ନୟାଗଡ଼ ଅଫିସ/ଓଡ଼ଗାଁ,୧୭।୪(ସ୍ବ.ପ୍ର.)ନୟାଗଡ଼ ଜିଲା ଓଡ଼ଗାଁର ରଘୁନାଥ ମନ୍ଦିରରେ ୨ଟି ନଡ଼ିଆ ଭୋଗ କରିବା ପାଇଁ ଭକ୍ତଙ୍କୁ ୫୦୦ ଟଙ୍କା ଦକ୍ଷିଣା ବାବଦରେ ମଗାଯାଇଥିବା ଅଭିଯୋଗ ହୋଇଛି । ଭକ୍ତ ୩୦୦ ଟଙ୍କା ଯାଚିବା ଓ ୫୦୦ ଟଙ୍କା ଦେଇ ପାରିବ ନାହିଁ ବୋଲି ଅସହାୟତା ପ୍ରକାଶ କରିବା ପରେ ବି ସେବାସୀ ଭୋଗ ନ କରି ଭକ୍ତଙ୍କୁ ଫେରାଇ ଦେଇଛନ୍ତି। ଶେଷରେ ଭକ୍ତ ଠାକୁରଙ୍କୁ ନିଜର ଦୁଃଖ ଜଣାଇ ବେଢ଼ାରେ ନଡ଼ିଆ ରଖି ଫେରିଛନ୍ତି । ଏଭଳି ଘଟଣା ସୋସିଆଲ ମିଡ଼ିଆରେ ପୋଷ୍ଟ ହେବା ପରେ ଓଡ଼ଗାଁ ମନ୍ଦିରର ସେବାସୀଙ୍କ ଦୌରାତ୍ମ୍ୟକୁ ନେଇ ସମାଲୋଚନା କରାଯିବା ସହ ସାଧାରଣରେ ଅସନ୍ତୋଷ ଓ ଉଦ୍ବେଗ ପ୍ରକାଶ ପାଇଛି । ଅନ୍ୟପକ୍ଷେ ମନ୍ଦିରରେ ଭକ୍ତଙ୍କୁ ଜୋରଜବରଦସ୍ତ ଦକ୍ଷିଣା ମାଗିବା ଘଟଣାର ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସାଧାରଣରେ ଦାବି ହୋଇଛି ।
ସୋସିଆଲ ମିଡ଼ିଆରେ ପୋଷ୍ଟ ଅନୁସାରେ ବିଷ୍ଣୁ ଚରଣ ନାୟକଙ୍କ ଗାଁର ଜଣେ ବ୍ୟକ୍ତି ନିଜର ଛୋଟ ପୁଅକୁ ନେଇ ଓଡ଼ଗାଁର ରଘୁନାଥ ମହାପ୍ରଭୁଙ୍କୁ ଦର୍ଶନ କରିବାକୁ ମାନସିକ କରିଥିଲେ । ହେଲେ ଠାକୁର ଦର୍ଶନ ପାଇଁ ଅର୍ଥ ଅଭାବ ଯୋଗୁ ଯାଇ ପାରୁ ନ ଥିଲେ । ଏକଥା କହିବା ପରେ ୨ ଜଣ ସାଙ୍ଗଙ୍କ ସହ ସେହି ବାପ ପୁଅଙ୍କୁ ନେଇ ବିଷ୍ଣୁ ଚରଣ ଓଡ଼ଗାଁ ରଘୁନାଥଙ୍କୁ ୩ ଦିନ ତଳେ ଦର୍ଶନ କରିବାକୁ ଯାଇଥିଲେ । ଠାକୁର ଦର୍ଶନ ପାଇଁ ସମସ୍ତେ ମନ୍ଦିରକୁ ଗଲେ । ନିଜ ସୁବିଧା ଅନୁସାରେ ଠାକୁର ଦର୍ଶନ କଲେ । ତେବେ ବିଷ୍ଣୁ ଦର୍ଶନ କରି ଫେରିବାବେଳକୁ ମାନସିକଧାରୀ ବ୍ୟକ୍ତି ନଡ଼ିଆ ଭୋଗ ନ କରି ପାରି ନିଜର ଦୁଃଖ କହିଥିଲେ । ନଡ଼ିଆ ୨ଟା ଭୋଗ କରିବାକୁ ସେବାସୀ ୫୦୦ ଟଙ୍କା ମାଗିଥିଲେ । ଏତେ ଟଙ୍କା ଦେଇ ପାରିବେନି, କେଉଁଠୁ ଏତେ ଟଙ୍କା ଆଣିବେ ବୋଲି କହିବା ସହ ୩୦୦ ଟଙ୍କା ଦେବେ ବୋଲି କହିଥିଲେ । ହେଲେ ସେବାସୀ ୫୦୦ ଟଙ୍କାରୁ କମ ହେବନି କହି ରୋକଠୋକ୍ ଏଡାଇ ଯାଇଥିଲେ। ଏହାପରେ ମାନସିକଧାରୀ ବେଢ଼ାରେ ନଡ଼ିଆ ରଖି ଫେରିଥିଲେ । ଘଟଣା ସମ୍ପର୍କରେ ବିଷ୍ଣୁ ଓ ତାଙ୍କର ସାଙ୍ଗମାନେ ମନ୍ଦିର ସୁପରଭାଇଜରଙ୍କୁ ଅବଗତ କରିଥିଲେ ମଧ୍ୟ ସୁଫଳ ପାଇ ନ ଥିଲେ । ବିଷ୍ଣୁ କରିଥିବା ଭୋଗ ମାନସିକଧାରୀଙ୍କୁ ଦେଇ ଗାଁକୁ ଫେରିଥିଲେ। ବିଷ୍ଣୁଙ୍କ ଏଭଳି ପୋଷ୍ଟ ସୋସିଆଲ ମିଡ଼ିଆରେ ଭାଇରାଲ ହେଉଛି । ଏନେଇ ଉପଜିଲାପାଳ ଶକ୍ତିକାନ୍ତ ରାୟ କୁହନ୍ତି, ଏଭଳି ଅଭିଯୋଗ ପାଇଛି। ନୟାଗଡ଼ ବିଧାୟକ ଅଭିଯୋଗ ସମ୍ପର୍କରେ ଅବଗତ କରାଇଛନ୍ତି। ଘଟଣାର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି ।