ନୂଆଦିଲ୍ଲୀ,୧୭।୩:ଜାତୀୟ ଓ ଅନ୍ତର୍ଜାତୀୟ ସମସ୍ୟା ମଧ୍ୟରେ ଭାରତୀୟ ଶେୟାର ମାର୍କେଟର କାରବାରରେ ପରିବର୍ତ୍ତନ ଘଟିଛି। ଏପରିକି ଗୁରୁବାର ଶେୟାର ବଜାରର କାରବାରରେ ଉତ୍ସାହ ଦେଖାଦେଇଛି। ଫଳରେ ଦଲାଲ ଷ୍ଟ୍ରିଟ୍ର ନିବେଶକମାନେ ପ୍ରାୟ ୫୦,୦୦୦ କୋଟି ଟଙ୍କାର ନିବେଶ ବଢ଼ାଇ ପାରିଛନ୍ତି। ବିଶେଷକରି ବମ୍ବେ ଷ୍ଟକ୍ ଏକ୍ସଚେଞ୍ଜ (ବିଏସ୍ଇ)ରେ ସୂଚୀବଦ୍ଧ କମ୍ପାନୀଗୁଡ଼ିକର ମୋଟ ବଜାର ପୁଞ୍ଜି ବୁଧବାର ୨୫୫.୪୦ ଲକ୍ଷ କୋଟିରେ ରହିଥିଲା। ମାର୍ଚ୍ଚ ୧୬ରେ କାରବାର ବୃଦ୍ଧି ଯୋଗୁ ବଜାର ପୁଞ୍ଜିରେ ମଧ୍ୟ ବୃଦ୍ଧି ଘଟି ୨୫୬.୪୦ଲକ୍ଷ କୋଟି ଟଙ୍କା ହୋଇଛି।
ଅପରପକ୍ଷରେ ଲଗାତର ୫ଦିନ ଧରି ଶେୟାର ବଜାର କାରବାରରେ ହ୍ରାସ ଦେଖା ଦେଇଥିବା ବେଳେ ଗୁରୁବାର ବଜାର କାରବାରରେ ପରି ବର୍ତ୍ତନ ଦେଖାଦେଇଛି। ଏପରିକି ନିମ୍ନମୁଖୀ ଥିବା ଶେୟାର ବଜାର କାରବାରରେ ଦୁଇ ପ୍ରମୁଖ ସୂଚକାଙ୍କ ସବୁଜ ସଙ୍କେତରେ ବନ୍ଦ ହୋଇଥିଲା। ଫଳରେ ସେନ୍ସେକ୍ସ ୭୯ ପଏଣ୍ଟ ବଢ଼ିଥିବା ବେଳେ ନିଫ୍ଟି ପୁଣି ଥରେ ୧୭,୦୦୦ ଅଙ୍କ ପାର କରିଛି। ବିଶେଷକରି ଗୁରୁବାରର କାରବାର ସମୟରେ ଏଫ୍ଏମ୍ସିଜି, ୟୁଟିଲିଟି ପାୱାର, ଅଏଲ ଆଣ୍ଡ ଗ୍ୟାସ୍ ସହ ରିୟଲ୍ଟିର ଶେୟାରରେ ବୃଦ୍ଧି ଦେଖିବାକୁ ମିଳିଛି। ଏପରିକି ଆଇଟି, ମେଟାଲ ଏବଂ ଟେକ୍ କମ୍ପାନୀଗୁଡ଼ିକର ଶେୟାରରେ ବିକ୍ରି ମଧ୍ୟ ଜାରି ରହିଛି। ବୃହତ୍ ବଜାରରେ ମିଶ୍ରିତ ସଙ୍କେତ ଦେଖିବାକୁ ମିଳିଛି। ସେହିପରି ବିଏସ୍ଇର ମିଡ୍କ୍ୟାପ୍ରେ କୌଣସି ପରିବର୍ତ୍ତନ ଦେଖାଯାଇ ନ ଥିବା ବେଳେ ସ୍ମଲ୍କ୍ୟାପ୍ ଇଣ୍ଡେକ୍ସରେ ୦.୬୯% ର ହ୍ରାସ ଦେଖିବାକୁ ମିଳିଛି।