ଦାରିଙ୍ଗବାଡ଼ି,୨୪ା୬(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି଼କୁ ଗତ ସପ୍ତାହରେ ୫-ଟି ସଚିବ ଭି. କେ ପାଣ୍ଡିଆନ ଗସ୍ତ କରିଥିଲେ। ସେହି ସମୟରେ ସେ ୪ଟି ପ୍ରକଳ୍ପ ତଥା ମନ୍ଦିର, ମସ୍ଜିଦ, ଚର୍ଚ୍ଚ ଓ କମ୍ୟୁନିଟି ହଲ୍ ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମାତ୍ର ଏକ ସପ୍ତାହ ମଧ୍ୟରେ ଆପଣମାନଙ୍କୁ ଏକ ଖୁସି ଖବର ଦେବେ ବୋଲି ଘୋଷଣା କରିଥିଲେ। ସେହି ଅନୁସାରେ ଦାରିଙ୍ଗବାଡ଼ ପାଇଁ ଶହ ଶହ ପ୍ରକଳ୍ପ ଯାଇଥିବା ବେଳେ ପ୍ରଥମ ପର୍ଯ୍ୟାୟରେ ମାତ୍ର ୨୩ଟି ପ୍ରକଳ୍ପ ଅନୁମୋଦନ ହୋଇଛି। ସେଗୁଡିକ ମଧ୍ୟରେ କେବଳ ମନ୍ଦିର ଓ ଚର୍ଚ୍ଚର ଉନ୍ନତି ପାଇଁ ୨ କୋଟି ଟଙ୍କାର ଅନୁଦାନ ରହିଥିବା ସ୍ଥାନୀୟ ପ୍ରଶାସନ ସୂତ୍ରରୁ ସୂଚନା ମିଳିଛି। ଦାରିଙ୍ଗବାଡ଼ି ଏକ ବଡ଼ ବ୍ଲକ ଭାବେ ଜଣାଶୁଣା। ଏହି ବ୍ଲକରେ ୨୫ଟି ପଞ୍ଚାୟତ ରହିଥିବା ବେଳେ ମାଳମାଳ ସମସ୍ୟା ରହିଛି। ଏହି ସବୁ ସମସ୍ୟାର ସମାଧାନ ପାଇଁ ସ୍ଥାନୀୟ ପ୍ରଶାସନ, ବିଧାୟକ ସାଲୁଗା ପ୍ରଧାନ ପ୍ରମୁଖ ଅନେକ ପ୍ରକଳ୍ପ ପାଇଁ ସରକାରଙ୍କୁ ଜଣାଇଛନ୍ତି। ସେଗୁଡିକ ମଧ୍ୟ ଅନୁଦାନ ଆସିଯିବ ବୋଲି ବିଡିଓ ଗଦାଧର ପାତ୍ର କହିଛନ୍ତି। ତେବେ ଅଞ୍ଚଳବାସୀ ଅଞ୍ଚଳର ବିକାଶ ପାଇଁ ଅନେକ ଦାବି ଜଣାଇଛନ୍ତି। ସେଥିମଧ୍ୟରେ ପର୍ଯ୍ୟଟନର ବିକାଶ ସହ ୨୨୦ କେଭି ଗ୍ରୀଡ୍ ସିର୍ତ୍ତିଗଡ଼ାଠାରେ ନିର୍ମାଣ ଅଧାପନ୍ତରିଆ ହୋଇରହିଛି ତାକୁ ପୂର୍ଣ୍ଣାଙ୍ଗ କରିବା, ଦାରିଙ୍ଗବାଡ଼ିଠାରେ ଏକ ସରକାରୀ ଡିଗ୍ରୀ କଲେଜ କରାଇବା, ଶିକ୍ଷା, ସ୍ବାସ୍ଥ୍ୟ, ଗମନାଗମନର ସୁବିଧା ଆଦି ଦାବି ରହିଛି।