ବ୍ରଜରାଜନଗର,୧୯।୨(ଡି.ଏନ.ଏ.): ବେଆଇନ ଭାବେ ମାଟି ଓ ମୋରମ ଉତ୍ତୋଳନ କରୁଥିବା ବଂଶଲ ଇନ୍ଫ୍ରା ପ୍ରୋଜେକ୍ଟସ ଲିମିଟେଡକୁ ଝାରସୁଗୁଡା ଉପଜିଲାପାଳ କିଶୋର ଚନ୍ଦ୍ର ସ୍ବାଇଁ ୫ଲକ୍ଷ ଟଙ୍କା ଜରିମାନା କରିଛନ୍ତି। ସୂଚନାନୁସାରେ ଝାରସୁଗୁଡ଼ା ତହସିଲ ଅନ୍ତର୍ଗତ ପଞ୍ଚପଡ଼ା ଓ ଲହଣ୍ଡାବୁଡ଼ ରାସ୍ତା ପାର୍ଶ୍ୱରୁ ବେଆଇନ ଭାବେ ମାଟି ଉତ୍ତୋଳନ କରି ଜିଲାର ବିଭିନ୍ନ ସ୍ଥାନକୁ ଚାଲାଣ କରାଯାଉଥିବା ଅଭିଯୋଗ ହୋଇଆସୁଥିଲା। ଉପଜିଲାପାଳ ସ୍ବାଇଁ ବିଶ୍ବସ୍ତ ସୂତ୍ରରୁ ସୂଚନା ପାଇବା ପରେ ଶୁକ୍ରବାର ଚଢ଼ାଉ କରିଥିଲେ। ଚଢ଼ାଉ ବେଳେ ମାଟି ଚାଲାଣ କରୁଥିବା ଦୁଇଗୋଟି ହାଇୱାକୁ ଧରିଥିଲେ। ଅନୁସନ୍ଧାନ ବେଳେ ପ୍ରସନ୍ନ ପଣ୍ଡା ଛକରେ ଓଭରବ୍ରିଜ ନିର୍ମାଣ ଓ ରାସ୍ତା ପ୍ରଶସ୍ତୀକରଣ କାମର ଟେଣ୍ଡର ନେଇଥିବା ବଂଶଲ ଇନ୍ଫ୍ରା ଏହି କାମ କରୁଥିବା ଜଣାପଡ଼ିଥିଲା। ତେବେ ଭୁଲ କାର୍ଯ୍ୟକୁ ପ୍ରୋତ୍ସାହନ ଦିଆଯାଉଥିବା ହେତୁ ଏ ନେଇ ଏକ ମାମଲା ରୁଜୁ କରି ୫ଲକ୍ଷ ଟଙ୍କା ଜରିମାନା ଆଦାୟ କରିବାକୁ ଝାରସୁଗୁଡ଼ା ତହସିଲଦାରଙ୍କୁ ନିର୍ଦ୍ଦେଶ ଦେଇଥିଲେ। ତା’ଛଡ଼ା ପଞ୍ଚପଡ଼ା ଓ ଲହଣ୍ଡାବୁଡ଼ ରାସ୍ତାରୁ ମୋଟ କେତେ ମାଟି ଓ ମୋରମ ଚୋରା ଚାଲାଣ ହୋଇଛି ତାହାର ଉଚିତ ଆକଳନ ତହସିଲଦାର ଓ ଖଣି ବିଭାଗ ୩ଦିନ ଭିତରେ କରିବା ପାଇଁ ଉପଜିଲାପାଳ ପରାମର୍ଶ ଦେଇଛନ୍ତି। ଏହାସହ ଏଚ୍. କଟାପାଲି ଓ ଏକାତାଲି ମଣ୍ଡଳର ରାଜସ୍ବ ନିରୀକ୍ଷକଙ୍କୁ ଜବାବ ତଲବ ସହ ମାଟି ମାଫିଆଙ୍କ ଉପରେ ତୀକ୍ଷ୍ଣ ନଜର ରଖିବା ପାଇଁ ତହସିଲଦାରଙ୍କୁ କହିଛନ୍ତି। ମାଟି ମାଫିଆଙ୍କୁ ଏଭଳି କାର୍ଯ୍ୟରୁ ନିବୃତ୍ତ ରହିବା ପାଇଁ ଉପଜିଲାପାଳ ଚେତାବନୀ ଦେବା ସହ ଆଗକୁ କ୍ରମାଗତ ଭାବେ ଏଭଳି ଧରପଗଡ଼ ଜାରି ରହିବ ବୋଲି ସ୍ପଷ୍ଟ କରିଛନ୍ତି।