ପରଜଙ୍ଗ, ୨୨।୧୨(ଡି.ଏନ.ଏ.): କିଛିଦିନର ବ୍ୟବଧାନ ପରେ ଢେଙ୍କାନାଳ ଜିଲା ପରଜଙ୍ଗ ବ୍ଲକ ଗେଙ୍ଗୁଟିଆ ପଞ୍ଚାୟତ କୁଲେଇ ଗ୍ରାମରେ ହାତୀ ଆତଙ୍କ ଦେଖାଦେଇଛି। ତାଳଚେର ଅଞ୍ଚଳରୁ ବ୍ରାହ୍ମଣୀ ନଦୀ ପାର୍ ହୋଇ ମହାବିରୋଡ ରେଞ୍ଜ୍ରେ ପ୍ରବେଶ କରିଥିବା ୫୨ ହାତୀ ଖଳା ମୁହଁା ହୋଇଛନ୍ତି। ଜମିରେ ପ୍ରାୟ ଧାନ କଟା ସରିଯାଇଥିବାବେଳେ ଚାଷୀମାନେ ଖଳାରେ ଫସଲ ସାଇତି ରଖିଛନ୍ତି। ହାତୀପଲ ଏବେ ଖଳା ଉପରେ ନଜର ପକାଇଥିବାରୁ ଚାଷୀମାନେ ଆତଙ୍କିତ ଅବସ୍ଥାରେ ଅଛନ୍ତି।
ଉକ୍ତ ହାତୀପଲ ବ୍ରାହ୍ମଣୀ ନଦୀ ପାର୍ ହୋଇ ପରଜଙ୍ଗ ଏବଂ ତାଳଚେର ଅଞ୍ଚଳକୁ ଯିବାଆସିବା କରୁଛନ୍ତି। ଚାରିଦିନ ତଳେ ସେମାନେ ପରଜଙ୍ଗ ଅଞ୍ଚଳକୁ ଆସିଥିଲେ। ଦିନଟିଏ ରହିବା ପରେ ପୁଣି ଫେରିଯାଇଥିଲେ। ଏବେ ପୁନର୍ବାର ସେମାନେ କୁଲେଇ ଅଞ୍ଚଳରେ ପ୍ରବେଶ କରିଛନ୍ତି। ଜିଏମ୍ ଆଇରନ୍ ପ୍ଲାଣ୍ଟ ଦେଇ ହାତୀପଲ ଗ୍ରାମ ଭିତରକୁ ପଶିବାକୁ ଉଦ୍ୟମ କରୁଥିବାବେଳେ ରଙ୍ଗଥଳି ବିଟ୍ର ହାତୀ ସ୍କ୍ବାଡ୍ କର୍ମଚାରୀ ଗ୍ରାମବାସୀଙ୍କ ସହାୟତାରେ ସେମାନଙ୍କୁ କୁଆଳୋ ପଞ୍ଚାୟତ ଆଡ଼କୁ ଘଉଡ଼ାଇ ଦେଇଥିଲେ। ଉକ୍ତ ହାତୀପଲରେ ଏକାଧିକ ଦନ୍ତା ଅଛନ୍ତି। ସେମାନଙ୍କ ଗର୍ଜନରେ ଅଞ୍ଚଳ ଥରହର ହେଉଛି। ହାତୀମାନେ ରାସ୍ତା ଉପରକୁ ଚାଲି ଆସି ଛିଡ଼ା ହୋଇ ରହୁଥିବାରୁ ଯାତାୟାତ ପ୍ରଭାବିତ ହେଉଛି। ରାତିଅଧରେ ହାତୀପଲ ଖାଦ୍ୟ ଅନ୍ବେଷଣରେ ଖଳାରେ ପଶିବାର ଆଶଙ୍କା ରହିଛି। ଫଳରେ ଚାଷୀଙ୍କ ଚିନ୍ତା ବଢ଼ିଯାଇଛି। ଅନ୍ୟପଟେ ବନ କର୍ମଚାରୀମାନେ ହାତୀଙ୍କ ଉପରେ ନଜର ରଖିଛନ୍ତି। ଜିଲା ବନ ବିଭାଗ ଉକ୍ତ ହାତୀଙ୍କୁ ନଦୀ ପାର୍ କରାଇବା ଲାଗି ସାଧାରଣରେ ଦାବି ହୋଇଛି।