ଖୋର୍ଦ୍ଧା ଅଫିସ,୨୮ା୧୦: ଖୋର୍ଦ୍ଧା ଟାଉନ୍ ଥାନା କୁମ୍ବିଲୋ ଗ୍ରାମର ସନ୍ତୋଷ ବେହେରା(୨୨) ଗତ ୫ଦିନ ହେଲା ନିଖୋଜ ଅଛନ୍ତି। ଅଭିଯୋଗ ସତ୍ତ୍ବେ ଚୁପ୍ ବସିଛି ପୋଲିସ। ଏହାର ପ୍ରତିବାଦରେ ଜଟଣୀ ବିଧାୟକ ସୁରେଶ କୁମାର ରାଉତରାୟଙ୍କ ନେତୃତ୍ୱରେ ଶତାଧିକ ଗ୍ରାମବାସୀ ଗୁରୁବାର ଏସ୍ପି ଅଫିସ ଘେରାଉ କରିଛନ୍ତି। ଏସ୍ପି ରାଜକିଶୋର ଦୋରାଙ୍କ
ପ୍ରତିଶ୍ରୁତି ପରେ ଧାରଣା ପ୍ରତ୍ୟାହୃତ ହୋଇଛି।
ମିଳିଥିବା ସୂଚନାନୁଯାୟୀ, ଲକ୍ଷ୍ମୀଧର ବେହେରାଙ୍କ ପୁଅ ସନ୍ତୋଷ ଓରଫ ରାଜା ଗତ ୨୪ ତାରିଖ ଗାଈ ଚରାଇବାକୁ ଯାଇ ଫେରି ନ ଥିଲେ। ୨୫ ତାରିଖରେ ତାଙ୍କ ବାପା ଲକ୍ଷ୍ମୀଧର ଥାନାରେ ଲିଖିତ ଅଭିଯୋଗ କରିଥିଲେ। ଏନେଇ ଥାନାରେ ୪୨/୨୧ରେ ଏକ ନିଖୋଜ ମାମଲା ରୁଜୁ ହୋଇଛି। ଲକ୍ଷ୍ମୀଧରଙ୍କ ଅଭିଯୋଗ ଅନୁଯାୟୀ ଘଟଣା ଦିନ ପତିନବର ଗ୍ରାମର କେତେଜଣ ଯୁବକ କୌଣସି କାରଣକୁ ନେଇ ଘରକୁ ଆସି ରାଜାଙ୍କୁ ଖୋଜିବା ସହ ଧମକଚମକ ଦେଇଥିଲେ। ଅପରାହ୍ନରେ ଗୋରୁ ଗାଁକୁ ଫେରିଥିଲେ। ରାଜା ଫେରି ନ ଥିଲେ। ଘଟଣା ସମ୍ପର୍କରେ ଥାନାରେ ଅଭିଯୋଗ ସତ୍ତ୍ବେ ପୋଲିସ ଚୁପ୍ ବସିଛି ବୋଲି ପରିବାର ଲୋକେ ଗଣମାଧ୍ୟମ ଆଗରେ କହିଛନ୍ତି। ଘଟଣାର ତଦନ୍ତ ଜାରି ରହିଛି ବୋଲି ଏସ୍ପିଓ ସୁଶୀଲ ମିଶ୍ର ସୂଚନା ଦେଇଛନ୍ତି।
