ବୋଲଗଡ଼,୧୩ା୮(ଦେବବ୍ରତ ହୋତା)ବିଦ୍ୟାଳୟର ଉନ୍ନତୀକରଣ ଓ ଶିକ୍ଷାର ବିକାଶ ପାଇଁ ସରକାର ବିଭିନ୍ନ ଯୋଜନା କରିବା ସହିତ କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି। ହେଲେ ଏହି ଯୋଜନାସବୁ କେଉଁଠି ପହଞ୍ଚୁଛି ତ କେଉଁଠି ପହଞ୍ଚି ପାରୁନାହିଁ। ଫଳରେ ଅନେକ ସ୍ଥାନରେ ଶିକ୍ଷକ ଏବଂ ଶ୍ରେଣୀଗୃହର ଅଭାବ ଯୋଗୁ ଶିକ୍ଷାଦାନ ବାଧାପ୍ରାପ୍ତ ହେଉଛି। ଏଭଳି ଦୃଶ୍ୟ ଖୋର୍ଦ୍ଧା ଜିଲା ବୋଲଗଡ଼ ଶିକ୍ଷା ବ୍ଲକ ଅଞ୍ଚଳରେ ଦେଖିବାକୁ ମିଳିଛି। ଏହି ବ୍ଲକ ଅଧୀନ ଆରିକମା ପଞ୍ଚାୟତ ଶଙ୍କରପୁର ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରେ ୮ ଶ୍ରେଣୀକୁ ୫ ଶିକ୍ଷକ ରହିଥିବା ବେଳେ ୬ଟି ଶ୍ରେଣୀଗୃହ ରହିଛି। ଏଥିରେ ଶିକ୍ଷାଦାନ ବାଧାପ୍ରାପ୍ତ ହେବାରୁ ଅଭିଭାବକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ତୁରନ୍ତ ବିଭାଗୀୟ ଅଧିକାରୀ ଦୃଷ୍ଟିଦେବା ସହିତ ଶିକ୍ଷକ ଅଭାବ ଦୂର କରିବା ଓ ନୂତନ ଶ୍ରେଣୀଗୃହ ନିର୍ମାଣ ନିମନ୍ତେ ଦାବି ହୋଇଛି।
୍ଯ ମସିହାରେ ସ୍ଥାପିତ ଏହି ବିଦ୍ୟାଳୟରେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ରହିଛି। ଏଠାରେ ୨୧୦ ବିଦ୍ୟାର୍ଥୀ ଅଧ୍ୟୟନ କରୁଥିବା ବେଳେ ୫ ଜଣ ଶିକ୍ଷକ ଶିକ୍ଷାଦାନ କରୁଛନ୍ତି। ପ୍ରତି ଶ୍ରେଣୀ ପାଇଁ ଗୋଟିଏ ଲେଖାଏ ଓ ପ୍ରଧାନ ଶିକ୍ଷକ କାର୍ଯ୍ୟାଳୟକୁ ମିଶାଇ ୯ଟି କକ୍ଷର ଆବଶ୍ୟକ ଥିବା ସ୍ଥଳେ ୬ଟି ଶ୍ରେଣୀଗୃହ ରହିଛି। ପ୍ରଥମରୁ ତୃତୀୟ ଶ୍ରେଣୀ ପର୍ଯ୍ୟନ୍ତ ଗୋଟିଏ କକ୍ଷ, ୪ର୍ଥ ଓ ୫ମ ଶ୍ରେଣୀ ବିଦ୍ୟାର୍ଥୀ ଗୋଟିଏ କକ୍ଷରେ ପାଠ ପଢୁଛନ୍ତି। ଚେୟାର ଟେବୁଲ ଅଭାବରୁ ପିଲାମାନେ ତଳେ ବସି ପଢୁଛନ୍ତି। ଏପରିକି ଏହି ବିଦ୍ୟାଳୟଟି ଗ୍ରାମ୍ୟ ଉନ୍ନୟନ ବିଭାଗ ରାସ୍ତାର ଦୁଇପାର୍ଶ୍ୱରେ ଥିବାରୁ ବିଦ୍ୟାର୍ଥୀ ଓ ଶିକ୍ଷକମାନଙ୍କ ପାଇଁ ଚଳପ୍ରଚଳ ନେଇ ବିପଦ ସାଜିଛି। ନୃତନ ଶ୍ରେଣୀଗୃହ ଓ ଆବଶ୍ୟକ ଶିକ୍ଷକ ପଦବୀ ପୂରଣ ପାଇଁ ବିଦ୍ୟାଳୟ ପରିଚାଳନା କମିଟି ପକ୍ଷରୁ ବାରମ୍ବାର ବିଭାଗୀୟ କର୍ତ୍ତୃପକ୍ଷ ଓ ସ୍ଥାନୀୟ ଜନପ୍ରତିନିଧିଙ୍କୁ ଅଭିଯୋଗ କରାଯାଇଥିଲେ ମଧ୍ୟ ସୁଫଳ ମିଳୁନାହିଁ ବୋଲି କହିଛନ୍ତି ସଭାପତି ସତ୍ୟ ନାରାୟଣ ମହାପାତ୍ର। ଏପରିସ୍ଥଳେ ସ୍ବଚ୍ଛ ଶିକ୍ଷାଦାନ ପାଇଁ ଆବଶ୍ୟକ ୩ ଶିକ୍ଷକ ଓ ୩ଟି ଶ୍ରେଣୀଗୃହ ପାଇଁ ଅନୁଦାନ ଯୋଗାଇଦେବାକୁ ଅଭିଭାବକମାନେ ଦାବି କରିଛନ୍ତି। ଅନ୍ୟପକ୍ଷରେ ଏ ସମ୍ପର୍କରେ ମଣ୍ଡଳ ସାଧନ କେନ୍ଦ୍ର ସଂଯୋଜକ ପଦ୍ମଚରଣ ବେହେରା କହିଛନ୍ତି, ଖୁବ୍ଶୀଘ୍ର ଗୋଟିଏ ପଦବୀ ପୂରଣ କରାଯିବ। ଶିକ୍ଷକଙ୍କ ଅବସର ପରେ ପଦବୀ ପୂରଣ ହେଉ ନ ଥିବାରୁ ଶିକ୍ଷକଙ୍କ ଅଭାବ ଦେଖାଦେଇଛି। ନୂତନ ଶ୍ରେଣୀଗୃହ ପାଇଁ ପଞ୍ଚାୟତ ଦାୟିତ୍ୱ ନେଇଛି ବୋଲି ବେହେରା କହିଛନ୍ତି।