ଭୁବନେଶ୍ୱର,୪।୪: ବିଆଇପିଏଫ୍ ସୁକିନ୍ଦା ଆଇଟିଆଇରୁ ୫୩ ଜଣ ପିଲା କ୍ୟାମ୍ପସ ଚୟନ ହୋଇଛନ୍ତି। ୨୦୧୮-୨୦ ବ୍ୟାଚ୍ର ଛାତ୍ରୀଛାତ୍ରଙ୍କ ମଧ୍ୟରୁ ବହୁରାଷ୍ଟ୍ରୀୟ କମ୍ପାନୀ ଏଲ ଆଣ୍ଡ ଟି ପକ୍ଷରୁ ଆୟୋଜିତ କ୍ୟାମ୍ପସ ଚୟନରେ ଫିଟରରୁ ୩୨ ଜଣ ଏବଂ ଇଲେକ୍ଟ୍ରିକାଲରୁ ୨୧ ଜଣଙ୍କୁ କମ୍ପାନୀ ଚୟନ କରିଥିବା ଅନୁଷ୍ଠାନ ପକ୍ଷରୁ ସୂଚନା ଦିଆଯାଇଛି। ଚୟନ ହୋଇଥିବା ପିଲା ବର୍ତ୍ତମାନ କଟକ ନିକଟସ୍ଥ ଗୋପାଳପୁର ବାଲିକୁଦ ଅଞ୍ଚଳର ଏଲ ଆଣ୍ଡ ଟି ସିଏସ୍ଟିଆଇ ତାଲିମ କେନ୍ଦ୍ରରେ ମାସିକ ଷ୍ଟାଇପେଣ୍ଟ ଏବଂ ଅନ୍ୟାନ୍ୟ ସୁବିଧା ସହିତ ୩ମାସର ନିଯୁକ୍ତିକାଳୀନ ତାଲିମ କାର୍ଯ୍ୟ ଜାରି ରଖିଛନ୍ତି। ଏହି ତାଲିମ କାର୍ଯ୍ୟକ୍ରମ ସମାପ୍ତ ହେବା ପରେ ସେମାନଙ୍କୁ ଇଣ୍ଡଷ୍ଟ୍ରି ଷ୍ଟାଣ୍ଡାର୍ଡର ମାସିକ ପ୍ୟାକେଜ ଅନୁସାରେ କମ୍ପାନୀ ତା’ର ବିଭିନ୍ନ ପ୍ରକଳ୍ପ କାର୍ଯ୍ୟରେ ନିୟୋଜିତ କରିବ ବୋଲି ଜଣାପଡିଛି। ପୂର୍ବରୁ ଏଲ୍ ଆଣ୍ଡ ଟି ଦ୍ୱାରା ନିଯୁକ୍ତ ୨୦୧୭-୧୯ ବ୍ୟାଚ୍ର ପିଲା ବର୍ତ୍ତମାନ ୨୦ ହଜାରରୁ ଊର୍ଦ୍ଧ୍ୱ ବେତନରେ କମ୍ପାନୀ ସହ କାର୍ଯ୍ୟ କରୁଛନ୍ତି। ୨୦୧୬ରେ ଯାଜପୁର ଜିଲାର ସୁକିନ୍ଦା ଅଞ୍ଚଳରେ ପ୍ରତିଷ୍ଠିତ ବିଆଇପିଏଫ୍ ସୁକିନ୍ଦା ଆଇଟିଆଇ ହେଉଛି ଏକ ଗୁଣାତ୍ମକ ଆବାସିକା ଶିଳ୍ପକେନ୍ଦ୍ର। ଏହା ଇଣ୍ଡିଆନ ମେଟାଲ୍ସ ଆଣ୍ଡ ଫେରୋ ଆଲଏଜ ଲିମିଟେଡ ଏବଂ ଓଡ଼ିଶା ସରକାରଙ୍କ ଦ୍ୱାରା ବିକାଶର ଭାଗୀଦାରି କାର୍ଯ୍ୟକ୍ରମର ଏକ ଅଂଶ ବିଶେଷ । ଏହି ଆଇଟିଆଇ କେନ୍ଦ୍ରଟି କ୍ୱାଲିଟି କାଉନସିଲ ଅଫ୍ ନୂଆଦିଲ୍ଲୀ ସହ ଅନୁବନ୍ଧିତ ବୋଲି ଅନୁଷ୍ଠାନ ପକ୍ଷରୁ ସୂଚନା ମିଳିଛି। ଏହି ଶିଳ୍ପ ତାଲିମ କେନ୍ଦ୍ର ଜରିଆରେ ପିଲାମାନଙ୍କୁ ନିଯୁକ୍ତି ଯୋଗାଇ ଦେବା ଲକ୍ଷ୍ୟ ସହ ସେମାନଙ୍କର ଗୁଣାତ୍ମକ ଦକ୍ଷତାକୁ ଫଳପ୍ରଦ କରିବା ଉପରେ ଅନୁଷ୍ଠାନ ପ୍ରାଥମିକତା ଦେଇଆସିଛି। ଏଠାରେ ଓ୍ବେଲେଡର, ଫିଟର ଏବଂ ଇଲେକ୍ଟ୍ରିକାଲ ଟ୍ରେଡ୍ରେ ନାମ ଲେଖାଯାଉଛି। ଚଳିତ ଶିକ୍ଷା ବର୍ଷରେ ୧୧୯ ଜଣ ଛାତ୍ରୀଛାତ୍ର ନାମ ଲେଖାଇଥିବା ଜଣାପଡିଛି। ଯାଜପୁର ଜିଲାର ୨୮% ଏବଂ ରାଜ୍ୟରେ ୪୪% ତୁଳନାରେ ବିଆଇପିଏଫ୍ ସୁକିନ୍ଦା ଆଇଟିଆଇର ନାମଲେଖା ଅନୁପାତ ୫୪% ରହିଛି ବୋଲି ଜଣାପଡିଛି।