ବାରିପଦା ଅଫିସ,୩୧।୫: ଚାକିରି ପ୍ରଲୋଭନ ଦେଖାଇ ୩ଜଣ ଝିଅଙ୍କୁ ବିକ୍ରି କରିବା ଘଟଣାରେ ମୟୂରଭଞ୍ଜ ଜିଲା ଅତିରିକ୍ତ ସହକାରୀ ଦୌରା ଜର୍ଜ କୋର୍ଟର ବୁଧବାର ରାୟ ପ୍ରକାଶ କରିଛନ୍ତି। ଜଜ ବାସୁଦେବ ଆଚାର୍ଯ୍ୟ ଏହାର ବିଚାର କରି ଅଭିଯୁକ୍ତଙ୍କୁ ଦୋଷୀ ସାବ୍ୟସ୍ତ କରି ୫ବର୍ଷର ଜେଲ୍ଦଣ୍ଡାଦେଶ ସହିତ ୬ହଜାର ଟଙ୍କା ଜରିିମାନା କରିଛନ୍ତି । ଜରିମାନା ଅନାଦେୟ ହେଲେ ଅଧିକ ୬ମାସର କାରାଦଣ୍ଡ ଭୋଗ କରିବାକୁ ରାୟରେ ଉଲ୍ଲେଖ କରିଛନ୍ତି। ଅଭିଯୁକ୍ତ ଜଣକ ହେଲେ, ବାରିପଦା ସଦର ଥାନା ଅନ୍ତର୍ଗତ ଜୟବିଲା ଗ୍ରାମର ବୁଦ୍ଧିନି ସିଂ।
ସୂଚନାଯୋଗ୍ୟ, ବଡ଼ସାହି ଥାନା ଅନ୍ତର୍ଗତ ଖାନୂଆ ଗ୍ରାମର ଜଣେ ନାବାଳିକା ସମେତ ୩ଜଣ ଝିଅଙ୍କୁ ମାସକୁ ୧୨ହଜାର ଟଙ୍କା ଦରମାର ଚାକିରି କରାଇ ଦେବାର ପ୍ରଲୋଭନ ଦେଖାଇ ବୁଦ୍ଧିନି ସିଂ ଓ ଶଙ୍କର ପାତ୍ର ରାଉରକେଲା ନେଇ ଯାଇଥିଲେ। ତେବେ ପାଞ୍ଚ ଦିନ ଧରି ଯୁବତୀଙ୍କ ମୋବାଇଲ ବନ୍ଦ ରହିବା ପରେ ପରିବାର ଲୋକେ ପୋଲିସର ଦ୍ୱାରସ୍ଥ ହୋଇଥିଲେ। ଅଭିଯୁକ୍ତଦ୍ୱୟ ଯୁବତୀଙ୍କୁ ନେଇ ରାଜସ୍ଥାନର କୋଟା ଅଞ୍ଚଳରେ ୨ଲକ୍ଷ ଟଙ୍କା ବିନିମୟରେ ବିକ୍ରି କରି ଦେଇଥିଲେ। ରାଜସ୍ଥାନ ପୋଲିସ ସହାୟତାରେ ଜଣଙ୍କୁୁ ଉଦ୍ଧାର କରି ବଡ଼ସାହି ପୋଲିସ ଆଣିବା ପରେ ଘଟଣାର ପର୍ଦାଫାସ ହୋଇଥିଲା। ଏନେଇ ପୋଲିସ ବଡ଼ସାହି ଥାନାରେ କେସ ନମ୍ବର ୪୪/୨୨ରେ ଏକ ମାମଲା ରୁଜୁ କରି ଅଭିଯୁକ୍ତ ବୁଦ୍ଧିନି ସିଂକୁ ଗିରଫ କରି କୋର୍ଟ ଚାଲାଣ କରିଥିଲେ। ମାମଲାର ବିଚାର ସମୟରେ ୧୧ଜଣ ସାକ୍ଷୀଙ୍କ ବୟାନ, ତଦନ୍ତ ରିପୋର୍ଟକୁ ଭିତ୍ତି କରି ଜଜ ଉପରୋକ୍ତ ରାୟ ପ୍ରକାଶ କରିଛନ୍ତି। ତେବେ ଅନ୍ୟ ଜଣେ ଅଭିଯୁକ୍ତ ଶଙ୍କର ପାତ୍ର ରାଜସ୍ଥାନରେ ବିଚାରଧୀନ କଏଦୀ ଭାବେ ସଜା କାଟୁଛନ୍ତି। ଉକ୍ତ ମାମଲାକୁ ସରକାରୀ ଆଇନଜୀବୀ ବଜେନ୍ଦ୍ର ମହାନ୍ତି ପରିଚାଳନା କରିଥିଲେ।
