କୋରାପୁଟ,୪ା୭(ସ୍ବ.ପ୍ର.): କୋରାପୁଟ ଜିଲାରେ ଶନିବାର ପୁଣି ୫ କରୋନା ପଜିଟିଭ୍ ଚିହ୍ନଟ ହୋଇଛନ୍ତି। ଏମାନଙ୍କ ମଧ୍ୟରୁ ୨ ଜଣ କ୍ୱାରାଣ୍ଟାଇନ୍ ସେଣ୍ଟରରୁ ଚିହ୍ନଟ ହୋଇଥିବା ବେଳେ ୩ ଜଣ ସ୍ଥାନୀୟ ସଂକ୍ରମିତ ଅଟନ୍ତି। ଜିଲାର ପଟ୍ଟାଙ୍ଗି ବ୍ଲକର କ୍ୱାରାଣ୍ଟାଇନ୍ ସେଣ୍ଟରରୁ ଜଣେ। ସେ (ଆନ୍ଧ୍ରପ୍ରଦେଶ ଫେରନ୍ତା )। ସେହିପରି ସୁନାବେଡ଼ା ପୌରାଞ୍ଚଳରେ ଥିବା କ୍ୱାରାଣ୍ଟାଇନ୍ ସେଣ୍ଟରରୁ ଜଣେ (ବିହାର ଫେରନ୍ତା) ଚିହ୍ନଟ ହୋଇଛନ୍ତି। ସେହିପରି ବୋରିଗୁମ୍ମା ବ୍ଲକରୁ ୨ ଜଣ (ସ୍ଥାନୀୟ ଅଞ୍ଚଳରୁ ) ଏବଂ ସେମିଳିଗୁଡ଼ା ବ୍ଲକରୁ ଜଣେ (ସ୍ଥାନୀୟ ବାସିନ୍ଦା) ଏପରିକି ମୋଟ ୫ ଆକ୍ରାନ୍ତ ଚିହ୍ନଟ ହୋଇଥିବା ଜିଲା ପ୍ରଶାସନ ପକ୍ଷରୁ ସୂଚନା ଦିଆଯାଇଛି। ନୂଆ ଆକ୍ରାନ୍ତଙ୍କୁ ମିଶାଇ ଜିଲାରେ ଏହି ସଂଖ୍ୟା ୫୭କୁ ବୃଦ୍ଧି ପାଇଛି।
ଜିଲାରେ ଆକ୍ରାନ୍ତଙ୍କ ସଂଖ୍ୟା ଦିନକୁ ଦିନ ବୃଦ୍ଧି ପାଉଥିବାରୁ ସପ୍ତାହରେ ଦୁଇଦିନ ଶନିବାର, ରବିବାର ଶଟ୍ଡାଉନ୍ ଆରମ୍ଭ ହୋଇଛି। ଏହି ସମୟରେ କେବଳ ଅତ୍ୟାବଶ୍ୟକୀୟ ସାମଗ୍ରୀ ଯଥା ପେଟ୍ରୋଲ, ମେଡିଶିନ ଦୋକାନ ଖୋଲା ରହିବ। ଶନିବାର ଏଥିଯୋଗୁ କୋରାପୁଟ ସହର ସମେତ ଜିଲାରେ ସମସ୍ତ ସ୍ଥାନ ଶୂନ୍ଶାନ ରହିଥିବା ଦେଖିବାକୁ ମିଳିଛି ା ସହରର ବିଭିନ୍ନ ଛକରେ ପୋଲିସ ମୁତୟନ କରାଯାଇ ଶଟ୍ଡାଉନ୍କୁ କଡ଼ାକଡ଼ି କରାଯାଇଛି। ଚଳିତ ମାସ ଶେଷ ଯାଏ ଏହି ସାପ୍ତାହିକ ଶଟ୍ଡାଉନ୍ ବଳବତ୍ତର ଚାଲିବ ବୋଲି ଜିଲା ପ୍ରଶାସନ ପକ୍ଷରୁ ଘୋଷଣା କରାଯାଇଛି। ସେହିପରି କରୋନା ସଂକ୍ରମଣକୁ ଦୃଷ୍ଟିରେ ରଖି ବୋଲ୍ବମ୍ ଯାତ୍ରା ବନ୍ଦ କରିବା ନେଇ ରାଜ୍ୟ ସରକାରଙ୍କ ବିଜ୍ଞପ୍ତି ଜିଲା ପ୍ରଶାସନ ନିକଟରେ ପହଞ୍ଚିଛି। ଏହା ପରେ ଜିଲା ପ୍ରଶାସନ ପକ୍ଷରୁ ବୋଲବୋମ ଯାତ୍ରାକୁ ସମ୍ପୂର୍ଣ୍ଣ ବନ୍ଦ କରାଯିବା ସହ କୌଣସି ମନ୍ଦିରକୁ ଯେମିତି କେହି ଭକ୍ତ ନ ଯାଇ ପାରିବେ ସେ ନେଇ ଦୃଷ୍ଟି ଦେବାକୁ ଜିଲାର ସମସ୍ତ ପୋଲିସ ପ୍ରଶାସନକୁ ଜିଲାପାଳ ମଧୁସୂଦନ ମିଶ୍ର ନିର୍ଦ୍ଦେଶ ଦେଇଛନ୍ତି।