ନୂଆଗାଁ,୮।୯(ଧନେଶ୍ୱର ସାହୁ): ନୟାଗଡ଼ ଜିଲା ନୂଆଗାଁ ବ୍ଲକ ସମନ୍ବିତ ଶିଶୁ ବିକାଶ କାର୍ଯ୍ୟାଳୟ ଅଧୀନରେ ଥିବା ଅଙ୍ଗନଓ୍ବାଡି ଶିଶୁ ଓ କେନ୍ଦ୍ର ପ୍ରତି ପ୍ରଶାସନ ଅବହେଳା କରୁଥିବା ଅଭିଯୋଗ ହେଉଛି। କେଉଁଠି ଶିଶୁଙ୍କ ପାଖରେ ସରକାରଙ୍କ ଯୋଜନା ଠିକ୍ ଭାବେ ପହଞ୍ଚି ପାରୁନି ତ ଆଉ କେଉଁଠି ପ୍ରଶାସନ ଅବହେଳା ଯୋଗୁ ଶିଶୁମାନେ ସେମାନଙ୍କ ହକ୍ ପାଇବାରୁ ବଞ୍ଚିତ ହେଉଛନ୍ତି। ପୁଣି ଆଉ କେଉଁଠି ଶିଶୁମାନଙ୍କ ପାଇଁ ଆନୁସଙ୍ଗିକ ବ୍ୟବସ୍ଥା ନାହିଁ । ଶିଶୁମାନେ ଦେଶର ଭବିଷ୍ୟତ। ତେଣୁ ସେମାନଙ୍କ ମାନସିକ , ଶାରୀରିକ ଓ ବୌଦ୍ଧିକ ବିକାଶ ପାଇଁ ସରକାର ବିଭିନ୍ନ ଯୋଜନା ପ୍ରଣୟନ କରୁଛନ୍ତି। ହେଲେ ସେହି ଯୋଜନା ଶିଶୁଙ୍କ ପାଖରେ ଠିକ୍ ଭାବେ ପହଞ୍ଚି ପାରୁନାହିଁ । ନୂଆଗାଁ ବ୍ଲକ ସମନ୍ବିତ ଶିଶୁ ବିକାଶ ପ୍ରକଳ୍ପ ଅଧୀନରେ ୨୨ ପଞ୍ଚାୟତରେ ୧୬୮ ଅଙ୍ଗନଓ୍ବାଡି କେନ୍ଦ୍ର ରହିଛି । ସେଥିମଧ୍ୟରୁ ୧୧୩ କେନ୍ଦ୍ରର ନିଜସ୍ବ ଗୃହ ରହିଥିବା ବେଳେ ୫୫ କେନ୍ଦ୍ରର ଘର ନାହିଁ । ଉକ୍ତ କେନ୍ଦ୍ରଗୁଡିକ ନା ନା ଅସୁବିଧା ମଧ୍ୟରେ କେଉଁ କୋଠ ଘର ତ କାହା ବାରଣ୍ଡାରେ ଚାଲୁଛି । କୁସୁମଗାଡ଼ିଆରେ ଅଙ୍ଗନଓ୍ବାଡି ଗୃହ ନ ଥିବାରୁ ଖାତାପତ୍ର ରଖିବାରେ ଅସୁବିଧା ହେଉଛି । ଖାଲମଡ଼ାରେ ଗୋଟିଏ କେନ୍ଦ୍ରର ଗୃହ କରାଯାଇ ନ ଥିବାରୁ ୨ କେନ୍ଦ୍ର ଗୋଟିଏ ଘରେ ଚାଲିଛି । ପୁଣି କେନ୍ଦ୍ରକୁ ଯିବା ପାଇଁ ପକ୍କା ରାସ୍ତା ନ ଥିବାରୁ ଶିଶୁ ଓ କର୍ମଚାରୀମାନେ କାଦୁଅ ପଚ ପଚ ହୋଇ ଯିବା ଆସିବା କରୁଛନ୍ତି।
ଅଧିକାଂଶ କେନ୍ଦ୍ରରେ ବିଦ୍ୟୁତ୍ ସଂଯୋଗ କରାଯାଇ ନ ଥିବାରୁ ଖରା ସମୟରେ ଶିଶୁମାନେ ଘରେ ବସିବା କଷ୍ଟକର ହୋଇ ପଡୁଛି । ଅଙ୍ଗନଓ୍ବାଡି ଗୃହ ନିର୍ମାଣ ପାଇଁ ସରକାର ଅନୁଦାନ ଦେଇଥିଲେ ମଧ୍ୟ ପ୍ରଶାସନର ଅବହେଳାରୁ ଗୃହ ନିର୍ମାଣ ହୋଇ ପାରୁନି । ଅନେକ ସ୍ଥାନରେ ଠିକାଦାର ଓ ଯନ୍ତ୍ରୀ ମିଳିମିଶି ନିମ୍ନମାନର ଗୃହ ନିର୍ମାଣ କାର୍ଯ୍ୟ କରୁଥିବା ଅଭିଯୋଗ ହୋଇଛି। ଏଥିପାଇଁ ଗୃହର ସ୍ଥାୟିତ୍ୱ ପ୍ରତି ପ୍ରଶ୍ନବାଚୀ ସୃଷ୍ଟି ହୋଇଛି । ଗୃହ ନିର୍ମାଣ ପାଇଁ ବାରମ୍ବାର ଅଭିଯୋଗ ହେଉଥିଲେ ମଧ୍ୟ ସେଥିପ୍ରତି ପ୍ରଶାସନର ଉଦାସୀନତା ଦେଖିବାକୁ ମିଳୁଛି । ଶିଶୁଙ୍କ ପାଇଁ ସରକାର ଜୋତା କିଣିବା ପାଇଁ ପ୍ରତି ଶିଶୁ ପିଛା ୧୦୦ ଟଙ୍କା ଦେଇଥିଲେ ମଧ୍ୟ ଅନେକ କେନ୍ଦ୍ରରେ ଜୋତା ଦିଆ ଯାଇ ନ ଥିବା ଅଭିଯୋଗ ହେଉଛି । ଅଙ୍ଗନଓ୍ବାଡି କେନ୍ଦ୍ରର ସମସ୍ୟା ବାବଦରେ ନୂଆଗାଁ ସିଡିପିଓ ଶୁଭ୍ରକେଶୀ ମଲିକଙ୍କୁ ପଚାରିବାରେ ଗୃହ ନିର୍ମାଣ କରିବା ଦାୟିତ୍ୱ ବ୍ଲକ ପ୍ରଶାସନର । ସେମାନେ ବିଳମ୍ବ କରିବା ଯୋଗୁ ଆମେ ସମସ୍ୟା ଭୋଗୁଛୁ ବୋଲି କହିଛନ୍ତି। ନୂଆଗାଁ ବିଡିଓ ସଚ୍ଚିଦାନନ୍ଦ ମିଶ୍ରଙ୍କୁ ପଚାରିବାରେ ଶୀଘ୍ର କାମ ସାରିବା ପାଇଁ ମୁଁ ଯନ୍ତ୍ରୀମାନଙ୍କୁ ତାଗିଦ୍ କରିଛି ବୋଲି କହିଛନ୍ତି।