ଚନ୍ଦାହାଣ୍ଡି,୧୮ା୪: ଛତିଶଗଡ଼ ସୀମାନ୍ତ ନବରଙ୍ଗପୁର ଜିଲା ଚନ୍ଦାହାଣ୍ଡି ବ୍ଲକକୁ ୫ ଦିନ ପାଇଁ ଶଟ୍ଡାଉନ୍ ଘୋଷଣା କରାଯାଇଛି। ୧୦ ଦିନ ମଧ୍ୟରେ ବ୍ଲକରୁ ୧୮୦ରୁ ଊର୍ଦ୍ଧ୍ୱ କରୋନା ସଂକ୍ରମିତ ଚିହ୍ନଟ ହେବା ପରେ ବ୍ଲକ ପ୍ରଶାସନ ପକ୍ଷରୁ ଏଭଳି ପଦକ୍ଷେପ ନିଆଯାଇଛି। ସୂଚନା ଅନୁଯାୟୀ, ଛତିଶଗଡ଼ ସୀମାରେ ରହିଥିବା ଏହି ବ୍ଲକ୍ର ୨ ମୁଖ୍ୟ ରାସ୍ତାକୁ ପ୍ରଶାସନ ପକ୍ଷରୁ ସିଲ୍ କରାଯାଇଛି। ତେବେ ଦୁଇ ରାଜ୍ୟକୁ ଯାତାୟାତ ନିମନ୍ତେ ୫୦ରୁ ଊଦ୍ଧର୍ବ ଗଳାବାଟ ରହିଥିବା ବେଳେ ସେଗୁଡ଼ିକୁ ସିଲ୍ କରିବା ସହଜ ନୁହେଁ। ଚନ୍ଦାହାଣ୍ଡି ବ୍ଲକ ଏବଂ ସୀମାନ୍ତ ଛତିଶଗଡ଼ର ଜନସାଧାରଣଙ୍କ ମଧ୍ୟରେ ବ୍ୟବସାୟିକ ଏବଂ ସାମାଜିକ ସମ୍ପର୍କ ରହିଛି। ପ୍ରତ୍ୟେକ ଦିନ ଲୋକଙ୍କ ଯାତାୟାତ ଲାଗି ରହିଥାଏ। ତେଣୁ ଚନ୍ଦାହାଣ୍ଡି ସଦର ମହକୁମା ବ୍ୟବସାୟୀ ସଂଘ ପକ୍ଷରୁ ସମ୍ପୂର୍ଣ୍ଣ ବ୍ଲକକୁ ଶଟ୍ଡାଉନ କରିବା ନିମନ୍ତେ ଦାବି ହୋଇଥିଲା। ଏ ନେଇ ନବରଙ୍ଗପୁର ଏମ୍ପି ରମେଶ ଚନ୍ଦ୍ର ମାଝି ମଧ୍ୟ ଜିଲାପାଳଙ୍କ ସହ ଆଲୋଚନା କରିଥିଲେ। ରବିବାର ଜିଲାପାଳ ସରୋଜ କୁମାର ମିଶ୍ରଙ୍କ ନିର୍ଦ୍ଦେଶରେ ବ୍ଲକ ପ୍ରଶାସନ ପକ୍ଷରୁ ସମସ୍ତ ରାଜନୈତିକ ଦଳ ଓ ସାମାଜିକ ସଙ୍ଗଠନ ସହ ଆଲୋଚନା ପରେ ବ୍ଲକକୁ ୧୯ରୁ ୨୩ ପର୍ଯ୍ୟନ୍ତ ଶଟ୍ଡାଉନ୍ ଘୋଷଣା କରାଯାଇଛି।
