ଭଦ୍ରକ ଅଫିସ,୯।୮: ରାଜ୍ୟ ଆଇନ ବିଭାଗର ବିଜ୍ଞପ୍ତି ତଥା ରାଜ୍ୟ ଜେଲ୍ ନିର୍ଦ୍ଦେଶକଙ୍କ ନିର୍ଦ୍ଦେଶ ଅନୁଯାୟୀ ଭଦ୍ରକ ଉପକାରାଗାରରୁ ବୁଧବାର ରାତିରେ ଆଜୀବନ କାରାଦଣ୍ଡ ଭୋଗୁଥିବା ୫ଜଣ କଏଦୀଙ୍କୁ ମୁକ୍ତ କରାଯାଇଛି। ମୁକ୍ତ ହୋଇଥିବା କଏଦମାନେ ହେଲେ ଚାନ୍ଦବାଲି ଥାନା ଅନ୍ତର୍ଗତ କଟିଆ ଓରଫ ବିଶ୍ବଜୟ ପଣ୍ଡା(୬୪), ପିଣ୍ଟୁ ଓରଫ ଚନ୍ଦ୍ର ଶେଖର ପଣ୍ଡା(୫୪), ପଞ୍ଚାନନ ବଳ(୭୨), ଭଦ୍ରକ ଗ୍ରାମାଞ୍ଚଳ ଥାନା ଅର୍ନ୍ତଗତ ବାଉଦପୁର ଗ୍ରାମର ସନାତନ ଜେନା(୪୬) ଓ ଭଣ୍ଡାରିପୋଖରୀ ଥାନା ସରସଦା ଗ୍ରାମର କରୁଣାକର ଅରଖ(୫୦)। ଏମାନେ ସମସ୍ତେ ହତ୍ୟା ମାମଲାରେ ଦୋଷୀ ସାବ୍ୟସ୍ତ ହୋଇ ଆଜୀବନ ଜେଲ ଦଣ୍ଡ ଭୋଗୁଥିଲେ। ଭଦ୍ରକ ଅତିରିକ୍ତ ଜିଲା ଜଜଙ୍କ ଆଦେଶକୁ ସେମାନେ ଚ୍ୟାଲେଞ୍ଜ କରି ପ୍ରଥମେ ହାଇକୋର୍ଟ ଓ ପରେ ସୁପ୍ରିମକୋର୍ଟରେ ଆବେଦନ କରିଥିଲେ ମଧ୍ୟ ତାହା ଖାରଜ ହୋଇଥିଲା। ଏହାପରେ ସେମାନେ ଜେଲ୍ ଦଣ୍ଡ ଭୋଗୁଥିଲେ। ସୂଚନାଯୋଗ୍ୟ, ଚଶାଖଣ୍ଡ ଗ୍ରାମର ଏକ ରାଜନୈତିକ ଗଣ୍ଡଗୋଳରେ ୧୯୮୮ରେ ସଦେଇ ଦାସ ନାମକ ବ୍ୟକ୍ତିଙ୍କୁ ହତ୍ୟା କରାଯାଇଥିବା ଅଭିଯୋଗରେ କଟିଆ, ପିଣ୍ଟୁ, ପଞ୍ଚାନନ ଦୋଷୀ ସାବ୍ୟସ୍ତ ହୋଇଥିଲେ। ସେହିପରି ୨୦୦୦ରେ ଭଦ୍ରକ ସହରାଞ୍ଚଳ ଅଧିନସ୍ତ ଜଗନ୍ନାଥପୁର ମାଧିଆ ଡାକୁଆଙ୍କୁ ସନାତନ ଓ ତାଙ୍କର ସହଯୋଗୀ କରୁଣାକର ଅରଖ ତାଙ୍କର ପତ୍ନୀକୁ ହତ୍ୟା କରିଥିବା ଅଭିଯୋଗ ହୋଇଥିଲା। ତେବେ ରାଜ୍ୟ ସରକାରଙ୍କର ଏକ ଉଚ୍ଚସ୍ତରୀୟ କମିଟି ଆଜୀବନ ଜେଲ୍ ଭୋଗୁଥିବା କଏଦୀମାନଙ୍କ ବ୍ୟବହାରିକ ପରିବର୍ତ୍ତନକୁ ଉପଲବ୍ଧି କରି ସେମାନଙ୍କ ଦଣ୍ଡ କୋହଳ କରିବାକୁ ନିଷ୍ପତ୍ତି ନେଇଥାନ୍ତି। ଯାହାଦ୍ୱାରା ସମାଜର ମୁଖ୍ୟ ସ୍ରୋତରେ ସେମାନଙ୍କୁ ପୁଣି ଥରେ ସାମିଲ କରାଯାଇପାରିବ। ତେବେ ମଙ୍ଗଳବାର ଜେଲ୍ ଆଇଜିଙ୍କ ନିର୍ଦ୍ଦେଶ ମୁତାବକ ବୁଧବାର ସେମାନଙ୍କୁ ମୁକ୍ତ କରିଥିବା ଜେଲ ଅଧିକ୍ଷକ କୁଅଁର ମାରାଣ୍ଡି ପ୍ରକାଶ କରିଛନ୍ତି।
