ନୂଆଦିଲ୍ଲୀ,୨୬।୬: ଲୋକ ସଭା ନିର୍ବାଚନ ସମୟରେ ରାହୁଲ ଗାନ୍ଧୀଙ୍କ ନେତୃତ୍ୱରେ ଇଣ୍ଡିଆ ମେଣ୍ଟ ସମ୍ବିଧାନର କୋଟ ପକେଟ ସଂସ୍କରଣକୁ ପ୍ରତୀକ ଭାବରେ ବ୍ୟବହାର କରିଥିଲା। ସେବେଠାରୁ ଦେଶରେ ସମ୍ବିଧାନ ଏବଂ ଏହାର ପୁସ୍ତକ ପୁଣିଥରେ ଚର୍ଚ୍ଚାକୁ ଆସିଛି। ବିଶେଷ କରି ଏହି ସଂସ୍କରଣ ଲୋକପ୍ରିୟ ହୋଇପାରିଛି। ଇଣ୍ଡିଆ ମେଣ୍ଟର ସଦସ୍ୟମାନେ ନିର୍ବାଚନ ସମୟରେ ଏହି କପି ଧରି ସବୁଠି ପ୍ରଚାର କରୁଥିଲେ। ଏହାପରେ ବିରୋଧୀ ଦଳର ସବୁ ଏମପି ଲୋକ ସଭାରେ ଶପଥ ଗ୍ରହଣ କରିବା ସମୟରେ ଏହି ସମ୍ବିଧାନର ପୁସ୍ତକକୁ ଧରି ଏକ ରେକର୍ଡ ସୃଷ୍ଟି କରିଛନ୍ତି।
ସମ୍ବିଧାନର କୋଟ ପକେଟ ସଂସ୍କରଣର ପ୍ରକାଶକ ଦାବି କରିଛନ୍ତି ଯେ ମାତ୍ର ତିନି ମାସ ମଧ୍ୟରେ ଏହାର ହଜାର ହଜାର କପି ବିକ୍ରି ହୋଇସାରିଛି। ଆସନ୍ତୁ ଜାଣିବା ଏହି ପୁସ୍ତକର ଦାମ୍ କେତେ ଓ ଗତ ତିନି ମାସ ମଧ୍ୟରେ ଏହି କପି କିଣିବା ପାଇଁ କେତେ ଟଙ୍କା ଖର୍ଚ୍ଚ କରିଛନ୍ତି।
୧୮ତମ ଲୋକ ସଭାର ଉଦଘାଟନୀ ଅଧିବେଶନରେ ବିରୋଧୀଦଳ ନେତାମାନେ ସଂସଦରେ କଳା ଏବଂ ନାଲି କଭର୍ ଥିବା ଏକ ବହି ଧରି ଶପଥ ନେଇଥିଲେ। ଯାହାକୁ ଦେଶର ସବୁଠାରୁ ବଡ଼ ଗ୍ରନ୍ଥ ସମ୍ବିଧାନ କୁହାଯାଏ। ଏମପିମାନେ ଧରିଥିବା ଏହି ପୁସ୍ତକ ସମ୍ବିଧାନର ଏକ କୋଟ ପକେଟ ସଂସ୍କରଣ। ଯାହା ବର୍ତ୍ତମାନ ବହୁତ ଲୋକପ୍ରିୟ ହୋଇଛି। ଏହି ସଂସ୍କରଣ କେବଳ ରାହୁଲ ଗାନ୍ଧୀ ନୁହେଁ ଦେଶର ବହୁ ବଡ ବଡ଼ ନେତାଙ୍କ ହାତରେ ଦେଖିବାକୁ ମିଳିଥିଲା। ଏହି କାରଣରୁ ଏହି ପୁସ୍ତକ ଏବେ ଦେଶର ଯୁବପିଢିଙ୍କ ମଧ୍ୟରେ ଲୋକପ୍ରିୟ ହୋଇଛି।
ଟାଇମ୍ସ ଅଫ ଇଣ୍ଡିଆର ଏକ ରିପୋର୍ଟ ଅନୁଯାୟୀ, ଏହି ପୁସ୍ତକ ବର୍ତ୍ତମାନ ଏକ ଆଇକନ ପାଲଟିଛି ଏବଂ ଏହାର ଲୋକପ୍ରିୟତା ଏତେ ବୃଦ୍ଧି ପାଇଛି ଯେ ଗତ ତିନି ମାସ ମଧ୍ୟରେ ୫ହଜାର କପି ବିକ୍ରି ହୋଇଛି। ଏହି କୋଟ ପକେଟ ସଂସ୍କରଣର ପ୍ରକାଶକଙ୍କ ନାମ ହେଉଛି ଇଷ୍ଟର୍ନ ବୁକ କମ୍ପାନୀ। ଯାହାର ବିକ୍ରୟ କ୍ରମାଗତ ବଢିବାରେ ଲାଗିଛି। ସମ୍ବିଧାନର କୋଟ ପକେଟ ସଂସ୍କରଣ ପ୍ରଥମେ ୨୦୦୯ରେ EBC ଦ୍ୱାରା ମୁଦ୍ରିତ ହୋଇଥିଲା। ସେବେଠାରୁ ୧୬ଟି ସଂସ୍କରଣ ବାହାରିଛି। ଟାଇମ୍ସ ଅଫ ଇଣ୍ଡିଆର ରିପୋର୍ଟ ଅନୁଯାୟୀ, ଇବିସି ପ୍ରକାଶକ ସୁମିତ ମଲିକ ଦାବି କରିଛନ୍ତି ଯେ ସେ ଗତ ତିନି ମାସ ମଧ୍ୟରେ ୫ହଜାର କପି ବିକ୍ରି ହୋଇଛି। ଯାହା ୨୦୨୩ରେ ବିକ୍ରି ହୋଇଥିବା ମୋଟ ସଂଖ୍ୟା ସହିତ ସମାନ।
ମଲିକ ଗଣମାଧ୍ୟମକୁ କହିଛନ୍ତି ଯେ, ଭାରତୀୟ ସମ୍ବିଧାନର ଆମର କୋଟ ପକେଟ ସଂସ୍କରଣର ଚାହିଦା ବଢିଛି। ନଗଦ ଷ୍ଟକ ଯେମିତିି ଆସୁଛି, ଏହାକୁ ତୁରନ୍ତ ବିକ୍ରି ହେଇଯାଉଛି। ଇଣ୍ଡିଆନ ଏକ୍ସପ୍ରେସ ରିପୋର୍ଟ ଅନୁଯାୟୀ, ୧୮ ତମ ଲୋକ ସଭାର ପ୍ରଥମ ଅଧିବେଶନ ପାଇଁ କଂଗ୍ରେସ ୪ଟି ବାକ୍ସର କପି କିଣିଛି। ମଲିକ ଆହୁରି କହିଛନ୍ତି ଯେ, ସେ କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କୁ ମଧ୍ୟ ଏହି ପୁସ୍ତକର ଏକ କପି ଦେଇଛନ୍ତି। ପୂର୍ବତନ ଆଟର୍ଣ୍ଣି ଜେନେରାଲ କେ.କେ ଭେନୁଗୋପାଲାନଙ୍କ ଦ୍ୱାରା ଲିଖିତ ପୁସ୍ତକର ପ୍ରାରମ୍ଭରେ ଦର୍ଶାଯାଇଛି ଯେ ଏହି ପୁସ୍ତକ ଆକାରରେ ଛୋଟ ହୋଇପାରେ କିନ୍ତୁ ମଣିଷ ଆକାର ପରି ବହୁତ ବଡ ।
ଇବିସି ଦ୍ୱାରା ପ୍ରକାଶିତ ଏହି କପିର ମୂଲ୍ୟ ୮୯୫ଟଙ୍କା। ଏହି ସଂସ୍କରଣରେ ୬୨୪ ପୃଷ୍ଠା ଅଛି। ଯଦି ଆପଣ ଏହି କପି ଅନଲାଇନରେ ଅର୍ଡର କରିବାକୁ ଚାହାଁନ୍ତି, ତେବେ ଆପଣ EBC ର ୱେବ ଷ୍ଟୋର ଭିଜିଟ କରି ଏହାକୁ ଅର୍ଡର କରିପାରିବେ। ଯେଉଁଠାରେ ଏହି ସଂସ୍କରଣର ମୂଲ୍ୟ ଅଫଲାଇନ ଠାରୁ ୧୦ ପ୍ରତିଶତ କମ ଅର୍ଥାତ ୮୦୬ ଟଙ୍କା ଅଟେ ବୋଲି ମଲିକ କହିଛନ୍ତି।
ଇବିସି ପକ୍ଷରୁ ଦାବି କରାଯାଇଛି ଯେ, ଗତ ୩ ମାସ ମଧ୍ୟରେ ୫ହଜାର କପି ବିକ୍ରି ହୋଇଛି। ଯଦି ଆକଳନ କରାଯାଏ ତେବେ ଲୋକମାନେ ଅଫଲାଇନରେ ଏହିବହି କିଣିବା ଦ୍ୱାରା ୪୪.୭୫ ଲକ୍ଷ ଟଙ୍କା ଆୟ ହୋଇଛି। ତେବେ ସମ୍ବିଧାନର ପକେଟ କପିର ଏପରି ବିକ୍ରିକୁ ଏକ ବଡ଼ କଥା ବୋଲି କୁହାଯାଉଛି।