ନୂଆଦିଲ୍ଲୀ,୨୨।୨: ଦେଶ ମଧ୍ୟରେ ରହିଥିବା ବିଭିନ୍ନ କ୍ୟାପ୍ଟିଭ ବ୍ଲକଗୁଡିକରୁ ୫୦% କୋଇଲା ବିକ୍ରିକୁ କେନ୍ଦ୍ର ସରକାର ଅନୁମତି ଦେଇପାରନ୍ତି। ଏ ନେଇ କେନ୍ଦ୍ର ସରକାର ଯୋଜନା କରୁଛନ୍ତି। ଘରୋଇ ବଜାରରେ କୋଇଲାର ଉପଲବ୍ଧତା ବୃଦ୍ଧି ଏବଂ ଉତ୍ପାଦନକୁ ବଢାଇବା ଲାଗି କେନ୍ଦ୍ର ଏଭଳି ଏକ ପଦକ୍ଷେପ ନେଇପାରେ ବୋଲି କୁହାଯାଉଛି। ଏ ପ୍ରସ୍ତାବ ସମ୍ପର୍କରେ କୋଇଲା ଗଚ୍ଛିତ ହୋଇ ରହିଥିବା ରାଜ୍ୟ ଏବଂ ସାଧାରଣ ଜନତାଙ୍କ ମତାମତ ଲୋଡାଯାଇଛି। ସେହିଭଳି ଖଣି ମନ୍ତ୍ରଣାଳୟ ପକ୍ଷରୁ ମଧ୍ୟ ରାଜ୍ୟଗୁଡିକର ମତାମତ ନିଆଯାଉଥିବା ଜଣାପଡିଛି। ଯୋଜନାକୁ ରୂପରେଖ ପ୍ରଦାନ କରିବା ଲାଗି ଏମ୍ଏମ୍ଡିଆର୍ ଆଇନରେ ପରିବର୍ତ୍ତନ ଆଣିବା ଲାଗି ଯୋଜନା ରଖାଯାଇଛି।
ସୂଚନାଯୋଗ୍ୟ, ବର୍ଷକୁ ବର୍ଷ ଭାରତରେ କୋଇଲା ଆମଦାନୀ ବୃଦ୍ଧି ପାଉଛି। ୨୦୧୫-୧୬ରେ ଆମଦାନୀ ୨୦୩.୯୫ ନିୟୁତ ଟନ୍ ରହିଥିବା ବେଳେ ୨୦୧୯-୨୦ରେ ଏହା ୨୪୮.୫୪ ନିୟୁତ ଟନ୍ ଛୁଇଁଛି। ଏଥି ଲାଗି ଭାରତକୁ ୧.୫୮ ଲକ୍ଷ କୋଟି ଟଙ୍କା ଖର୍ଚ୍ଚ କରିବାକୁ ପଡୁଛି। ସରକାରଙ୍କ ଆତ୍ମନିର୍ଭର ଭାରତ ଯୋଜନା ଅଧୀନରେ ଦେଶର କୋର୍ ସେକ୍ଟର ଶିଳ୍ପ ଲାଗି କୋଇଲା ଏକ ପ୍ରମୁଖ ଇନ୍ପୁଟ ଭାବେ କାର୍ଯ୍ୟ କରୁଛି। କୋଇଲା ଉତ୍ତୋଳନ ବଢିଲେ ଆମଦାନୀ କମ୍ ହେବ ବୋଲି ଆଶା କରାଯାଉଛି।