ନୟାଗଡ଼, (ଲୋକନାଥ ମିଶ୍ର)/ଓଡ଼ଗାଁ (ଆଦର୍ଶ କୁମାର ପଟ୍ଟନାୟକ),୧୬।୬: ନୟାଗଡ ଜିଲା ଓଡ଼ଗାଁ ବ୍ଳକ ପାଣ୍ଡେରୀପଡ଼ା ପଞ୍ଚାୟତ ପାଣ୍ଡେରୀପଡ଼ା ବଡ଼ ପୋଖରୀ ଖୋଳାରେ ଅନିୟମିତତା ହୋଇଥିବାବେଳେ ପୋଖରୀ ଭିତରେ ଡୁବୁରୀ ପାହାଡକୁ କାଟି ୫୦୦ ଟ୍ରିପ କଳା ମୁଗୁନି ପଥର ଲୁଟିବା ଆରମ୍ଭ ହୋଇଛି। ଏନେଇ ସ୍ଥାନୀୟ ଲୋକ ତହସିଲରେ ଅଭିଯୋଗ କରିବା ପରେ ମଧ୍ୟ ଚଢ଼ାଉ କି ଧରପଗଡ ହେଉ ନାହିଁ । ବରଂ ପଥର ଖନନକାରୀଙ୍କୁ ଅନୁକମ୍ପା ଦେଖା ଯାଉଛି ବୋଲି ଅଭିଯୋଗ ଉଠିଛି । ଏହାର ତଦନ୍ତ ସହ କାର୍ଯ୍ୟାନୁଷ୍ଠାନ ନ ହେଲେ ଆନ୍ଦୋଳନ ହେବବୋଲି କଂଗ୍ରେସ ଧମକ ଦେଇଛି ।
ଅଭିଯୋଗ ଅନୁସାରେ ପାଣ୍ଡେରୀପଡା ବଡପୋଖରୀ ଅମୃତ ସରୋବର ଯୋଜନାରେ ସାମିଲ ହୋଇଛି । ଏଥିପାଇଁ କେଉଁ ଯୋଜନାରୁ ଅର୍ଥ ମଞ୍ଜୁର ହୋଇଛି ତେବେ ବ୍ଳକ ପ୍ରଶାସନ ସୂଚନା ଦେଉନି। ଏପରି କି କାମ ଯନ୍ତ୍ର ଦ୍ୱାରା ଆରମ୍ଭ ହୋଇଥିବାବେଳେ କାମର ସ୍ବଛତା ଓ କେଉଁ ଯୋଜନାରେ କାମ ହେଉଛି ଲୋକ ପ୍ରଶ୍ନ କରିଥିଲେ । ପୁଣି ସୂଚନା ଫଳକ କାହିଁକି ଲଗାଯାଉନି ଅଭିଯୋଗ କରିଥିଲେ । ବ୍ଳକ ପ୍ରଶାସନ ଠାରୁ ଉତ୍ତର ନ ପାଇବାରୁ ସ୍ଥାନୀୟ ଲୋକ ଜିଲାପାଳଙ୍କୁ ଫେରାଦ୍ ହୋଇଥିଲେ। ଲୋକଙ୍କର ଅଭିଯୋଗୁ ୨୫ ଦିନ ପୁରି ଯାଇଥିଲେ ମଧ୍ୟ ପ୍ରଶାସନିକସ୍ତରରେ ତଦନ୍ତ ହୋଇ ନାହିଁ । ଅନ୍ୟପକ୍ଷେ ସେ ସମୟରେ ବିଡିଓ କହିଥିଲେ ଅମୃତ ସରୋବର ପାଇଁ ଗ୍ରାଣ୍ଟ ଇନ୍ ଏଡରୁ ୧୦ ହଜାର ମଞ୍ଜୁର ହୋଇ କାମ ହୋଇଛି । ବିନା ସୂଚନା ଫଳକରେ କାମ କରିବା ଠିକ ନୁହେଁ । ଖୁବ ଶୀଘ୍ର ସୂଚନାଫଳକ ଲଗାଯିବ । ତେବେ ବିଡିଓଙ୍କ ନିର୍ଦ୍ଦେଶ ମଧ୍ୟ କାର୍ଯ୍ୟକାରୀ ହୋଇ ନାହିଁ। ଏଭଳିସ୍ଥଳେ ପୋଖରୀ ଭିତରେ ଥିବା ଡୁବୁରୀ ମୁଣ୍ଡିଆକୁ ବ୍ଲାଷ୍ଟିଂ କରି ପ୍ରାୟ ୫୦୦ ଟ୍ରିପ କଳାମୁଗୁନି ପଥର ପୋଖରୀ ଭିତରୁ ଲୁଟ୍ ହୋଇ ସାରିଲାଣି । ତେବେ ଏଥିରୁ କିଛି ଟ୍ରିପ ଗାଁ ପାଖ ସ୍କୁଲ ପାଖରେ ଗଦା ହୋଇଛି। ପ୍ରଶ୍ନ ଉଠୁଛି ପୋଖରୀ ଭିତରୁ କଳା ମୁଗୁନି ପଥର ଯଦି ବାହାରିଲା ତାକୁ ନିଲାମ କରାଗଲା ନାହିଁ କାହିଁକି । ସରକାର ରାଜସ୍ବ ପାଇବାକୁ ବ୍ୟବସ୍ଥା ନ କରି କାହିଁକି ପୋଖରୀ ଖନନ କରୁଥିବା ବ୍ୟକ୍ତିଙ୍କୁ ଅନୁକମ୍ପା ଦେଖା ଯାଉଛି। ଯେଉଁ ପଥର ସ୍କୁଲଠାରେ ରଖା ଯାଇଛି ତାକୁ ତହସିଲ ପକ୍ଷରୁ କାହିଁକି ଜବତ କରାଯାଉ ନାହିଁ । ଘଟଣା ସମ୍ପର୍କରେ ଜଣେ ଓଡ଼ଗାଁ ଲୋକ କହିଛନ୍ତି ପୋଖରୀ କାମ କେଉଁ ଯୋଜନାରେ ହେଉଛି ବ୍ଳକ ପ୍ରଶାସନ ପ୍ରକାଶ କରୁ ନାହିଁ । ପୋଖରୀ ଭିତର ପଥର ନିଲାମ ନ କରି କାହିଁକି ହରିଲୁଟ୍ କରାଯିବ ତା’ର ତଦନ୍ତ ହେଉ । ଯୁବ କଂଗ୍ରେସ ନେତା ଦିଲୀପ ବିଶୋଇ କୁହନ୍ତି, ପୋଖରୀ ଖେଳାରେ ଅନିୟମିତତା ହୋଇଥିବାବେଳେ ପୋଖରୀ ଭିତର ମୁଣ୍ଡିଆ କାଟି ୫୦୦ ଟ୍ରିପ ପଥର କାହିଁକି ଲୁଟ ହେବ। ଏନେଇ ତହସିଲଦାର ଅନିଲ ଆଚାର୍ଯ୍ୟଙ୍କୁ କହିବା ପରେ ଆରଆଇକୁ କହି ଜବତ କରାଯାଉଛି ବୋଲି କହିଥିଲେ । ହେଲେ ଜବତ କରା ନ ଯିବା ସନ୍ଦେହ ଘେରକୁ ଆସିଛି । କଂଗ୍ରେସ ପୋଖରୀ ଖନନ ଓ ପଥର ଲୁଟ୍ ଘଟଣାକୁ ଗୁରୁତର ସହ ନେଇ ଆନ୍ଦୋଳନକୁ ଓହ୍ଲାଇବାକୁ ନିଷ୍ପତ୍ତି ନେଇଛି ।