ନୂଆଦିଲ୍ଲୀ,୧।୩: ଇଲେକ୍ଟ୍ରୋନିକ୍ସ ଓ ସୂଚନା ପ୍ରଯୁକ୍ତି ମନ୍ତ୍ରଣାଳୟ ପକ୍ଷରୁ ମଙ୍ଗଳବାର ବଜେଟ ପରବର୍ତ୍ତୀ ଏକ ୱେବିନାର୍ର ଆୟୋଜନ କରାଯାଇଥିଲା। ଏହି ପରିପ୍ରେକ୍ଷୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସମ୍ମାନିତ ଅତିଥି ଭାବେ ଯୋଗଦେଇ ଏହାର ଉଦ୍ଘାଟନ କରିଥିଲେ। ଏହି ଅବସରରେ ରିଲାଏନ୍ସ ଜିଓ ଇନ୍ଫୋକମ୍ର ଅଧ୍ୟକ୍ଷ ଆକାଶ ଅମ୍ବାନୀ ୱେବିନାରକୁ ସମ୍ବୋଧିତ କରି କହିଥିଲେ, ବର୍ତ୍ତମାନର ଦୂରସଞ୍ଚାର ସେବା ଓ ସୁବିଧା ଅଧିକ ଉନ୍ନତ ଓ ଅତ୍ୟାଧୁନିକ ହୋଇପାରିଛି। ଫଳରେ ଏହା ଭାରତୀୟଙ୍କ ଜୀବନ ଜିଇଁବାର ଦିଗ ବଦଳାଇଦେବା। ବିଶେଷକରି ୫ଜି ପ୍ରଯୁକ୍ତି ଜରିଆରେ ଭାରତୀୟ ଆହୁରି ଅଧିକ ବିକଶିତ ହୋଇପାରିବ। ଏପରିକି ଜିଓ ପକ୍ଷରୁ ୫ଜି ନେଟ୍ୱର୍କର ଶୁଭାରମ୍ଭ ସାରା ବିଶ୍ୱର ସବୁଠୁ ବଡ଼ ଶୁଭାରମ୍ଭ ଥିଲା ବୋଲି ଆକାଶ ଅମ୍ବାନୀ କହିଛନ୍ତି। ସେହିଭଳି ବିଗତ ୫ମାସ ମଧ୍ୟରେ ଜିଓ ପ୍ରାୟ ୪୦ହଜାର ଟାୱାର ସାଇଟ୍ସରେ ୨.୫ଲକ୍ଷ ୫ଜି ସେଲ୍ସ ଲଗାଇଛି। ରିଲାଏନ୍ସ ଜିଓର ଏହି ବଡ଼ ଭିତ୍ତିଭୂମି ଦ୍ୱାରା କମ୍ପାନୀର ଟ୍ରୁ-୫ଜି ସେବା ୨୭୭ ସହରରେ ପହଞ୍ଚତ୍ଛି ବୋଲି ଆକାଶ ସ୍ପଷ୍ଟ କରିଛନ୍ତି। ସେହିପରି ୨୦୨୩ ସୁଦ୍ଧା ରିଲାଏନ୍ସ ଜିଓର ଟ୍ରୁ-୫ଜି ସେବା ସବୁ ତାଲୁକା, ସହର ଏବଂ ଗାଁରେ ଉପଲବ୍ଧ ହେବ। ଏପରିକି ବିଭିନ୍ନ କ୍ଷେତ୍ରରେ ୫ଜି ପ୍ରଯୁକ୍ତି କିଭଳି ବ୍ୟବହାର ହୋଇପାରିବ ଏବଂ ଆମ ଜୀବନ ଉପରେ ତା’ର କ’ଣ ପ୍ରଭାବ ରହିବ ସେ ସମ୍ପର୍କରେ ମଧ୍ୟ ଆକାଶ ବିସ୍ତୃତ ଭାବେ ଆଲୋଚନା କରିଥିଲେ। ଅପରପକ୍ଷରେ ସ୍ବାସ୍ଥ୍ୟ, ଶିକ୍ଷା, କୃଷି, ଗେମିଂଠାରୁ ସ୍ମାର୍ଟ ସିଟି ପର୍ଯ୍ୟନ୍ତ ୫ଜିର ଉପଯୋଗିତା ବିଷୟରେ ଆକାଶ ବିସ୍ତୃତ ମତପ୍ରକାଶ କରିଥିଲେ। ୫ଜିର ଲାଭ ହାସଲ କରିବା ଲାଗି ଦେଶ ସମ୍ପୂର୍ଣ୍ଣ ପ୍ରସ୍ତୁତ ରହିଛି ବୋଲି ସେ ମତପ୍ରକାଶ କରିଛନ୍ତି।
