ରାୟଗଡ଼ା ଅଫିସ, ୧୯ା୧(ସ୍ବ.ପ୍ର.): ରାୟଗଡ଼ା ସହରସ୍ଥିତ ବ୍ୟାଙ୍କ କଲୋନୀର ଜଣେ ବ୍ୟବସାୟୀଙ୍କ ଘରୁ ସୁନା ଏବଂ ରୁପା ଅଳଙ୍କାର ସହିତ ୯ ଲକ୍ଷ ଟଙ୍କାର ନଗଦ ରାଶି ଚୋରି ହୋଇଛି। ପ୍ରାୟ ୪୦ ଲକ୍ଷ ଟଙ୍କାର ସୁନା ଓ ୫ ଲକ୍ଷ ଟଙ୍କାର ରୁପା ଅଳଙ୍କାର ସହିତ ୯ ଲକ୍ଷ ଟଙ୍କା ନଗଦ ଚୋରି ହୋଇଛି। ବ୍ୟବସାୟୀ କେ. ସାଇ ଶ୍ରୀନିବାସଙ୍କ ବ୍ୟାଙ୍କ କୋଲୋନୀ ପ୍ରଥମ ଲେନ୍ରେ ଥିବା ଘରୁ ଏହି ଚୋରି ହୋଇଛି। ପୋଙ୍ଗଲ ପାଇଁ ସପରିବାର ଗାଁକୁ ଯାଇଥିବା ସମୟରେ ଚୋରି ହୋଇଥିବା ଜଣାପଡ଼ିଛି। ଅଭିଯୋଗ ମିଳିବା ପରେ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରୁଛି।
ଘଟଣାରୁ ପ୍ରକାଶ, ବ୍ୟବସାୟୀ ଶ୍ରୀନିବାସ ପୋଙ୍ଗଲ ପାଳନ ପାଇଁ ନିଜ ପରିବାର ସହିତ ୧୫ ତାରିଖ ସନ୍ଧ୍ୟାରେ ଆନ୍ଧ୍ରପ୍ରଦେଶ ରାଜ୍ୟର ପାର୍ବତୀପୁରମ ସହରକୁ ଯାଇଥିଲେ। ବୁଧବାର ନିଜ ଘରକୁ ଫେରି କବାଟ ଖୋଲିବା ପାଇଁ ଯିବା ସମୟରେ ତାଙ୍କ ମୁଖ୍ୟ ଦ୍ବାର ସମେତ ଇଣ୍ଟରଲକ୍ ତାଲା କେହି ତାଡ଼ି ଭିତରେ ପଶି ଚୋରି କରିଥିବା ଜାଣିବାକୁ ପାଇଥିଲେ। ତାଲା ତାଡ଼ି ଦୁର୍ବୃତ୍ତମାନେ ଘରେ ପଶି ଏହି ଚୋରି କରି ନେଇଛନ୍ତି। ଘର ଭିତର ଦୁଇଟି ରୁମ୍ରେ ଥିବା ଗଡରେଜ୍ ଭାଙ୍ଗି ଭିତରେ ଥିବା ସମସ୍ତ ସୁନା ଓ ରୁପା ଅଳଙ୍କାର ସମେତ ନଗଦ ଟଙ୍କା ଚୋରି କରିନେଇଛନ୍ତି। ତେବେ ସେହି ଘରେ ସିସିଟିଭି କ୍ୟାମେରା ନ ଥିବାରୁ ବର୍ତ୍ତମାନ ସମସ୍ୟା ବଢ଼ିଯାଇଛି। ବ୍ୟବସାୟୀ ଶ୍ରୀନିବାସ ରାୟଗଡ଼ା ଥାନାରେ ଲିଖିତ ଅଭିଯୋଗ କରିବା ପରେ ପୋଲିସ ପହଞ୍ଚି ତନାଘନା କରୁଛି। ସାଇଣ୍ଟିଫିକ୍ ଟିମ୍ ଓ ସନ୍ଧାନୀ କୁକୁର ସହାୟତାରେ ତଦନ୍ତ ଆରମ୍ଭ କରିଛି ପୋଲିସ। ହେଲେ ଏତେବଡ଼ ଚୋରି ଘଟଣା ଅନ୍ୟ ବ୍ୟବସାୟୀଙ୍କ ପାଇଁ ଚିନ୍ତାର କାରଣ ପାଲଟିଛି। ଲଗାତର ଭାବେ ସହର ଭିତରେ ଚୋରି ଓ ରାହାଜାନୀ ବଢୁଥିବା ବେଳେ ପୋଲିସ ନିଷ୍କ୍ରିୟ ଥିବା ଅଭିଯୋଗ ହୋଇଛି। ତେବେ ଏହି ଘଟଣା ସମ୍ପର୍କରେ ପୋଲିସର ମତାମତ ମିଳିପାରିନାହିଁ।
