ଭୁବନେଶ୍ୱର, ୧୩।୧୦(ବ୍ୟୁରୋ): କରୋନା ପାଇଁ ଚଳିତ ବର୍ଷ ଡିଇଏଲ୍ଇଡି (ଡିପ୍ଲୋମା ଇନ୍ ଏଲିମେଣ୍ଟାରି ଏଜୁକେଶନ) ପରୀକ୍ଷାର୍ଥୀମାନେ ବାସସ୍ଥାନରୁ ଦୂରରେ ରହି ପରୀକ୍ଷା ଦେବାକୁ ଅନିଚ୍ଛା ପ୍ରକାଶ କରିଛନ୍ତି। ସେମାନେ ପାଠ ପଢ଼ୁଥିବା ଡିଆଇଇଟି/ଇଟିଇଆଇ/ଡିଆର୍ସି ଆଦି ଶିକ୍ଷା ପ୍ରତିଷ୍ଠାନ ସେମାନଙ୍କ ଘରଠାରୁ ବହୁ ଦୂରରେ ହୋଇଥିବାରୁ ପରୀକ୍ଷା ସମୟରେ ରହିବା ସମସ୍ୟାକୁ ନେଇ ବେଶ୍ ଚିନ୍ତିତ ହୋଇପଡିଛନ୍ତି। କେତେଜଣ ପରୀକ୍ଷାର୍ଥୀ ଅନ୍ଲାଇନ୍ ପରୀକ୍ଷା ପାଇଁ ମଧ୍ୟ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କୁ ନିବେଦନ କରିଛନ୍ତି। ଏହି ପରିପ୍ରେକ୍ଷୀରେ ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ସୋମବାର ବୈଠକ ବସିଥିଲା। ଚଳିତ ବର୍ଷର ଡିଇଏଲ୍ଇଡିର ପରୀକ୍ଷା ସେଣ୍ଟରଗୁଡ଼ିକ ପ୍ରତି ଶିକ୍ଷା ପ୍ରତିଷ୍ଠାନର ୫ କି.ମି. ମଧ୍ୟରେ କରାଯିବ ବୋଲି ନିଷ୍ପତ୍ତି ନିଆଯାଇଛି। ପରୀକ୍ଷାର୍ଥୀମାନେ ପାଠ ପଢ଼ୁଥିବା ନିଜ ଡିଆଇଇଟି/ଇଟିଇଆଇ/ଡିଆର୍ସିରେ ଯଥାସମ୍ଭବ ରହିବାର ବ୍ୟବସ୍ଥା କରାଯିବ। ଯେଉଁ ପରୀକ୍ଷାର୍ଥୀମାନେ ଏହି ରହଣି ସୁବିଧା ଉପଲବ୍ଧ କରିବାକୁ ଚାହୁଁ ନ ଥିବେ, ସେମାନେ ବୋର୍ଡ ଦ୍ୱାରା ନିର୍ଦ୍ଧାରିତ ପରୀକ୍ଷା କେନ୍ଦ୍ରଗୁଡ଼ିକ ମଧ୍ୟରୁ କେଉଁଠି ସୁବିଧାରେ ପରୀକ୍ଷା ଦେଇପାରିବେ ସେ ବିଷୟରେ ନିଜ ଶିକ୍ଷାନୁଷ୍ଠାନ ମାଧ୍ୟମରେ ଜଣାଇଲେ ସେଥିପାଇଁ ଅନୁମତି ଦିଆଯିବା ସହ ଆବଶ୍ୟକ ବ୍ୟବସ୍ଥା ହେବ। ଆସନ୍ତା ୧୮ ତାରିଖ ସୁଦ୍ଧା ପରୀକ୍ଷାକେନ୍ଦ୍ର ଚୟନ ନେଇ ଛାତ୍ରୀଛାତ୍ରମାନେ ଅପ୍ସନ ରଖିପାରିବେ। ଏ ନେଇ ବୋର୍ଡ ତରଫରୁ ଯଥାଶୀଘ୍ର ବିଜ୍ଞପ୍ତି ଜାରି କରାଯିବ ବୋଲି ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶ କହିଛନ୍ତି।
ପରୀକ୍ଷା କେନ୍ଦ୍ରଗୁଡ଼ିକରେ ଥର୍ମାଲ ସ୍କ୍ରିନିଂ ସହିତ ସାନିଟାଇଜେଶନର ବ୍ୟବସ୍ଥା କରାଯାଇ କୋଭିଡ୍-୧୯ ମାର୍ଗଦର୍ଶିକା ଅନୁଯାୟୀ ପରୀକ୍ଷା ପରିଚାଳନା କରାଯିବ। ଆବଶ୍ୟକ ହେଲେ ପରୀକ୍ଷା ସୂଚୀରେ ସାମୟିକ ପରିବର୍ତ୍ତନ କରାଯାଇପାରେ।
ନଭେମ୍ବର ୪ରୁ ଏହି ପରୀକ୍ଷା ଆରମ୍ଭ ହେବ ଓ ପ୍ରାୟ ୧୩,୫୦୦ ଛାତ୍ରୀଛାତ୍ର ପରୀକ୍ଷା ଦେବେ। ପରୀକ୍ଷାକୁ ଅଫ୍ଲାଇନରେ କରିବା ପାଇଁ ରାଜ୍ୟ ସରକାର ନିଷ୍ପତ୍ତି ନେବା ପରେ ଅଖିଳ ଭାରତ ଛାତ୍ରସଂଘ ଓ ନିଖିଳ ଓଡ଼ିଶା ଡିଏଲ୍ଏଡ୍ ଛାତ୍ରସଂଘ ଏହାର ତୀବ୍ର ବିରୋଧ କରିଥିଲା। ବିକଳ୍ପ ବ୍ୟବସ୍ଥା କରିବା ପାଇଁ ଛାତ୍ରୀଛାତ୍ରଙ୍କ ପକ୍ଷରୁ ସୋମବାର ପ୍ରତିବାଦ କରାଯାଇଥିଲା।