ମାଲକାନଗିରି,୨୩।୩(ଡି.ଏନ୍.ଏ.): ମାଲକାନଗିରି ଜିଲା ସୀମାନ୍ତ ଛତିଶଗଡ଼ ସୁକମାରେ ପୋଲିସ-ମାଓବାଦୀଙ୍କ ମଧ୍ୟରେ ଗୁଳି ବିନିମୟ ହୋଇଛି। ଗୁଳି ବିନିମୟ ବେଳେ ଛତ୍ରଭଙ୍ଗ ଦେଉଥିବା ମାଓବାଦୀମାନଙ୍କ ମଧ୍ୟରୁ ପୋଲିସ ୫ ଜଣଙ୍କୁ କାବୁ କରିଛି। ପୋଲିସ ଗୁଳିରେ ୫ରୁ ଊର୍ଦ୍ଧ୍ୱ ମାଓବାଦୀ ମଧ୍ୟ ଆହତ ହୋଇଥିବା ସୂଚନା ମିଳିଛି।
କୋଟାଲେନ୍ଦ୍ର ଜଙ୍ଗଲ ନିକଟରେ ଥାଇ ମାଓବାଦୀମାନେ କୌଣସି ଏକ ବଡ଼ଧରଣର ଅଘଟଣ ଘଟାଇବାକୁ ୩୦ ନମ୍ବର ଜାତୀୟ ରାଜପଥରେ ଆସିବା ପାଇଁ ପ୍ରସ୍ତୁତି ଚଳାଇଥିବା ପୋଲିସକୁ ସୂଚନା ମିଳିଥିଲା। ଏହାପରେ ସୁକମା ପୋଲିସ ଅଧୀକ୍ଷକଙ୍କ ନିର୍ଦ୍ଦେଶରେ ଏରାବୋର ଥାନା ଇନ୍ଚାର୍ଜ ଇନ୍ସପେକ୍ଟର ବୀରେନ୍ଦ୍ର ସିଂ ଏବଂ କୋଣ୍ଟା ଥାନା ଇନ୍ଚାର୍ଜ ଇନ୍ସପେକ୍ଟର ଶିବାନନ୍ଦ ସିଂଙ୍କ ନେତୃତ୍ୱରେ ଉଭୟ ଥାନା ପୋଲିସ ଏବଂ ଡିଆର୍ଜି ବାହିନୀ ପକ୍ଷରୁ କୋମ୍ବିଂ ଅପରେଶନ ହୋଇଥିଲା । ମାଓବାଦୀ ଓ ସୁରକ୍ଷା କର୍ମୀଙ୍କ ମଧ୍ୟରେ ଦୀର୍ଘ ସମୟ ଗୁଳିବିନିମୟ ହୋଇଥିଲା। ଯବାନଙ୍କ ସାମ୍ନା କରି ନ ପାରି ମାଓବାଦୀମାନେ ଜଙ୍ଗଲ ଆଡକୁ ପଳାଇ ଯାଇଥିଲେ। ଏହି ସମୟରେ ସୁରକ୍ଷା ବାହିନୀ ୫ଜଣଙ୍କୁ ଗିରଫ କରିବାରେ ସଫଳ ହୋଇଛନ୍ତି ।