ବୌଦ୍ଧ,୯ା୬(ସ୍ବ.ପ୍ର.): ବୌଦ୍ଧ ଜିଲାରେ ପ୍ରତିବର୍ଷ ଭୂତଳ ଜଳସ୍ତର ୧ମିଟର ନିମ୍ନଗାମୀ ହେବାରେ ଲାଗିଛି। ମହାନଦୀ, ତେଲନଦୀ ଓ ଶାଖାନଦୀଗୁଡ଼ିକରେ ଜଳ ପ୍ରବାହ ପରିମାଣ କମୁଛି। ଗ୍ରୀଷ୍ମଋତୁରେ ପାନୀୟ ଜଳ ପାଇଁ ଲୋକେ ଆଉଟୁପାଉଟ ହେଉଛନ୍ତି। ନାଳ ଓ ଚୁଆର ଦୂଷିତ ପାଣି ପିଇ ଲୋକେ ରୋଗରେ ପୀଡ଼ିତ ହେଉଛନ୍ତି। କିଡ୍ନୀ ରୋଗୀଙ୍କ ସଂଖ୍ୟା ଉଦ୍ବେଗଜନକ ହୋଇଛି। ହରଭଙ୍ଗା ବ୍ଲକର ବରଝୁଲି ଓ ପାଖ ଗ୍ରାମରେ ନଳକୂପରୁ ଫ୍ଲୋରାଇଡ୍ ମିଶ୍ରତ ଜଳ ବାହାରୁଥିବା ଅଭିଯୋଗ ପରେ ଗ୍ରାମ୍ୟ ଜଳ ଯୋଗାଣ ବିଭାଗ ପକ୍ଷରୁ ପାଣି ନମୁନା ସଂଗ୍ରହ କରାଯାଇଥିଲା। ପାଣି ବ୍ୟବହାର ଉପଯୋଗୀ ନୁହେଁ ବୋଲି ପରୀକ୍ଷାରୁ ଜଣାପଡିବା ପରେ ବିଭାଗ ପକ୍ଷରୁ ନଳକୂପ ଚିହ୍ନଟ କରାଯାଇ ବ୍ୟବହାର ନ କରିବାକୁ ପରାମର୍ଶ ଦିଆଯାଇଥିଲା। କିନ୍ତୁ ଅଦ୍ୟାବଧି ଏହି ଅଞ୍ଚଳର ଲୋକଙ୍କ ପାନୀୟ ଜଳ ପାଇଁ ପ୍ରଶାସନ ବିଶେଷ ସୁବିଧା କରିପାରି ନାହିଁ। କେତେକେ ବାଧ୍ୟବାଧକତାରେ ଚିହ୍ନଟ ନଳକୂପ ପାଣି ବ୍ୟବହାର କରୁଛନ୍ତି। ସରକାରୀ ସମୀକ୍ଷା ବୈଠକରେ କିଡ୍ନୀ ରୋଗର କାରଣ ପାନୀୟଜଳ ବୋଲି ଉପସ୍ଥାପିତ ହେବା ପରେ ଭୂତଳ ଜଳର ମାନ ପରୀକ୍ଷଣ କରିବାକୁ ପ୍ରଶାସନ ସୁପାରିସ କରିଥିଲା। କେନ୍ଦ୍ରୀୟ ଜଳ ଶକ୍ତି ବିଭାଗର ୨ଜଣ ଅଧିକାରୀ ଜିଲାର ବିଭିନ୍ନ ସ୍ଥାନରେ ଜଳ ନମୁନା ସଂଗ୍ରହ କରିବା ପରେ ୫୦ ପ୍ରତିଶତ ଭୂତଳ ଜଳରେ ଫ୍ଲୋରାଇଡ୍ ମିଶ୍ରିତ ଥିବା ରିପୋର୍ଟ ପ୍ରଦାନ କରିଛି। ଏନେଇ ଗ୍ରାମ୍ୟ ପାନୀୟଜଳ ଯୋଗାଣ ବିଭାଗକୁ ସୂଚନା ଦିଆଯାଇଛି। ଜଳଶକ୍ତି ବିଭାଗର ଅଧିକାରୀ ଶିଶିର ବାସେର ଓ ତେତେନ୍ଦ୍ର ମାର୍ବାହା କଣ୍ଟାମାଳ ବ୍ଲକର ୪ ଓ ହରଭଙ୍ଗା ବ୍ଲକର ୧୨ ଗ୍ରାମରୁ ଜଳ ନମୁନା ସଂଗ୍ରହ କରଥିଲେ। ୮ ଗ୍ରାମର ନଳକୂପରୁ ଫ୍ଲୋରାଇଡ୍ ଜଳ ବାହାରୁଥିବା ସେ ସ୍ପଷ୍ଟ କରିଛନ୍ତି।
