ସୋରଡ଼ା ଆସିବେ ଲୋକ ସେବା ଆୟୋଗର ଚୟନକୃତ ୫ ଶିକ୍ଷାନିବେଶ
6:23 pmNovember 12, 2022November 12, 2022 / 05

ସୋରଡ଼ା,୧୨ା୧୧(ଡି.ଏନ୍‌.ଏ.): ଭାରତୀୟ ଲୋକ ସେବା ଆୟୋଗର ଚୟନ କୃତ ୫ ଶିକ୍ଷାନିବେଶ ସୋମବାର ସୋରଡ଼ାରେ ପହଞ୍ଚିବେ। ଏଥିପାଇଁ ଗଞ୍ଜାମ ଜିଲା ସୋରଡ଼ା ବ୍ଲକ ପ୍ରଶାସନ ପକ୍ଷରୁ ଅଞ୍ଚଳର ସମସ୍ତ ବିଭାଗକୁ ସୂଚନା ପ୍ରଦାନ କରାଯାଇଛି। ଭାରତ ସରକାରଙ୍କ ଲାଲ୍‌ ବାହାଦୂର ଶାସ୍ତ୍ରୀ ପ୍ରଶାସନିକ ଶିକ୍ଷା ପ୍ରତିଷ୍ଠାନ ପରାମର୍ଶରେ ଓଡ଼ିଶା ସରକାରଙ୍କ ଗୋପବନ୍ଧୁ ପ୍ରଶାସନିକ ଶିକ୍ଷା ପ୍ରତିଷ୍ଠାନ ଭୁବନେଶ୍ବର ଦ୍ୱାରା ୨୯ ଜଣ ଶିକ୍ଷାନିବେଶଙ୍କୁ ମୂଳ ପାଠ୍ୟକ୍ରମ ତାଲିମ ପ୍ରଦାନ ପୂର୍ବକ ଗ୍ରାମାଞ୍ଚଳ ପ୍ରଶାସନିକ ଜ୍ଞାନ ହାସଲ ପାଇଁ ୬ଟି ଦଳରେ ୬ ଦିନିଆ ଭ୍ରମଣରେ ୫ ଜିଲାକୁ ପଠାଯିବା ବ୍ୟବସ୍ଥା କରାଯାଇଛି। ସେଠାରେ ସେମାନେ ଜିଲାର ଏସ୍‌ପି, ଜିଲାପାଳ,ରାଜସ୍ବ ଅଧିକାରୀ, ତହସିଲଦାର, ସରପଞ୍ଚ,ଗ୍ରାମାଞ୍ଚଳ ଜନସାଧାରଣଙ୍କ ସହ ବିଭିନ୍ନ ଯୋଜନା ସମ୍ବନ୍ଧରେ ଆଲୋଚନା କରିବେ। ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର,ପିଏମଆଇ,ଏମ୍‌ଜିଏନ୍‌ଆର୍‌ଇଜିଏ ଯୋଜନା,ସାମାଜିକ ନିରାପତ୍ତା ଯୋଜନାର ରୂପାୟନ ବୁଲି ଦେଖିବେ। ଏହି କ୍ରମରେ ଗୋଟିଏ ଦଳ ସୋରଡ଼ା ବ୍ଲକର ଗୋଛା,ଗଉଡ଼ଗୋଠ,ମେରିକୋଟ,ବଡ଼ବଦାଙ୍ଗି, ବଦଗଡ଼ ପଞ୍ଚାୟତର ବିଭିନ୍ନ ଗ୍ରାମକୁ ଯିବା ସ୍ଥିର ହୋଇଛି। ୫ ଜଣ ଶିକ୍ଷାନିବେଶଙ୍କ ମଧ୍ୟରେ ଭାରତୀୟ ଡାକ ଓ ଦୂରସଞ୍ଚାର ହିସାବ ଏବଂ ବିତ୍ତସେବାର ଦେଶମୁଖ ସୌରଭ। ଅନ୍ୟ ୪ ଜଣ ହେଲେ ଭାରତୀୟ ରେଳ ଯାତାୟାତ ସେବାର ପ୍ରସନ୍ନ ଆର ଲୋଧ, ମିଥୁନ ରାଜ ଯାଦବ,ଜଗଦୀଶ,ବିପିନ ନାୟକ। ସୋମବାର ସେମାନେ ଏଠାରେ ସକାଳୁ ପହଞ୍ଚିବା ପରେ ବ୍ଲକ ପ୍ରଶାସନ ପକ୍ଷରୁ ନିୟୋଜିତ ଏବି ସଞ୍ଜୀବ ରାଜ ସେନାପତି ସମସ୍ତଙ୍କୁ ସାଙ୍ଗରେ ନେବେ । ସୋମବାରଠାରୁ ଶନିବାର ୬ ଦିନ ଏଠାରେ ରହଣି କରିବେ। ଗଞ୍ଜାମ ଜିଲା ପରିଷଦ ଚିଠି ନମ୍ବର ୧୧୩୮୪/୧୦/୧୧/୨୦୨୨କୁ ଭିତ୍ତି କରି ସୋରଡ଼ା ପୋଲିସ,ଶିଶୁ ଶିକ୍ଷା,ସ୍ବାସ୍ଥ୍ୟ,ବନ,ରାଜସ୍ବ, କୃଷି, ବିଦ୍ୟୁତ ଜନସ୍ବାସ୍ଥ୍ୟ ବିଭାଗ ସମେତ ଅନ୍ୟ ସମସ୍ତ ବିଭାଗକୁ ଅବଗତ କରାଯାଇଛି।