ଭୁବନେଶ୍ୱର,୧୭ା୧୦ (ବ୍ୟୁରୋ): ଆସନ୍ତା ବର୍ଷ ଓଡ଼ିଶାରେ ୫ଜି ସେବା ଆରମ୍ଭ କରାଯିବ। ୨୦୨୩ ମାର୍ଚ୍ଚ ଶେଷ ସୁଦ୍ଧା ପ୍ରଥମ ପର୍ଯ୍ୟାୟରେ ୨ଶହଟି ବଡ଼ ବଡ଼ ସହରରେ ଏହି ସେବା ଉପଲବ୍ଧ ହେବ। ଏଥିମଧ୍ୟରେ ଓଡ଼ିଶାର ୮ଟି ସହରକୁ ସାମିଲ କରାଯାଇଛି। ତେବେ ବର୍ତ୍ତମାନ ଏହି ସହରଗୁଡିକର ନାମ କହିବା ଠିକ୍ ହେବ ନାହିଁ ବୋଲି ରେଳ ଓ ଆଇଟି ମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି। ରବିବାର ଭୁବନେଶ୍ୱର ରେଳଷ୍ଟେଶନଠାରେ ରେଲଓ୍ବେର ପ୍ରଥମ ଆଲୁମିନିୟମ ପଣ୍ୟବାହୀ ଟ୍ରେନ୍ ରେକ୍ର ଉଦ୍ଘାଟନ ସହ ଏକାଧିକ କାର୍ଯ୍ୟକ୍ରମରେ ଯୋଗଦେବାକୁ ଓଡ଼ିଶା ଆସିଥିବାବେଳେ ୫ଜି ସେବା ସଂକ୍ରାନ୍ତରେ କେନ୍ଦ୍ରମନ୍ତ୍ରୀ ଏହି ସୂଚନା ଦେଇଥିଲେ। ଏଥିସହ ସେ କହିଲେ, ଦ୍ୱିତୀୟ ପର୍ଯ୍ୟାୟ ଅର୍ଥାତ୍ ୨୦୨୩ ଡିସେମ୍ବର ଶେଷ ସୁଦ୍ଧା ରାଜ୍ୟର ୮୦ ପ୍ରତିଶତ ସହରରେ ୫ଜି ସେବା ଆରମ୍ଭ କରାଯିବ। ଏହାପରେ ଧୀରେଧୀରେ ରାଜ୍ୟର ଅନ୍ୟ ଛୋଟ ସହର ଏବଂ ଗ୍ରାମାଞ୍ଚଳକୁ ମଧ୍ୟ ଏହି ସେବା ବ୍ୟାପ୍ତ କରାଯିବ। ଫଳରେ ସମସ୍ତେ ୫ଜି ସେବାର ଲାଭ ଉଠାଇ ପାରିବେ। ଏହାଦ୍ୱାରା ଇଣ୍ଟରନେଟ୍ ୟୁଜର୍ସମାନେ ବହୁ କ୍ଷେତ୍ରରେ ଲାଭବାନ ହୋଇପାରିବେ। ବର୍ତ୍ତମାନ ଦେଶର କେତେକ ସହରରେ ଏହି ସେବା ଆରମ୍ଭ ହୋଇ ସାରିଥିବାବେଳେ ଆସନ୍ତାବର୍ଷ ରାଜ୍ୟବାସୀ ଏହାର ସୁବିଧା ପାଇବେ ବୋଲି ମନ୍ତ୍ରୀ କହିଥିଲେ।