ନୂଆଦିଲ୍ଲୀ,୧୪ା୨: କେନ୍ଦ୍ର ସରକାରଙ୍କ ‘ମେକ୍ ଇନ୍ ଇଣ୍ଡିଆ’ ଏବଂ ‘ସ୍କିଲ ଇଣ୍ଡିଆ’ କାର୍ଯ୍ୟକ୍ରମକୁ ସୁଦୂର ପ୍ରସାରୀ କରିବା ପାଇଁ ସରକାର ଅନେକ ପଦକ୍ଷେପ ଗ୍ରହଣ କରୁଛନ୍ତି। ସେହିଭଳି ସରକାର ଶିକ୍ଷାଠାରୁ ସ୍ବାସ୍ଥ୍ୟ ଏପରି କି ପ୍ରତି ଅଞ୍ଚଳରେ ଟେଲି ଯୋଗାଯୋଗକୁ ଗୁରୁତ୍ୱର ସହ ବିଚାର କରୁଛନ୍ତି। ଫଳରେ ବହୁ ପ୍ରତୀକ୍ଷିତ ୫ଜି ସ୍ପେକ୍ଟ୍ରମ୍ ନିଲାମକୁ ଖୁବ୍ଶୀଘ୍ର ଆରମ୍ଭ କରିବା ପାଇଁ ଯୋଜନା ପ୍ରସ୍ତୁତ କରୁଛନ୍ତି। ଚଳିତବର୍ଷ ମେ’ ମଧ୍ୟରେ ସ୍ପେକ୍ଟ୍ରମ ନିଲାମ ଅନୁଷ୍ଠିତ ହେବ। ଯଦି ଟେଲିକମ୍ ରେଗୁଲେଟୋରୀ ଅଥରିଟି ଅଫ୍ ଇଣ୍ଡିଆ (ଟ୍ରାଇ) ମାର୍ଚ୍ଚ ସୁଦ୍ଧା ବିକ୍ରୟ ପ୍ରକ୍ରିୟା ସହିତ ଆବଶ୍ୟକ ନିୟମାବଳୀ ଉପରେ ସୁପାରିସ କରିବେ ତା’ ହେଲେ ଏହାର ପ୍ରକ୍ରିୟା ଆରମ୍ଭ ହେବ ବୋଲି ଟେଲିକମ୍ ବିଭାଗର ଜଣେ ବରିଷ୍ଠ ଅଧିକାରୀ ମତବ୍ୟକ୍ତ କରିଛନ୍ତି।
ସେହିଭଳି ନିକଟରେ ଟେଲିକମ୍ ମନ୍ତ୍ରୀ ଅଶ୍ୱିନୀ ବୈଷ୍ଣବ ମଧ୍ୟ କହିଥିଲେ ଯେ, ଚଳିତବର୍ଷ ମାର୍ଚ୍ଚ ସୁଦ୍ଧା ୫ଜି ନିଲାମ ପାଇଁ ଆବଶ୍ୟକ ପଦକ୍ଷେପ ସହ ସୁପାରିସ ମଧ୍ୟ ଦାଖଲ କରାଯିବ। ସେହିପରି ଟେଲିକମ୍ ବିଭାଗ (ଡିଓଟି) ମଧ୍ୟ ଏକକାଳୀନ ଅନ୍ୟାନ୍ୟ ପ୍ରକ୍ରିୟାକୁ ନିଲାମ କରିବା ପାଇଁ ଆବଶ୍ୟକ ପଦକ୍ଷେପ ଗ୍ରହଣ କରିବ।
ଅପରପକ୍ଷରେ ଟେଲିକମ୍ ସଚିବ କେ. ରାଜାରାମନ୍ ଏକ ଜାତୀୟ ଗଣମାଧ୍ୟମକୁ ବିବୃତି ଦେଇ କହିଛନ୍ତି, ଚଳିତବର୍ଷ ମାର୍ଚ୍ଚ ଶେଷସୁଦ୍ଧା ସେମାନେ ଏହାର ସୁପାରିସ ପଠାଇବେ ବୋଲି ଟ୍ରାଇ ପକ୍ଷରୁ ସୂଚନା ମିଳିଛି। ଏହା ପୂର୍ବରୁ ସ୍ପେକ୍ଟ୍ରମ୍ ନିଲାମରେ ଟ୍ରାଇରୁ ସୁପାରିସ ପାଇବା ପରେ ନିଲାମରେ ବିଡିଂ ରାଉଣ୍ଡ ଆରମ୍ଭ କରିବାକୁ ସରକାର ୬୦ରୁ ୧୨୦ ଦିନ ସମୟ ନେଇଛନ୍ତି। ଟ୍ରାଇରୁ ସୁପାରିସ ପାଇବା ଦିନଠାରୁ ନିଲାମ ଆରମ୍ଭ କରିବାକୁ ଦୁଇ ମାସ ସମୟ ଲାଗିବ ବୋଲି ରାଜାରାମନ୍ ମତବ୍ୟକ୍ତ କରିଛନ୍ତି।
ଡିଓଟିର ସୂଚନା ଅନୁଯାୟୀ ୫ଜି ଡାଉନଲୋଡ୍ ସ୍ପିଡ୍ ୪ଜି ସେବା ଅପେକ୍ଷା ୧୦ ଗୁଣ ଅଧିକ ଦ୍ରୁତଗତିରେ ପହଞ୍ଚାଇବ ବୋଲି ଆଶା କରାଯାଉଛି। ଟ୍ରାଇ ଶିଳ୍ପ ଏବଂ ଅନ୍ୟାନ୍ୟ ହିତାଧିକାରୀଙ୍କ ସହିତ ପରାମର୍ଶ କରିଲା ପରେ ଡିଓଟିକୁ ସୁପାରିସ କରିଥାଏ। ସାମ୍ପ୍ରତିକ ଅଭ୍ୟାସ ଅନୁଯାୟୀ, ଡିଓଟିରେ ସର୍ବୋଚ୍ଚ ନିଷ୍ପତ୍ତି ଗ୍ରହଣକାରୀ ସଂସ୍ଥା, ଡିଜିଟାଲ୍ ଯୋଗାଯୋଗ ଆୟୋଗ (ପୂର୍ବରୁ ଟେଲିକମ୍ କମିଶନ) ଟ୍ରାଇ ସୁପାରିସ ଉପରେ ନିଷ୍ପତ୍ତି ନେଇଥାଏ ଏବଂ ତା’ପରେ ଚୂଡ଼ାନ୍ତ ଅନୁମୋଦନ ପାଇଁ କ୍ୟାବିନେଟ୍ ନିକଟକୁ ଯାଇଥାଏ।