍ଣ୍ଣପୁର ଜିଲା ସ୍ବାସ୍ଥ୍ୟ ବିଭାଗର ଏନ୍ଏଚଏମ୍(ଜାତୀୟ ସ୍ବାସ୍ଥ୍ୟ ମିଶନ) ଆକାଉଣ୍ଟରୁ ୫କୋଟି ୧ଲକ୍ଷ ୫୦ହଜାର ଟଙ୍କା ଗାଏବ ହୋଇଛି। ଜିଲା ମୁଖ୍ୟ ଚିକିତ୍ସା ଓ ଜନସ୍ବାସ୍ଥ୍ୟ ଅଧିକାରୀ (ସିଡିଏମ୍ପିଏଚଓ)ଙ୍କ ଅଜାଣତରେ ଏହି ଟଙ୍କା ରାଉରକେଲା ସେଣ୍ଟ୍ରାଲ ବ୍ୟାଙ୍କର ଏକ ଆକାଉଣ୍ଟକୁ ଟ୍ରାନ୍ସଫର ହୋଇଥିବା ଜଣାପଡିଛି। ସୋନପୁରସ୍ଥିତ ଏସ୍ବିଆଇର ମୁଖ୍ୟ ଶାଖାରୁ ମାସିକିଆ ଆକାଉଣ୍ଟ ଷ୍ଟେଟ୍ମେଣ୍ଟ ଅଣାଯିବା ପରେ ଏହି ଘଟଣା ସ୍ବାସ୍ଥ୍ୟ ବିଭାଗର ଦୃଷ୍ଟିକୁ ଆସିଛି। ସିଡିଏମ୍ପିଏଚଓ ଡା. ଦିଲୀପ କୁମାର ପଣ୍ଡା କଟକ କ୍ରାଇମ୍ବ୍ରାଞ୍ଚ ଓ ସୁବର୍ଣ୍ଣପୁର ଏସ୍ପିଙ୍କୁ ଶୁକ୍ରବାର ଘଟଣା ସମ୍ପର୍କରେ ଲିଖିତ ଭାବେ ଜଣାଇବା ସହିତ ସମସ୍ତ ତଥ୍ୟ ପ୍ରଦାନ କରିଛନ୍ତି। ଏ ନେଇ କ୍ରାଇମ୍ବ୍ରାଞ୍ଚରେ ଏକ ମାମଲା ରୁଜୁ ହୋଇଛି। ତେବେ ଏତେଗୁଡିଏ ଟଙ୍କା କିଭଳି କର୍ତ୍ତୃପକ୍ଷଙ୍କ ଅଜାଣତରେ ଅନ୍ୟ ଏକ ଆକାଉଣ୍ଟକୁ ଡିବିଟି ଜରିଆରେ ଟ୍ରାନ୍ସଫର ହେଲା ତାହା ଆଶ୍ଚର୍ଯ୍ୟାନ୍ବିତ କରିଛି। ଅନ୍ୟପକ୍ଷେ ରହସ୍ୟ ଉନ୍ମୋଚନ କରିବା ପାଇଁ କ୍ରାଇମ୍ବ୍ରାଞ୍ଚ ତନାଘନା ଜାରି ରଖିଛି।
ସୂଚନା ଅନୁଯାୟୀ, ୨୦୧୨ରେ ସୋନପୁର ଏସ୍ବିଆଇର ମୁଖ୍ୟ ଶାଖାରେ ସୁବର୍ଣ୍ଣପୁର ଜିଲା ସ୍ବାସ୍ଥ୍ୟ ସମିତିର ଜାତୀୟ ସ୍ବାସ୍ଥ୍ୟ ମିଶନ ଆକାଉଣ୍ଟ ଖୋଲାଯାଇଥିଲା। ନିୟମ ଅନୁଯାୟୀ ଜିଲାପାଳ ଓ ସିଡିଏମ୍ପିଏଚଓଙ୍କ ମିଳିତ ସ୍ବାକ୍ଷରରେ ଏହି ଆକାଉଣ୍ଟରୁ ୧୦ଲକ୍ଷରୁ ଊର୍ଦ୍ଧ୍ୱ ଟଙ୍କା ପ୍ରଦାନ କରାଯାଇଥାଏ। କିନ୍ତୁ ଗତ ଏପ୍ରିଲ ୭ ତାରିଖରେ ୫ କୋଟିରୁ ଊର୍ଦ୍ଧ୍ୱ ଟଙ୍କା ଜିଲାପାଳ ଓ ସିଡିଏମ୍ପିଏଚଓଙ୍କ ବିନା ଦସ୍ତଖତରେ ଟ୍ରାନ୍ସଫର ହୋଇଛି। ପିଏଫ୍ଏମ୍ଏସ (ପବ୍ଲିକ୍ ଫଣ୍ଡ୍ ମ୍ୟାନେଜମେଣ୍ଟ ସିଷ୍ଟମ) ଜରିଆରେ ଏନ୍ଏଚଏମ୍ର ଏସ୍ବିଆଇ ଆକାଉଣ୍ଟ ନଂ. ୩୨୩୩୩୧୪୬୩୨୧ରୁ ୫କୋଟି ୧ଲକ୍ଷ ୫୦ହଜାର ଟଙ୍କା ରାଉରକେଲାର ଏକ ଆକାଉଣ୍ଟକୁ ଟ୍ରାନ୍ସଫର ହୋଇଛି। ବ୍ୟାଙ୍କ କର୍ତ୍ତୃପକ୍ଷଙ୍କ କହିବା ଅନୁଯାୟୀ ଆଇଡି ପାସ୍ଓ୍ବାର୍ଡ ସୁବର୍ଣ୍ଣପୁର ସ୍ବାସ୍ଥ୍ୟ ବିଭାଗ ନିକଟରେ ଅଛି। ଟଙ୍କା ଟ୍ରାନ୍ସଫର ସମୟରେ ଓଟିପି ମେସେଜ୍ ଯାଇଥିବ। ତେଣୁ ଅଜାଣତରେ ଏତେଗୁଡିଏ ଟଙ୍କା ଟ୍ରାନ୍ସଫର ହେବା ଓ ୨୨ ଦିନ ପରେ କର୍ତ୍ତୃପକ୍ଷ ଜାଣିବା ରହସ୍ୟ ଘେରରେ ରହିଛି। ଏ ସମ୍ପର୍କରେ ସୁବର୍ଣ୍ଣପୁର ଏସ୍ପି ସୀତାରାମ ଶତପଥୀ କୁହନ୍ତି କ୍ରାଇମ୍ବ୍ରାଞ୍ଚ ମାମଲାର ତଦନ୍ତ କରୁଛି। ଆମେ ସହଯୋଗ କରୁଛୁ। ଖୁବ୍ଶୀଘ୍ର ରହସ୍ୟ ଉନ୍ମୋଚିତ ହେବ।