ନୂଆଦିଲ୍ଲୀ, ୫।୭: ବ୍ରିଟେନ୍ରେ ୧୪ ବର୍ଷ ଶାସନ କରିବା ପରେ ଋଷି ସୁନକ୍ଙ୍କର କଞ୍ଜରଭେଟିଭ୍ ପାର୍ଟି ନିର୍ବାଚନ ହାରିଛି । ସୁନକଙ୍କ ପାର୍ଟିକୁ ହରାଇ କିଏର ଷ୍ଟାର୍ମରଙ୍କ ନେତୃତ଼୍ବାଧୀନ ଲେବର ପାର୍ଟି ସାଧାରଣ ନିର୍ବାଚନ ଜିତିବା ସହ ସରକାର ଗଠନ କରିବାକୁ ଯାଉଛି। ଲେବର ପାର୍ଟି ୧୪ ବର୍ଷ ପରେ ପୁଣି କ୍ଷମତାକୁ ଫେରିବାକୁ ଯାଉଛି । କିଏର ପରବର୍ତ୍ତୀ ପ୍ରଧାନମନ୍ତ୍ରୀ ଭାବେ ଶପଥ ନେବାକୁ ଯାଉଛନ୍ତି । ଅନ୍ୟପଟେ ଭାରତୀୟ ବଂଶୋଦ୍ଭୋବ ନିଜ ଦଳର ପରାଜୟ ସ଼୍ବୀକାର କରିଛନ୍ତି ।
ତେବେ ସୁନକଙ୍କ ଦଳ ହାରିବା ପଛରେ ୫ଟି ବଡ଼ କାରଣ ରହିଥିବା ଚର୍ଚ୍ଚା ହେଉଛି –
୧-ଅର୍ଥବ୍ୟବସ୍ଥା- ଗତକିଛି ବର୍ଷ ଧରି ବ୍ରିଟେନ୍ ଗୋଟିଏ ପରେ ଗୋଟିଏ ସଙ୍କଟର ସାମ୍ନା କରୁଛି । ଯାହାକି ସୁନକ ସରକାର ହାରିବାର ବଡ଼ କାରଣ । ଏହାର ସ୍ପଷ୍ଟ ଉଦାହରଣ ହେଉଛି ଅର୍ଥବ୍ୟବସ୍ଥା । ୨୦୨୩ ରେ ବ୍ରିଟେନ୍ର ଅର୍ଥବ୍ୟବସ୍ଥାରେ ମାତ୍ର ୦.୧ ପ୍ରତିଶତ ବୃଦ୍ଧି ହୋଇଥିଲା । ଚଳିତ ବର୍ଷ ଆରମ୍ଭରୁ ପୁଣି ଏଥିରେ ମାନ୍ଦା ଦେଖିବାକୁ ମିଳିଥିଲା ।
୨-ମହଙ୍ଗା ମାଡ଼- ଅର୍ଥ ବ୍ୟବସ୍ଥା ସହିତ ମହଙ୍ଗା ମଧ୍ୟ ବଡ଼ କାରଣ ପାଲଟିଥିଲା । ଅକ୍ଟୋବର ୨୦୨୨ରେ ମହଙ୍ଗା ୪୦ ବର୍ଷର ରେକର୍ଡ ଭାଙ୍ଗିଥିଲା । ବର୍ତ୍ତମାନ ଏଥିରେ ସୁଧାର ଆସିଥିବା ବେଳେ ଦେଶବାସୀ କିନ୍ତୁ ଭରସା କରିନାହାନ୍ତି ।
୩-ସାର୍ବଜନିକ ସେବା- ସାର୍ବଜନିକ ସେବା ବ୍ରିଟେନ୍ରେ ଚରମ ସ୍ଥିତିରେ ପହଞ୍ଚିଛି । ନ୍ୟାଶନାଲ ହେଲ୍ଥ ସର୍ଭିସ୍ର ଫଣ୍ଡିଂ ସଙ୍କଟରେ ରହିଛି । ସାଧାରଣ ଲୋକଙ୍କୁ ସହଜରେ ସ଼୍ବାସ୍ଥ୍ୟ ସେବା ମିଳିପାରୁନାହିଁ ।
୪-ଶରଣାର୍ଥୀ- ତୁର୍କୀ, ଇରାନ୍ ଏବଂ ଆଫଗାନିସ୍ତାନରୁ ଆସୁଥିବା ଶରଣାର୍ଥୀ ବ୍ରିଟେନ୍କୁ ଚାଲିଆସୁଛନ୍ତି । ଫଳରେ ଦଶର ଚିନ୍ତା ବଢ଼ିଛି ।
୫-ରାଜନୈତିକ ଅସ୍ଥିରତା- କିଛି ବର୍ଷ ଧରି ଏହି ଦଳ ମଧ୍ୟରେ ବିଭାଜନ ଦେଖିବାକୁ ମିଳୁଛି । ଯାହାକି ସରକାର ହାରିବାର ଅନ୍ୟଏକ ପ୍ରମୁଖ କାରଣ ।
ଅନ୍ୟପଟେ ସୁନକ୍ ନିଜର ପରାଜୟ ପରେ ଦେଶବାସୀଙ୍କ ଉଦ୍ଦେଶ୍ୟରେ ବିଦାୟୀ ଭାଷଣ ରଖିଥିଲେ । ଡାଉନିଂ ଷ୍ଟ୍ରିଟ୍ରେ ବର୍ଷା ହେଉଥିବା ବେଳେ ସେ ଭାଷଣ ଦେଇ କହିଛନ୍ତି ଯେ, ମୁଁ ପ୍ରଥମେ ମୋର ଦେଶକୁ କ୍ଷମା ମାଗୁଛି । ମୁଁ ମୋ କାମରେ ସର୍ବଶ୍ରେଷ୍ଠ ପ୍ରଦର୍ଶନ କରିଛି । କିନ୍ତୁ ଆପଣମାନେ ସରକାର ବଦଳାଇବାକୁ ସ୍ପଷ୍ଟ ସଙ୍କେତ ଦେଇଛନ୍ତି । ଆପଣମାନଙ୍କର ନିର୍ଣ୍ଣୟ ସବୁଠାରୁ ଶ୍ରେଷ୍ଠ ନିର୍ଣ୍ଣୟ । ମୁଁ ଆପଣଙ୍କ ରାଗ, ଆପଣଙ୍କ ନିରାଶା ଭାବକୁ ଅନୁଭବ କରିପାରୁଛି ଏବଂ ଏହି କ୍ଷତି ପାଇଁ ନିଜକୁ ଦାୟୀ କରୁଛି । ମୁଁ ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେବା ପାଇଁ ଖୁବ୍ ଶୀଘ୍ର ମହାମହିମ ରାଜାଙ୍କ ନିକଟକୁ ଭେଟିବାକୁ ଯିବି ।