ଢେଙ୍କାନାଳ ଅଫିସ,୨୧।୪: ଢେଙ୍କାନାଳ ଜିଲା ଓଡ଼ାପଡ଼ା ବ୍ଲକ କାଣ୍ଡବିନ୍ଧା ପଞ୍ଚାୟତର ରଘୁନାଥଜୀଉ ବିଦ୍ୟାମନ୍ଦିରରେ ‘୫-ଟି’ ଅନୁଦାନରେ ଚାଲିଥିବା ଉନ୍ନୟନମୂଳକ କାର୍ଯ୍ୟରେ ଅର୍ଥ ବାରମାରଣା କରାଯାଉଥିବା ଅଭିଯୋଗ ହୋଇଛି। ଶୌଚାଳୟ, ଜଳଯୋଗାଣ ଗୃହ କାର୍ଯ୍ୟ ଠିକ୍ ଭାବେ ହେଉ ନ ଥିବା ନେଇ ଗ୍ରାମ ପରିଚାଳନା କମିଟି ସଭାପତି ଜାନକୀଦତ୍ତ ଦଳବେହେରା, ସଂଗ୍ରାମ ସାହୁ, ଧନେଶ୍ୱର ସାହୁ ପ୍ରମୁଖ ବୁଧବାର ଜିଲାପାଳଙ୍କୁ ଲିଖିତ ଭାବେ ଜଣାଇଛନ୍ତି।
‘୫-ଟି’ ଅନୁଦାନରେ ସ୍କୁଲ ଭିତ୍ତିଭୂମି ବିକାଶମୂଳକ କାର୍ଯ୍ୟ ଜାରି ରହିଛି। ହେଲେ କାମ ନେଇଥିବା ଠିକାଦାର ନିୟମ ଅନୁଯାୟୀ କାମ କରୁ ନ ଥିବା ଗ୍ରାମ ପରିଚାଳନା କମିଟି ପକ୍ଷରୁ ଅଭିଯୋଗ ହୋଇଛି। ସରକାରଙ୍କ ଅନୁମୋଦିତ ସିମେଣ୍ଟ ପରିବର୍ତ୍ତେ ବଜାରରେ ମିଳୁଥିବା ନିମ୍ନମାନର ସିମେଣ୍ଟ ବ୍ୟବହାର ହେଉଛି। କଂକ୍ରିଟ ଢଳେଇ ପୂର୍ବରୁ ମେଟାଲ, ବାଲି ପକାଯିବା ବଦଳରେ ମାଟି ପକାଯାଉଛି। ଫଳରେ ଉକ୍ତ ଉନ୍ନୟନକାର୍ଯ୍ୟର ସ୍ଥାୟିତ୍ୱକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏହାର ବିଧିବଦ୍ଧ ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଗ୍ରାମ କମିଟି ପକ୍ଷରୁ ଦାବି ହୋଇଛି। ଏ ସଂକ୍ରାନ୍ତରେ ଜିଲା ଶିକ୍ଷାଧିକାରୀ ନିବେଦିତା ପାଣି କୁହନ୍ତି, ସେ ଅନୁପସ୍ଥିତ ଥିଲେ। ଏ ନେଇ କୌଣସି ଅଭିଯୋଗ ପାଇନାହାନ୍ତି। ତଥାପି ଅନୁଧ୍ୟାନ କରି ଦେଖିବେ।