କେବଳ ଅଧ୍ୟୟନ ଦ୍ୱାରା ଜ୍ଞାନ ପ୍ରାପ୍ତି ହୋଇ ନ ଥାଏ। ଅନେକ ସମୟରେ ପାଠ ନ ପଢ଼ି ମଧ୍ୟ କିଛି ଲୋକ ଏଭଳି କାର୍ଯ୍ୟ କରିଥାନ୍ତି, ଯାହା ପ୍ରଶଂସାର କାରଣ ପାଲଟେ। ଉତ୍ତରପ୍ରଦେଶର ଏଟା ଜିଲାରେ ଜଣେ ବୃଦ୍ଧା ମହିଳା ଏଭଳି କିଛି କାର୍ଯ୍ୟ କରି ଚର୍ଚ୍ଚାର ବିଷୟ ପାଲଟିଛନ୍ତି। କାରଣ ସେ ନିଜର ଉପସ୍ଥିତ ବୁଦ୍ଧିକୁ ଉପଯୋଗ କରି ଏକ ବଡ଼ ଦୁର୍ଘଟଣାକୁ ଏଡାଇ ପାରିଛନ୍ତି।
ସୂଚନାନୁଯାୟୀ, ଆଭାଭଗଡ଼ ଅଞ୍ଚଳର କୁଲବା ରେଲଓ୍ବେ ହଲ୍ଟ ଷ୍ଟେଶନ ନିକଟରେ ଥିବା ନିଜ ଜମିରେ କାମ କରିବାକୁ ଗୁଲାରିଆ ଗ୍ରାମର ୫୮ ବର୍ଷୀୟ ଓମବତୀ ଯାଇଥିଲେ। ସକାଳ ପ୍ରାୟ ୮ଟା ସମୟରେ ମହିଳାଜଣଙ୍କ କ୍ଷେତକୁ ଯାଉଥିବା ବେଳେ ସେ ରେଳଧାରଣା ଭାଙ୍ଗି ଯାଇଥିବା ଦେଖିବାକୁ ପାଇଥିଲେ। କିଛି ସମୟ ପରେ ଉକ୍ତ ବାଟ ଦେଇ ତୁଣ୍ଡଲା ଯାତ୍ରୀବାହୀ ଟ୍ରେନ୍ ଅତିକ୍ରମ କରିବା ନେଇ ସେ ଜାଣିଥିଲେ। ଏଣୁ କିଛି ଦୁର୍ଘଟଣା ଘଟିଯିବା ଆଶଙ୍କା କରିଥିଲେ ସେ। ଏଣୁ ବିଳମ୍ବ ନ କରି ତାଙ୍କ ଘରକୁ ଯାଇ ଏକ ଲାଲ୍ ରଙ୍ଗର ଶାଢ଼ୀ ଆଣି ଭାଙ୍ଗି ଯାଇଥିବା ଟ୍ରାକ୍ରେ ବାନ୍ଧି ଯାଇଥିଲେ। ଟ୍ରେନ୍ ଯେତେବେଳେ ପାଖେଇ ଆସିଥିଲା, ସେତେବେଳେ ମହିଳାଜଣଙ୍କ ଦୂରରୁ ଶାଢ଼ୀର କାନିକୁ ହଲାଇଥିଲେ। ଏହାଦେଖି ଲୋକୋ ପାଇଲଟ୍ ଜରୁରୀକାଳୀନ ବ୍ରେକ୍ ଲଗାଇ ଟ୍ରେନ୍କୁ ଅଟକାଇଥିଲେ।
ଟ୍ରେନ୍ ଅଟକାଇବା ପରେ ଡ୍ରାଇଭରଜଣଙ୍କ ମହିଳାଙ୍କ ପାଖରେ ପହଞ୍ଚି ଟ୍ରେନ୍ କାହିଁକି ଅଟକାଇଲ ବୋଲି ପଚାରିଥିଲେ। ଏହାପରେ ମହିଳାଜଣଙ୍କ ଭଙ୍ଗା ଟ୍ରାକ୍ ତାଙ୍କୁ ଦେଖାଇଥିଲେ। ଏପରିକି ଲାଲ ପତାକା ବିପଦର ସଙ୍କେତ। ଏହାକୁ ଦେଖାଇଲେ ଟ୍ରେନ୍ ଅଟକିଯାଏ ବୋଲି ସେ ଜାଣିଥିଲେ। ଏଣୁ ସେ ଏପରି କରିଥିବା ନେଇ କର୍ତ୍ତୃପକ୍ଷଙ୍କୁ ଜଣାଯାଇଥିଲା। ପ୍ରାୟ ଅଧା ଘଣ୍ଟା ପରେ ଟ୍ରାକ୍କୁ ମରାମତି କରାଯାଇଥିଲା। ଏହାପରେ ଟ୍ରେନ୍ଟି ଗନ୍ତବ୍ୟସ୍ଥଳକୁ ଯାତ୍ରା କରିଥିଲା। ଏବେ ମହିଳାଙ୍କ ଏଭଳି କାର୍ଯ୍ୟ ନେଇ ତାଙ୍କର ପ୍ରଶଂସା କରାଯାଉଛି।