କେନ୍ଦୁଝର,୧୮ା୧(ସ୍ବ.ପ୍ର.): ହରିଚନ୍ଦନପୁର ବ୍ଲକ ତେନ୍ତଳାପଶି ପଞ୍ଚାୟତର (୨ ଏବଂ ୩ ନମ୍ବର ଓ୍ବାର୍ଡ) ବଡ଼କମଣ୍ଡରା ଗ୍ରାମକୁ ପୁରୁଣା ତାଲିକାରେ ୯୧ଟି ଘର ମଞ୍ଜୁର ହେଇଥିବା ବେଳେ ପଞ୍ଚାୟତରେ ଲାଗିଥିବା ନୂତନ ତାଲିକାରେ ୩୩ ଟି ଘର ଅଛି। ଅବଶିଷ୍ଟ ୫୮ ଟି ଘର କଟିଯାଇଛି। ପଞ୍ଚାୟତ କାର୍ଯ୍ୟାଳୟରେ ତାଲିକା ଦେଖିଲା ପରେ ବୁଧବାର ପୂର୍ବାହ୍ନରେ ହରିଚନ୍ଦନପୁର ବ୍ଲକ ବଡ଼କମଣ୍ଡରା ଗ୍ରାମର ସମସ୍ତ ହିତାଧିକାରୀ ପ୍ରକୃତ ହିତାଧିକାରୀଙ୍କୁ ଯାଞ୍ଚ କରି ଘର ଯୋଗାଇ ଦେବାକୁ ଦାବି କରିଥିଲେ। ବିଡିଓ ବ୍ଲକରେ ଅନୁପସ୍ଥିତ ଥିବାରୁ ଏବିଡିଓଙ୍କ ନିକଟରେ ଲିଖିତ ଅଭିଯୋଗ କରିଥିଲେ। ଏବିଡିଓ କୌଣସି ସନ୍ତୋଷଜନକ ଉତ୍ତର ନ ଦେବାରୁ ଗ୍ରାମବାସୀ କେନ୍ଦୁଝର ଜିଲାପାଳଙ୍କ ନିକଟରେ ଫେରାଦ ହୋଇଛନ୍ତି। ଜିଲାପାଳଙ୍କ ଅଫିସ ପରିସରରେ ହରିଚନ୍ଦନପୁର ବିଡିଓଙ୍କ ଗାଡ଼ି ଦେଖି ଲୋକେ ଗାଡ଼ିକୁ ଜଗି ରହିଲେ। ହରିଚନ୍ଦନପୁର ବିଡିଓ ପ୍ରଭୂକଲ୍ୟାଣ ଦାସ ଆଜି ସନ୍ଧ୍ୟାରେ ଡିଆରଡିଏ ଅଫିସ ଗଳି ଦେଇ ଯିବା ବେଳେ ଜଗିରହିଥିବା ହିତାଧିକାରୀ ତାଙ୍କୁ ଘେରିଯାଇଥିଲେ। ବିଡିଓ କୌଣସି ସନ୍ତୋଷଜନକ ଉତ୍ତର ନ ଦେଇ ପାରିବାରୁ ଲୋକେ ତାଙ୍କୁ ଛାଡ଼ି ନ ଥିଲେ। ବିଡିଓ ଲୋକଙ୍କ ସହିତ ଆଲୋଚନା କରି ଗାଡ଼ି ପାଖରେ ପହଞ୍ଚିଥିଲେ। ଉଦ୍ଦେଶ୍ୟମୂଳକ ଭାବେ ଘର ତାଲିକାରୁ ନାମ କାଟି ଆମକୁ ସନ୍ଧ୍ୟା ପର୍ଯ୍ୟନ୍ତ ଭୋକ ଉପାସରେ କାହିଁକି ରଖିଲ ବୋଲି ପ୍ରଶ୍ନ କରିଥିଲେ।
ବଡକମଣ୍ଡରା ଗ୍ରାମଟି ତେନ୍ତଳାପଶି ପଞ୍ଚାୟତର ସର୍ବାଧିକ ଜନସଂଖ୍ୟା ଥିବା ଗ୍ରାମ ହେଇଥିଲା ବେଳେ ୯୯ ପ୍ରତିଶତ ଲୋକ ଚାଷ ଉପରେ ନିର୍ଭର କରି ଚଳନ୍ତି। ଆଗାମୀ ଦିନରେ ପଞ୍ଚାୟତ, ବ୍ଲକ ଘେରାଉ ସହିତ ଦରକାର ପଡ଼ିଲେ ହାଇକୋର୍ଟଙ୍କ ଦ୍ବାରସ୍ଥ ହେବାକୁ ହିତାଧିକାରୀ ନିଷ୍ପତ୍ତି ନେଇଛନ୍ତି। ଏନେଇ ବିଡିଓ କହିଛନ୍ତି, କୌଣସି ହିତାଧିକାରୀଙ୍କୁ ଛଡ଼ା ଯାଇନାହିଁ। ପର୍ଯ୍ୟାୟ କ୍ରମେ ଆସିବ। ବ୍ଲକରେ ନ ପାଇ ଲୋକମାନେ କେନ୍ଦୁଝର ପଳାଇ ଆସିଥିଲେ ବୋଲି କହିଛନ୍ତି।