ଦଓ୍ବୋସ,୩୦।୬: ଦେଢ଼ ମାସ ହେଲା ନିଖୋଜ ଥିବା ଗୋଟିଏ ପରିବାରର ୫ ଜଣଙ୍କ ମୃତଦେହ ମାଟି ତଳୁ ମଙ୍ଗଳବାର ସନ୍ଧ୍ୟାରେ ଉଦ୍ଧାର କରିଛି ପୋଲିସ। ମଧ୍ୟପ୍ରଦେଶର ଦଓ୍ବୋସ ଜିଲାରୁ ସାମ୍ନାକୁ ଆସିଛି ଏହି ଗଣହତ୍ୟା। ସମସ୍ତଙ୍କୁ ବେକ ଚିପି ହତ୍ୟା କରାଯିବା ପରେ ୮ରୁ ୧୦ ଫୁଟ୍ ଗଭୀର ଗାତ ଖୋଳି ପୋତି ଦିଆଯାଇଥିଲା।
୪୫ ବର୍ଷୀୟା ମମତା, ତାଙ୍କର ଦୁଇ ଝିଅ (୨୧ ବର୍ଷୀୟା ରୁପାଲି ଓ ୧୪ ବର୍ଷୀୟା ଦିବ୍ୟା)ଙ୍କ ସହ ସେମାନଙ୍କ ଦୁଇ ସମ୍ପର୍କୀୟ ଦଓ୍ବୋସ ସ୍ଥିତ ଭଡ଼ା ଘରୁ ଗତ ମେ’ ୧୩ ତାରିଖରେ ନିଖୋଜ ହୋଇଯାଇଥିଲେ। ପୀଡ଼ିତାଙ୍କ ମଧ୍ୟରୁ ଜଣଙ୍କ ସହ ଘର ମାଲିକଙ୍କ ପ୍ରେମ ସମ୍ପର୍କ ଥିଲା। ସେ ଓ ତାଙ୍କର ସହଯୋଗୀଙ୍କ ହାତ ଏହି ଗଣହତ୍ୟା ପଛରେ ରହିଛି। ମୁଖ୍ୟ ଅଭିଯୁକ୍ତ ସୁରେନ୍ଦ୍ର ରାଜପୁତଙ୍କ ସମେତ ୫ ଜଣଙ୍କୁ ଗିରଫ କରାଯାଇଥିବା ବେଳେ ଅନ୍ୟ ୭ ଜଣଙ୍କୁ ପୋଲିସ ଖୋଜୁଛି।
ମାଟି ତଳୁ ଉଦ୍ଧାର ହୋଇଥିବା ଗଳିତ ମୃତଦେହରେ କୌଣସି ପୋଷାକ ନ ଥିଲା। ମୃତଦେହ ଶୀଘ୍ର ପଚିବା ପାଇଁ ଲୁଣ ଓ ୟୁରଆର ବ୍ୟବହାର କରାଯାଇଥିବା ପୋଲିସ ପକ୍ଷରୁ କୁହାଯାଇଛି।
ମୃତକଙ୍କ ପରିବାର ପକ୍ଷରୁ ନିଖୋଜ ଅଭିଯୋଗ କରାଯିବା ପରେ ପୋଲିସ ତଦନ୍ତ ଆରମ୍ଭ କରିଥିଲା। କିନ୍ତୁ ତଦନ୍ତକୁ ବାଟମାରଣ କରିବା ପାଇଁ ମୃତ ମହିଳାଙ୍କ ବଡ଼ ଝିଅ ପ୍ରେମ ବିବାହ କରିଥିବା ଫେସବୁକରେ ପୋଷ୍ଟ ଶେୟାର କରିଥିଲେ ମୁଖ୍ୟ ଅଭିଯୁକ୍ତ। ପରିବାର ନିଖୋଜ ଥିବା ଅନ୍ୟ ସଦସ୍ୟ ତାଙ୍କ ପାଖରେ ଖୁସିରେ ଥିବା ଉଲ୍ଲେଖ ରହିଥିଲା ଉକ୍ତ ପୋଷ୍ଟରେ। ରୁପାଲିଙ୍କ ଫୋନକୁ ପ୍ରଥମେ ଟ୍ରାକ କରିବା ପରେ ତାଙ୍କ କଲ ଡିଟେଲ୍ସ ଚେକ୍ କରିଥିଲା ପୋଲିସ। ଏଥିରୁ ଘର ମାଲିକ ସୁରେନ୍ଦ୍ରଙ୍କ ସହ ନିୟମିତ ଯୋଗାଯୋଗରେ ଥିବା ଜାଣାପଡ଼ିଥିଲା। ପଚରାଉଚୁରାବେଳେ କିଛି ଜାଣି ନ ଥିବା କହିଥିଲା ସୁରେନ୍ଦ୍ର। ଏହାପରେ ତାଙ୍କ କଲ ଡିଟେଲ୍ସ ଯାଞ୍ଚ କରାଯିବାରୁ ମେ’ ୧୩ରେ ସେ ୫ ଜଣଙ୍କ ସହ ନିୟମିତ ଯୋଗାଯୋଗରେ ଥିବା ଜାଣିବାକୁ ପାଇଥିଲା ପୋଲିସ। ସଭିଙ୍କୁ ଅଲଗା ଅଲଗା ପଚରାଉଚୁରା ପରେ ସାମ୍ନାକୁ ଆସିଛି ଗଣହତ୍ୟାକାଣ୍ଡ।
ରୁପାଲିଙ୍କ ସହ ପ୍ରେମ ସମ୍ପର୍କ ସତ୍ତ୍ୱେ ସୁରେନ୍ଦ୍ର ଅନ୍ୟତ୍ର ବିବାହ କରିବାକୁ ଚାହୁଁଥିଲେ। ଏ ସମ୍ପର୍କରେ ଜାଣିବା ପରେ ରୁପାଲି, ସୁରେନ୍ଦ୍ରଙ୍କ ସହ ଅନ୍ୟ ମହିଳାଙ୍କ ଫଟୋ ଶେୟାର କରିଥିଲେ ସୋସିଆଲ ମିଡିଆରେ। ଏଥିରେ ଉତ୍ତ୍ୟକ୍ତ ହୋଇ ରୁପାଲିଙ୍କ ପରିବାରକୁ ହତ୍ୟା କରିବାକୁ ସୁରେନ୍ଦ୍ର ଚକ୍ରାନ୍ତ କରିଥିଲା ବୋଲି ଦଓ୍ବୋସ ପୋଲିସ ଅଧିକାରୀ ଶିବ ଦୟାଲ ସିଂ କହିଛନ୍ତି।