କେନ୍ଦୁଝର,୨ା୧(ସ୍ବ.ପ୍ର.):କେନ୍ଦୁଝର ଜିଲାରେ ଚଳିତ ବର୍ଷ ୫୫ ହଜାରରୁ ଊର୍ଦ୍ଧ୍ୱ ଜାଲ୍ ପଞ୍ଜୀକରଣ କରାଯାଇଛି। ପଞ୍ଜୀକୃତ ଜମିରେ ଧାନ ଚାଷ ହୋଇନାହିଁ। ପ୍ରଶାସନ ପକ୍ଷରୁ ସାଟେଲାଇଟ୍ ସର୍ଭେରେ ଉକ୍ତ ତଥ୍ୟ ଜଣାପଡ଼ିଛି। ମାତ୍ର କେତେଜଣ ଚାଷୀ ସେମାନଙ୍କ ପଞ୍ଜୀକରଣ କରିଥିବା ପ୍ଲଟ୍ ମୁତାବକ ଧାନ କିଣା ଯାଉ ନ ଥିବା ଅଭିଯୋଗ କରିଛନ୍ତି। ଏଭଳି ଏକ ଦୃଷ୍ଟାନ୍ତ କ୍ରମେ ସଦର ବ୍ଲକ୍ ରାଇସୁଆଁ ଗ୍ରାମର ଅନନ୍ତ ଚରଣ ରାଉତ (ପଞ୍ଜୀକରଣ ନମ୍ବର ଏଫ୍ ୧୮୧୦୦୦୦୪୭୯୬) ନାମକ ଚାଷୀ ମାତ୍ର ୧.୧୪ କୁଇଣ୍ଟାଲ ଧାନ ବିକ୍ରି ପାଇଁ ଟୋକନ ପାଇ ଚିନ୍ତାରେ ରହିଛନ୍ତି। ତାଙ୍କର ୧.୩୦ ଏକର ଜମି ରହିଥିବା ବେଳେ ଏତେ କମ୍ ପରିମାଣର ଧାନ କିଣିବା ପାଇଁ କିପରି ଟୋକନ (ନମ୍ବର ୪୪୨) ଆସିଲା ବୋଲି ସେ କହିଛନ୍ତି। ଧାନ କିଣାରେ କୌଣସି ତ୍ରୁଟି ହୋଇନାହିଁ। ସାଟେଲାଇଟ୍ ସର୍ଭେ ପରେ ଚାଷ ହୋଇ ନଥିବା ଜମିର ଟୋକନ କଟାଯାଇଛି। କୌଣସି ଅଭିଯୋଗ ଥିଲେ ସୂଚନା ଦେଖିପାରିବେ ବୋଲି ସମବାୟ ସମିତି ପକ୍ଷରୁ କୁହାଯାଇଛି।
ବିଭାଗୀୟ ସୂଚନା ମୁତାବକ, ଜିଲାରେ ଚାଷୀମାନେ ପଞ୍ଜୀକରଣ କରିବା ପରେ ଜୁଲାଇ, ସେପ୍ଟେମ୍ବର ଓ ଅକ୍ଟୋବରରେ ସାଟେଲାଇଟ ସର୍ଭେ କରାଯାଇଥିଲା। ପଞ୍ଜୀକରଣ କରିଥିବା ଚାଷୀଙ୍କ ମଧ୍ୟରୁ ୭୨ ହଜାର ପ୍ଲଟ୍ ସନ୍ଦେହପୂର୍ଣ୍ଣ ଥିଲା। ଅର୍ଥାତ୍ ଆଦୌ ଚାଷ ହୋଇ ନ ଥିବା କିମ୍ବା ପରିବା, ବାଦାମ ଆଦି ଚାଷ ଓ ଘରବାଡ଼ି ଭଳି କାମରେ ବ୍ୟବହାର ହୋଇଥିବା ଆଦି କାରଣରୁ ସର୍ଭେରେ ପ୍ଲଟ୍ଗୁଡ଼ିକ ସନ୍ଦେହ ଘେରକୁ ଆସିଥିଲା। ଏହା ସତ୍ତ୍ୱେ ଫିଲ୍ଡ ସର୍ଭେ କରାଯାଇଥିଲା। ସେଥିରୁ ୭ ହଜାର ପ୍ଲଟ୍ରେ ଧାନ ଚାଷ କରାଯାଇଥିବା ବେଳେ ୫୫ ହଜାର ପ୍ଲଟ୍ରେ ଆଦୌ ଧାନ ଚାଷ ହୋଇ ନ ଥିବା ଧରାପଡ଼ିଥିଲା। ଏଣୁ ଏସବୁ ଜାଲ୍ ପ୍ଲଟ୍ ପଞ୍ଜୀକରଣ ହୋଇଥିବା ଜଣାପଡ଼ିଥିଲା। ଏଣୁ ସହି ସବୁ କାରଣରୁ ବହୁ ଚାଷୀ ପଞ୍ଜୀକରଣ କରିଥିଲେ ହେଁ ଧାନ ବିକ୍ରିରୁ ବଞ୍ଚତ୍ତ ହେବେ ବୋଲି କୁହାଯାଉଛି। ଏହାକୁ ନେଇ ଚାଷୀମାନେ ସୋସାଇଟି ତଥା ପ୍ରଶାସନ ଉପରେ ଦୋଷାରୋପ କରୁଛନ୍ତି। ଆଗାମୀ ଦିନରେ ଏନେଇ ସ୍ପଷ୍ଟ ସୂଚନା ଦିଆ ନ ଗଲେ ଚାଷୀ ଅସନ୍ତୋଷ ଓ ଆନ୍ଦୋଳନ ବଢ଼ିବ ବୋଲି ମତପ୍ରକାଶ ପାଉଛି। ଏ ନେଇ କେନ୍ଦୁଝର ଡିଆର୍ଏସ୍ଏସ୍ (ଡେପୁଟି ରେଜିଷ୍ଟ୍ରାର କୋ ଅପରେଟିଭ ସୋସାଇଟି) ଶୁଭକାନ୍ତ ଟୁଗି କହିଛନ୍ତି, ସାଟେଲାଇଟ ଜରିଆରେ ମ୍ୟାପିଂ କରାଯାଇଛି। କୌଣସି ତ୍ରୁଟି ହୋଇନାହିଁ। ଏ ନେଇ କୌଣସି ଅଭିଯୋଗ ଥିଲେ ସେମାନେ ଆସି ସୂଚନା ଦେଖିପାରିବେ ବୋଲି କହିଛନ୍ତି।