ମାଡ୍ରିଡ୍: ଆଦିମାନବ ଗୁମ୍ଫାରେ ରହୁଥିଲା। ଜଙ୍ଗଲରେ ଶିକାର କରି ଓ ଗଛରୁ ଫଳ ସଂଗ୍ରହ କରି ଖାଉଥିଲା। କ୍ରମବିକାଶ ଫଳରେ ଆଦିମ ମଣିଷ ଘର ତିଆରି କଲା। ଖାଦ୍ୟ ରୋଷେଇ କରିବା ଶିଖିଲା। ବର୍ତ୍ତମାନର ଆଧୁନିକ ମଣିଷ ଆଦିମାନବଙ୍କ ପରି ଗୁମ୍ଫାରେ ରହିପାରିବେ ନା ନାହିଁ ସେ ବିଷୟରେ ସ୍ପେନ୍୍ର ବୈଜ୍ଞାନିକମାନେ ଗବେଷଣା ଚଳାଇଛନ୍ତି। ଏ ନେଇ ସ୍ପେନ୍ର ଆଥ୍ଲେଟ୍ ବିଟ୍ରିଜ୍ ଫ୍ଲାମିନିଙ୍କୁ ସ୍ପେନ୍ର ଗ୍ରାନାଡାରେ ଥିବା ଏକ ଗୁମ୍ଫାରେ ୫୦୦ ଦିନ ବିତାଇବାକୁ ପଡ଼ିଛି। ୭୦ ମିଟର ଗଭୀର ଗୁମ୍ଫାରେ ବିଟ୍ରିଜ୍ ଏକୁଟିଆ ରହିବା ପରେ ଏବେ ଫେରିଛନ୍ତି। ବିଟ୍ରିଜ୍ ଜଣେ ପର୍ବତାରୋହୀ।
ଯିବା ସମୟରେ ତାଙ୍କୁ ୪୮ ବର୍ଷ ବୟସ ହୋଇଥିଲା। ଏବେ ବିଟ୍ରିଜ୍ଙ୍କ ବୟସ ୫୦ ବର୍ଷ। ବିଟ୍ରିଜ୍ ଗୁମ୍ଫାରେ ୨ ଥର ନିଜ ଜନ୍ମଦିନ ପାଳନ କରିଛନ୍ତି। ସାରା ବିଶ୍ୱ ଯେତେବେଳେ କରୋନା ଯୋଗୁ ଅସ୍ତବ୍ୟସ୍ତ ହୋଇପଡ଼ିଥିଲା ସେହି ସମୟରେ ଅର୍ଥାତ୍ ୨୦୨୧ ନଭେମ୍ବର ୨୦ରେ ବିଟ୍ରିଜ୍ ଗୁମ୍ଫା ଭିତରକୁ ଯାଇଥିଲେ। ପାଖାପାଖି ଦେଢବର୍ଷ ଧରି ବିଟ୍ରିଜ୍ କାହା ସହିତ କଥା ନ ହୋଇ ଗୁମ୍ଫାରେ ରହିଥିଲେ। ତେବେ ସେ ଦେଢ ବର୍ଷ କାଳ ଗାଧୋଇ ନ ଥିବା ଗଣମାଧ୍ୟମକୁ ପ୍ରତିକ୍ରିୟାରେ କହିଛନ୍ତି।
ଗୁମ୍ଫାରେ ରହିବା ସମୟରେ ବିଟ୍ରିଜ୍ ଏକ୍ସରସାଇଜ୍ ସାଙ୍ଗକୁ ପେଣ୍ଟିଂ, ଡ୍ରଇଂ ଏବଂ ଉଲ୍ରେ ଟୋପି ବୁଣାବୁଣି କରି ନିଜ ସମୟ କାଟୁଥିବା ତାଙ୍କ ସପୋର୍ଟ ଟିମ୍ ସୂଚନା ଦେଇଛି। ଅନ୍ୟପକ୍ଷେ ବିଟ୍ରିଜ୍ ଗୁମ୍ଫାକୁ ୬୦ଟି ପୁସ୍ତକ, ୧,୦୦୦ ଲିଟର ଜଳ ନେଇ ଯାଇଥିଲେ। ଗୁମ୍ଫାରେ ରହିବା ଯୋଗୁ ମଣିଷ ଏବଂ ଏହାର ମସ୍ତିଷ୍କ ପ୍ରାୟତଃ ଶୂନ ପଡ଼ିଯାଏ। କାରଣ ସେଠାରେ ରହିବା ଦ୍ୱାରା ଦିନ, ରାତି ଜାଣି ହୁଏ ନାହିଁ କି ସମୟ କେମିତି ବିତିଯାଏ ତାହା ଜଣା ପଡ଼ି ନ ଥାଏ। ଗୁମ୍ଫାରେ ରହିବା ସମୟରେ ବିଟ୍ରିଜ୍ଙ୍କ ପ୍ରତିଟି ଗତି ଉପରେ ମନୋବିଜ୍ଞାନୀ, ଗବେଷକ, ସେଲେଓଲୋଜିଷ୍ଟ (ଗୁମ୍ଫାରେ ରହୁଥିବା ଲୋକଙ୍କ ସମ୍ବନ୍ଧରେ କରୁଥିବା ଅଧ୍ୟୟନ), ଫିଜିଓ ଟ୍ରେନର୍ ନଜର ରଖୁଥିଲେ।