ଓ୍ବଶିଂଟନ, ୨।୧୧: ସାରା ବିଶ୍ୱରେ କୋଭିଡ୍-୧୯ ମହାମାରୀ ଜନିତ ମୃତ୍ୟୁସଂଖ୍ୟା ଇତିମଧ୍ୟରେ ୫୦ ଲକ୍ଷ ଅତିକ୍ରମ କରିଛି। ୨ ବର୍ଷରୁ କମ୍ ସଙ୍କଟ କାଳରେ କେବଳ ଦରିଦ୍ର ଦେଶଗୁଡ଼ିକ ଯେ ବିପର୍ଯ୍ୟସ୍ତ ହୋଇଛନ୍ତି ତାହା ନୁହେଁ, ଉନ୍ନତ ସ୍ବାସ୍ଥ୍ୟସେବା ଭିତ୍ତିଭୂମି ଥିତ୍ବା ଧନୀ ଦେଶଗୁଡ଼ିକ ମଧ୍ୟ ନୟାନ୍ତ ହୋଇପଡ଼ିଛନ୍ତି। ମୃତ୍ୟୁସଂଖ୍ୟାର ପାଖାପାଖି ୫୦ ପ୍ରତିଶତ ଆମେରିକା, ୟୁରୋପୀୟ ସଂଘ, ବ୍ରିଟେନ ଏବଂ ବ୍ରାଜିଲ ଭଳି ଉଚ୍ଚ ମଧ୍ୟବିତ୍ତ ଏବଂ ଉଚ୍ଚ ଆୟକାରୀ ଦେଶରେ ହୋଇଛି। କେବଳ ଆମେରିକାରେ ମହାମାରୀ ସର୍ବାଧିକ ୭,୬୬,୨୯୯ ଜୀବନ ନେଇଛି। ଏହା ପଛକୁ ବ୍ରାଜିଲ ଓ ତୃତୀୟ ସ୍ଥାନରେ ଭାରତ ରହିଛି। ବ୍ରାଜିଲରେ ୬,୦୭,୮୬୦ ଜଣ ଓ ଭାରତରେ ୪,୫୮,୪୭୦ ଜଣଙ୍କ ମୃତ୍ୟୁ ହୋଇଛି।
ହପ୍କିନ୍ସ ୟୁନିଭର୍ସିଟିର ଆକଳନ ଅନୁଯାୟୀ ମହାମାରୀଜନିତ ମୃତ୍ୟୁସଂଖ୍ୟା ଲସ୍ ଏଞ୍ଜେଲସ୍ ଏବଂ ସାନ୍ ଫ୍ରାନ୍ସିସ୍କୋର ମିଳିତ ଜନସଂଖ୍ୟା ସହ ସମାନ। ଅସ୍ଲୋର ଶାନ୍ତି ଗବେଷଣା ପ୍ରତିଷ୍ଠାନର ଆକଳନ ଅନୁଯାୟୀ କରୋନାରେ ଯେତିକି ଲୋକଙ୍କ ମୃତ୍ୟୁ ଘଟିଛି, ୧୯୫୦ରୁ ବିଭିନ୍ନ ଦେଶ ମଧ୍ୟରେ ହୋଇଥିବା ଯୁଦ୍ଧରେ ପ୍ରାୟ ସେତିକି ଲୋକଙ୍କ ଜୀବନ ଯାଇଛି। ବିଶ୍ୱର ଅଧିକାଂଶ ଗରିବ ଦେଶରେ ସୀମିତ କୋଭିଡ୍ ପରୀକ୍ଷା, ରୋଗୀ ହସ୍ପିଟାଲକୁ ନ ଯାଇ ଘରେ ପ୍ରାଣ ହରାଇବା କାରଣରୁ ଅନେକ ମହାମାରୀ ମୃତ୍ୟୁ ହିସାବ ମଧ୍ୟକୁ ଆସିପାରିନାହିଁ। ଭାରତରେ ମଧ୍ୟ ଏଭଳି ସ୍ଥିତି ଦେଖାଦେଇଛି।
ଏବେ ରୁଷିଆ, ୟୁକ୍ରେନ ଓ ଅନ୍ୟ ୟୁରୋପୀୟ ଦେଶରେ ସଂକ୍ରମଣ ବଢ଼ିବାରେ ଲାଗିଛି। ବିଭିନ୍ନ ଦେଶରେ ଟିକାଦାନ ହାର ଯଥେଷ୍ଟ କମ୍ ରହିଥିବାରୁ ଚିନ୍ତାର କାରଣ ପାଲଟିଛି। ୟୁକ୍ରେନରେ ମାତ୍ର ୧୭ ପ୍ରତିଶତ ଟିକା ନେଇଥିବାବେଳେ ଆର୍ମେନିଆରେ ୭ ପ୍ରତିଶତଙ୍କୁ ଟିକା ଦିଆଯାଇଛି। ଗରିବ ଦେଶରେ ଏହି ହାର ଆହୁରି କମ୍। ମହାମାରୀରେ ଧନୀ ଦେଶ ବେଶି ପ୍ରଭାବିତ ହୋଇଥିଲେ। ଆଇସିଏପି ନିର୍ଦ୍ଦେଶକ ଡ. ଓ୍ବାଫା ଏଲ୍-ସଦରଙ୍କ ମତରେ ଧନୀ ଦେଶଗୁଡ଼ିକରେ ଲୋକଙ୍କ ଆୟୁଷ ଅଧିକ ହୋଇଥିବାରୁ ସେଠାରେ ବୃଦ୍ଧ, କ୍ୟାନ୍ସର ପୀଡ଼ିତ ଏବଂ ନର୍ସିଂହୋମରେ ରହୁଥିବା ଲୋକଙ୍କ ଅନୁପାତ ଅଧିକ, ଯେଉଁମାନଙ୍କ ପାଇଁ କୋଭିଡ୍-୧୯ ଅଧିକ ବିପଦ ଥିଲା। ଅନ୍ୟପକ୍ଷରେ ଗରିବ ଦେଶରେ ପିଲା, କିଶୋର ଏବଂ ଯୁବତୀ ଯୁବକଙ୍କ ଅନୁପାତ ଅଧିକ ଯେଉଁମାନଙ୍କ ଉପରେ ମହାମାରୀ ଗୁରୁତର ପ୍ରଭାବ ପକାଇ ନ ଥିଲା।