ଲକ୍ଷ୍ନୌ,୨୪।୧ : ଲକ୍ଷ୍ନୌର ହଜରତଗଞ୍ଜରେ ୧୫ ବର୍ଷ ପୁରୁଣା ଏକ ୫ ମହଲା କୋଠା ଭୁଶୁଡି ପଡ଼ିଛି। ଏଥିରେ ୫ ଜଣ ଲୋକଙ୍କ ମୃତ ଦେହ ଉଦ୍ଧାର କରାଯାଇଛି। ତେବେ ମାଟି ତଳେ ୪୦-୫୦ ଲୋକ ଦବି ହୋଇ ରହିଥିବା ଆଶଙ୍କା କରାଯାଉଛି।
ଯୁଦ୍ଧକାଳୀନ ଭିତ୍ତିରେ ଉଦ୍ଧାର କାର୍ଯ୍ୟ ଜାରି ରହିଛି। ପୋଲିସ କମିଶନର ଏସ.ବି ଶିରୋଦକର ଘଟଣାସ୍ଥଳରେ ପହଞ୍ଚି ଉଦ୍ଧାରକାର୍ଯ୍ୟ ତଦାରଖ କରୁଛନ୍ତି। ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଜିଲା ପ୍ରଶାସନର ବରିଷ୍ଠ ଅଧିକାରୀ,ଏସଡିଆରଏପ ଏବଂ ଏନଡିଆରଏଫ ଟିମ୍କୁ ଘଟଣାସ୍ଥଳକୁ ଯିବା ନିର୍ଦ୍ଦେଶ ଜାରି କରିଛନ୍ତି।
କୋଠାରେ ୩୦-୩୫ ପରିବାର ବାସ କରୁଥିବା ପୋଲିସ ପକ୍ଷରୁ ସୂଚନା ପ୍ରଦାନ କରାଯାଇଛି। ସମାଜବାଦୀ ପାର୍ଟିର ପ୍ରବକ୍ତା ହାଇଦର ଅବ୍ବାସଙ୍କ ମା‘ , ସ୍ତ୍ରୀ ଏବଂ ପିଲାମାନେ ମାଟିତଳେ ଦବି ହୋଇ ରହିଥିବା କୁହାଯାଉଛି। କୋଠାରେ ମରାମତି କାର୍ଯ୍ୟ ଜାରି ରହିଥିବା ବେଳେ ଏଭଳି ଅଭାବନୀୟ ଘଟଣା ଘଟିଥିଲା। ସନ୍ଧ୍ୟା ପ୍ରାୟ ୬ଟା ୩୦ରେ କୋଠା ଭୁଶୁଡି ପଡ଼ିଥିଲା। ଖବର ପାଇଁ ଦେଢ଼ ଘଣ୍ଟାପରେ ଉଦ୍ଧାରକାର୍ଯ୍ୟ ଆରମ୍ଭ ହୋଇଥିଲା।
୭ ଲୋକଙ୍କୁ ଉଦ୍ଧାର କରାଯାଇ ଚିକିତ୍ସା ଲାଗି ହସ୍ପିଟାଲରେ ଭର୍ତ୍ତି କରାଯାଇଛି।