ନୂଆଦିଲ୍ଲୀ,୪।୯(ଅନୁରାଧା ମହାରଣା): ଟେଲି ମାର୍କେଟିଂ କମ୍ପାନୀଗୁଡ଼ିକ ମୋବାଇଲ ଫୋନ୍ ବ୍ୟବହାରକାରୀଙ୍କ ପାଇଁ ଜୀବନକୁ କଷ୍ଟସାଧ୍ୟ କରିଦେଇଛନ୍ତି। ଏଭଳି କମ୍ପାନୀ ବିରୋଧରେ ଅନ୍ଲାଇନ ଠକେଇର ଅଭିଯୋଗ ମଧ୍ୟ ଆସିଛି। ଟେଲିକମ୍ ସେକ୍ଟର ନିୟାମକ(ଟିଆର୍ଏଆଇ) ଟେଲି ମାର୍କେଟିଂ କମ୍ପାନୀଗୁଡିକ ବିରୋଧରେ ବିଭିନ୍ନ ପ୍ରକାର ପ୍ରାୟ ୮ ଲକ୍ଷ ଅଭିଯୋଗ ଗ୍ରହଣ କରିଥିବାବେଳେ ଏ ଦିଗରେ ଉପଯୁକ୍ତ ପଦକ୍ଷେପ ନେବାକୁ ଟିଆର୍ଏଆଇ ଟେଲିକମ୍ କମ୍ପାନୀଗୁଡ଼ିକୁ ନିର୍ଦ୍ଦେଶ ଦିଆଯାଇଥିଲା। ବର୍ତ୍ତମାନ ଟେଲିକମ୍ କମ୍ପାନୀଗୁଡିକ ପ୍ରାୟ ୫୦ଟି ଟେଲି ମାର୍କେଟିଂ କମ୍ପାନୀକୁ କଳା ତାଲିକାଭୁକ୍ତ କରିଛନ୍ତି।
ଟିଆର୍ଏଆଇ ସୂଚନା ଦେଇଛି ଯେ ନିକଟ ଅତୀତରେ ସ୍ପାମ୍ କଲ୍ ଏବଂ ମେସେଜରେ ବହୁ ବୃଦ୍ଧି ଘଟିଛି। ୨୦୨୪ ବର୍ଷର ପ୍ରଥମାର୍ଦ୍ଧରେ (ଜାନୁଆରୀରୁ ଜୁନ୍), ପଞ୍ଜୀକୃତ ହୋଇ ନ ଥିବା ଟେଲି ମାର୍କେଟର (ୟୁଟିଏମ୍) ବିରୋଧରେ ୭.୯ ଲକ୍ଷରୁ ଅଧିକ ଅଭିଯୋଗ ଦାଖଲ କରାଯାଇଥିଲା। ଏହି ସମସ୍ୟାକୁ ଗମ୍ଭୀରତାର ସହ ଗ୍ରହଣକରି ଟିଆର୍ଏଆଇ ୨୦୨୪ ଅଗଷ୍ଟ ୧୩ରେ ସମସ୍ତ ପ୍ରବେଶ ପ୍ରଦାନକାରୀଙ୍କୁ କଠୋର ନିର୍ଦ୍ଦେଶନାମା ଜାରି କରିଥିଲା। ଏସ୍ଆଇପି, ପିଆର୍ଆଇ କିମ୍ବା ଅନ୍ୟାନ୍ୟ ଟେଲିକମ୍ ଉତ୍ସ ବ୍ୟବହାରକରି ପଞ୍ଜୀକୃତ ହୋଇ ନ ଥିବା ଟେଲି ମାର୍କେଟର ଏବଂ ମେସେଜ ପ୍ରେରକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଉଚିତ। ଏହିପରି ଟେଲି ମାର୍କେଟରର ପ୍ରୋତ୍ସାହନମୂଳକ ଭଏସ୍ କଲ୍ ତୁରନ୍ତ ବନ୍ଦ କରିବାକୁ ନିର୍ଦ୍ଦେଶ ଦିଆଯିବା ସହ କୌଣସି ପଞ୍ଜୀକୃତ ହୋଇ ନ ଥିବା ଟେଲି ମାର୍କେଟର ସିଷ୍ଟମର ଅପବ୍ୟବହାର କରୁଥିବା ଗୁରୁତର ପରିଣାମର ସମ୍ମୁଖୀନ ହେବାକୁ ପଡିବ। ସେଗୁଡିକ ମଧ୍ୟ କଳା ତାଲିକାଭୁକ୍ତ ହୋଇ ୨ ବର୍ଷ ପର୍ଯ୍ୟନ୍ତ ସମସ୍ତ ଟେଲିକମ ଉତ୍ସରୁ ବିଚ୍ଛିନ୍ନ କରାଯିବ।
ନିର୍ଦ୍ଦେଶନାମା ଅନୁସାରେ ସ୍ପାମ୍ କଲ୍ ଏବଂ ବାର୍ତ୍ତା ପାଇଁ ଉତ୍ସଗୁଡିକର ଅପବ୍ୟବହାର କରୁଥିବା କମ୍ପାନୀଗୁଡିକ ବିରୋଧରେ ଟେଲିକମ୍ କମ୍ପାନୀଗୁଡିକ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି। ପ୍ରାୟ ୫୦ଟି କମ୍ପାନୀକୁ କଳା ତାଲିକାଭୁକ୍ତ କରାଯାଇଛି। ୨.୭୫ ଲକ୍ଷରୁ ଅଧିକ ଏସ୍ଆଇପି, ଡିଆଇଡି, ମୋବାଇଲ ନମ୍ବର ଏବଂ ଟେଲିକମ୍ ଉତ୍ସଗୁଡିକ ବିଚ୍ଛିନ୍ନ କରାଯାଇଛି। ସ୍ପାମ୍ କଲ୍ ହ୍ରାସକରି ଗ୍ରାହକଙ୍କୁ ଆଶ୍ୱସ୍ତି ପ୍ରଦାନରେ ଏହି ପଦକ୍ଷେପଗୁଡିକର ପ୍ରଭାବ ପଡ଼ିବ ବୋଲି ଆଶା କରାଯାଉଛି।