ଆସିକା,୩।୮(ଡି.ଏନ୍.ଏ)ଆସିକା ଏମ୍ପି ପ୍ରମିଳା ବିଷୋୟୀ ନିଜ ଲୋକ ସଭା ନିର୍ବାଚନ ମଣ୍ଡଳୀର କେତେକ ସମସ୍ୟା କେନ୍ଦ୍ର ମାନବ ସମ୍ବଳ ବିକାଶ ମନ୍ତ୍ରୀଙ୍କ ଦୃଷ୍ଟିକୁ ଆଣିଛନ୍ତି। ସେହିପରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହ ସୌଜନ୍ୟମୂଳକ ସାକ୍ଷାତ ବେଳେ ଆସିକା ସଂସଦୀୟ କ୍ଷେତ୍ରର ଜନସାଧାରଣଙ୍କ ଆବଶ୍ୟକତା ସମ୍ପର୍କରେ ଆଲୋଚନା କରିଥିବା ଏମ୍ପି ପ୍ରତିନିଧି ତଥା ପୂର୍ବତନ ଗଞ୍ଜାମ ଜିଲା ଅଧ୍ୟକ୍ଷ ସୁରତ ପ୍ରଧାନ ସୂଚନା ଦେଇଛନ୍ତି।
ଏମ୍ପି ବିଷୋୟୀ ଶୁକ୍ରବାର ମାନବ ସମ୍ବଳ ବିକାଶ ମନ୍ତ୍ରୀ ଡ. ରମେଶ ପୋଖରିଆଲ ନିଶାଙ୍କଙ୍କୁ ପତ୍ର ଲେଖି ସୋରଡା ଓ ପୋଲସରା ଠାରେ କେନ୍ଦ୍ରୀୟ ବିଦ୍ୟାଳୟ ଖୋଲିବା ଲାଗି ନିବେଦନ କରିଛନ୍ତି । ଆସିକାସ୍ଥିତ କେନ୍ଦ୍ରୀୟ ବିଦ୍ୟାଳୟରେ ଆବଶ୍ୟକ ମୁତାବକ ଶ୍ରେଣୀଗୃହ ନାହିଁ। ଏଥିପ୍ରତି ଦୃଷ୍ଟି ଦେବା ସହ ହିଞ୍ଜିଳିକାଟୁ କେନ୍ଦ୍ରୀୟ ମହାବିଦ୍ୟାଳୟର ନିଜସ୍ବ କୋଠା ନିର୍ମାଣ ଲାଗି ବିଭାଗୀୟ ପଦକ୍ଷେପ ନେବାକୁ ଏମ୍ପି ଦାବି କରିଛନ୍ତି । ସେହିପରି ଆସିକା ଲୋକ ସଭା ନିର୍ବାଚନ ମଣ୍ଡଳୀରେ କେବଳ ଖଲ୍ଲିକୋଟ ରେଳ ଷ୍ଟେଶନ ରହିଛି । ଜିଲାରୁ ଲୋକେ ସୁରଟ, ବମ୍ବେ ଯାଉଥିବା ବେଳେ ସେମାନଙ୍କ ସୁବିଧା ଲାଗି ଖଲ୍ଲିକୋଟ ରେଳ ଷ୍ଟେଶନକୁ ସଂପ୍ରସାରଣ ସହ ସେହି ରାସ୍ତାରେ ଯାତାୟତ କରୁଥିବା ସମସ୍ତ ରେଳ ସେଠାରେ ରହଣି ଲାଗି ବିଭାଗୀୟ ମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଛନ୍ତି । ଅନ୍ୟପକ୍ଷରେ ବ୍ରହ୍ମପୁରରୁ ଆସିକା-ଭଞ୍ଜନଗର ଦେଇ ରାଜ୍ୟର ବହୁ ଜିଲାକୁ ବସ ଯୋଗାଯୋଗ ବ୍ୟବସ୍ଥା ଅଛି। ଦିନକୁ ଦିନ ଏହି ରାସ୍ତାରେ ଯାନବାହାନ ସଂଖ୍ୟା ବଢିବାରେ ଲାଗିଛି। ଏଭଳି ସ୍ଥିତିରେ ବ୍ରହ୍ମପୁରରୁ ଆସିକା ଦେଇ ଭଞ୍ଜନଗର ପର୍ଯ୍ୟନ୍ତ ଯାଇଥିବା ରାସ୍ତାର ସଂପ୍ରସାରଣ ନିମନ୍ତେ ଏମ୍ପି ବିଶୋୟୀ ଜାତୀୟ ରାଜପଥ ବିଭାଗ ମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଥିବା ଏମପି ପ୍ରତିନିଧି ପ୍ରଧାନ ସୂଚନା ଦେଇଛନ୍ତି।