ଭୁବନେଶ୍ୱର,୨୯।୩(ବ୍ୟୁରୋ): ମୋ ବସ୍ରେ ମଙ୍ଗଳବାର ଜଣେ ଯାତ୍ରୀଙ୍କଠାରୁ ୫୦ ହଜାର ଟଙ୍କା ଚୋରି ହୋଇଛି। ଚୋରିର ଶିକାର ହୋଇଛନ୍ତି କଟକ ଜିଲା ବାଙ୍କୀ ଥାନା ଅନ୍ତର୍ଗତ ବଡ଼ପଦନପୁର ଗ୍ରାମର ରାଜକିଶୋର ଜେନା। ଏନେଇ ସେ ଭୁବନେଶ୍ୱରର ଚନ୍ଦ୍ରଶେଖରପୁର ଥାନାରେ ଲିଖିତ ଅଭିଯୋଗ କରିଛନ୍ତି। ପୋଲିସ ଏକ ମାମଲା ରୁଜୁ କରି ତଦନ୍ତ ଚଳାଇଛି।
ଅନୁଯାୟୀ, କିଛିଦିନ ତଳେ ରାଜକିଶୋରଙ୍କ ଝିଅ ବାହାଘର ହୋଇଥିଲା। ବାହାଘର ପରେ ଝିଅକୁ ଦିଆଯିବାକୁ ଥିବା ଶାଢ଼ି ଭୁବନେଶ୍ୱରରୁ କିଣିବାକୁ ସେ ଯୋଜନା କରିଥିଲେ। ସେ ଶାଢ଼ି କିଣିବାକୁ ତାଙ୍କ ସ୍ତ୍ରୀ ଓ ଅନ୍ୟ ସମ୍ପର୍କୀୟଙ୍କ ସହ ମଙ୍ଗଳବାର ଭୁବନେଶ୍ୱର ଆସୁଥିଲେ। ସେମାନେ ପୂର୍ବାହ୍ନରେ ବାଙ୍କୀରୁ ପଦ୍ମିନୀ ବସ୍ରେ ଆସିଥିଲେ। ପରେ କଟକ ତ୍ରିଶୁଳିଆ ଛକରୁ ଜଗତ୍ପୁରରୁ ବରମୁଣ୍ଡା ଆସୁଥିବା ୧୮ ନଂ. ମୋ ବସ୍ରେ ବସି ଭୁବନେଶ୍ୱର ଅଭିମୁଖେ ଆସିଥିଲେ। ଏହି ସମୟରେ ବସ୍ ଭିତରେ ପ୍ରବଳ ଭିଡ଼ ଥିଲା। ତେବେ ତ୍ରିଶୁଳିଆ ପରେ ପରେ ରାଜକିଶୋର ତାଙ୍କ ପକେଟ୍ରେ ରଖିଥିବା ୫୦ ହଜାର ଟଙ୍କା ଚୋରି ହୋଇଥିବା ଜାଣିବାକୁ ପାଇଥିଲେ। ଏନେଇ ସେ ବସ୍ କର୍ମଚାରୀଙ୍କୁ ଜଣାଇଥିଲେ। ବସ୍କୁ ରାସ୍ତାରେ ଅଟକାଯାଇ ସମସ୍ତ ଯାତ୍ରୀଙ୍କୁ ଯାଞ୍ଚ କରାଯାଇଥିଲା। ହେଲେ ଟଙ୍କା ମିଳି ନ ଥିଲା। ପରେ ସେ ଚନ୍ଦ୍ରଶେଖରପୁରରେ ପହଞ୍ଚି ସ୍ଥାନୀୟ ଥାନାରେ ଏତଲା ଦେଇଥିଲେ। ପୋଲିସ ସମ୍ପୃକ୍ତ ମୋ ବସ୍ରେ ଲାଗିଥିବା ସିସିଟିଭି ଯାଞ୍ଚ କରିବା ସହ କର୍ମଚାରୀଙ୍କୁ ପଚରାଉଚରା କରି ଚୋରଙ୍କୁ ଧରିବାକୁ ପ୍ରୟାସ ଜାରି ରଖିଛି। ଚୋରି ଘଟଣା ବଢ଼ୁଛି। ମୋ ବସ୍ରେ ସିସିଟିଭି ରହିଥିଲେ ମଧ୍ୟ ଭିଡ଼ର ସୁଯୋଗ ନେଇ ଦୁର୍ବୃତ୍ତମାନେ ଆଖି ପିଛୁଳାକେ ଯାତ୍ରୀଙ୍କ ଟଙ୍କା, ମୋବାଇଲ ଆଦି ନେଇ ଫେରାର ହୋଇଯାଉଛନ୍ତି। କେତୋଟି ଘଟଣାରେ ଅଭିଯୁକ୍ତଙ୍କୁ ପୋଲିସ ଧରିଥିଲେ ମଧ୍ୟ ଚୋରିକୁ ସମ୍ପୂର୍ଣ୍ଣ ରୂପେ ରୋକିପାରୁନାହିଁ।
