ଖୋର୍ଦ୍ଧା,ବେଗୁନିଆ୨୨।୮(ପ୍ରଭାତପାଣିଗ୍ରାହୀ, ହରପ୍ରସନ୍ନ ପଣ୍ଡା) : ୫ଟି ସଚିବ ଭି କେ ପାଣ୍ଡିଆନ ଦୁଇ ଦିନିଆ ଖୋର୍ଦ୍ଧା ଜିଲା ଗସ୍ତରେ ଆସିଛନ୍ତି। ପ୍ରଥମ ଦିନରେ ବେଗୁନିଆ ବ୍ଲକ ଅନ୍ତର୍ଗତ ବେଗୁନିଆ ମିନି ଷ୍ଟାଡିୟମରେ ଆୟୋଜିତ ସମାବେଶରେ ଲୋକମାନଙ୍କ ଅଭିଯୋଗ ଗ୍ରହଣ କରିଥିଲେ। ଲୋକଙ୍କ ଠାରୁ ୪୩୦ ଅଭିଯୋଗ ଗ୍ରହଣ କରିଥିଲେ। ଆସନ୍ତା ସପ୍ତାହ ମଧ୍ୟରେ ଏହାର ସମାଧାନ କରାଯିବ ବୋଲି ପ୍ରତିଶ୍ରୁତି ଦେଇଥିଲେ। ବେଗୁନିଆ ନିର୍ବାଚନ ମଣ୍ଡଳୀ ଅନ୍ତର୍ଗତ ଉଭୟ ବେଗୁନିଆ ଓ ବୋଲଗଡ ବ୍ଳକ ଅଞ୍ଚଳର ୧୨ଗୋଟି ମସଜିଦ, ୫ଗୋଟି ଚର୍ଚ୍ଚ, ୧୨ଗୋଟି କମ୍ୟୁନିଟ ସେଣ୍ଟର ଏବଂ ୨୫ଗୋଟି ମନ୍ଦିର ପାଇଁ ଆସନ୍ତା ୨୯ ତାରିଖ ଦିନ ପ୍ରଥମ ପର୍ଯ୍ୟାୟରେ ମାନ୍ୟବର ମୁଖ୍ୟମନ୍ତ୍ରୀ ଅନୁଦାନ ମଞ୍ଜୁର କରିବେ । ଏଥିସହ ବୋଲଗଡ ବ୍ଳକର ୧୯ ଓ ବେଗୁନିଆ ବ୍ଳକର ୨୧ ପଞ୍ଚାୟତ ମଧ୍ୟରୁ ୧୬ଟି ପଞ୍ଚାୟତର ସମସ୍ତ ଗାଁ କୁ ଆସନ୍ତା ଦୁଇ ମାସ ମଧ୍ୟରେ ମେଗା ପାନୀୟ ଜଳ ଯୋଗାଣ ନିଶ୍ଚୟ ମିଳିବ ବୋଲି ସେ ଘୋଷଣା କରିଥିଲେ। ସେହିପରି ମିଶନ ଶକ୍ତି ଜରିଆରେ ପ୍ରତ୍ୟେକ ମହିଳା ମଣ୍ଡଳ ଗ୍ରୁପ ପାଇଁ ବିନା ସୁଧରେ ମିଳିଥିବା ୪ଲକ୍ଷ ୧୦ ହଜାର ଟଙ୍କା ଋଣକୁ ବୃଦ୍ଧି କରାଯାଇ ୧୦ ଲକ୍ଷ ଟଙ୍କା ରାଜ୍ୟ ସରକାର ଯୋଗାଇ ଦେବେ ବୋଲି ସ୍ଥିର କରାଯାଇଛି। ଜିଲା ପ୍ରଶାସନ ଜରିଆରେ ମାସକ ମଧ୍ୟରେ ସମସ୍ୟାର ସମାଧାନ ହେବ।
ଏହାପରେ ଖୋର୍ଦ୍ଧା ହାବେଳି ପଡିଆରେ ଆୟୋଜିତ ସମାବେଶରେ ଭି.କେ ପାଣ୍ଡିଆନ ଯୋଗ ଦେଇଥିଲେ। ସେଠାରୁ ୪୧୦ଟି ଅଭିଯୋଗ ଗ୍ରହଣ କରିଥିଲେ। ପାଇକ ଗବେଷଣା ପ୍ରତିଷ୍ଠାନ, ଖୋର୍ଦ୍ଧାଗଡର ପୁନରୁଦ୍ଧାର କରାଯିବ। ମଠ ମନ୍ଦିର ସହ ସମସ୍ତ ଧାର୍ମିକ ଅନୁଷ୍ଠାନର ଉନ୍ନତିକରଣ କରାଯିବ। ଭିଟାମାଟି ସ୍ଥିତିବାନ ପାଇଁ ୧୦ହଜାର ଦାବିଦାର ଅଛନ୍ତି। ପ୍ରଥମ ପର୍ଯ୍ୟାୟରେ ୧୫ଶହଙ୍କୁ ଭୂମିପଟା ଦିଆଯିବ। ୨୦୦୦ ମସିହାରେ ମୁଖ୍ୟମନ୍ତ୍ରୀ ଶାସନ ଭାର ନେବା ସମୟରେ ମହିଳାଙ୍କ ବିକାଶ କଥା ଚିନ୍ତା କରିଥିଲେ। ବିକାଶରେ ମହିଳାଙ୍କ ସହଭାଗିତାକୁ ମୁଖ୍ୟମନ୍ତ୍ରୀ ଗୁରୁତ୍ୱ ଦେଉଛନ୍ତି। ମହିଳାଙ୍କ ବିକାଶରେ ଓଡିଶାର ସମୃଦ୍ଧି । ଆନ୍ତରିକତାର ସହ କାର୍ଯ୍ୟ କରିଲେ ଓଡିଶା ପ୍ରଗତି ପଥରେ ଆଗେଇ ଯିବ। ଖୋର୍ଦ୍ଧା ଜିଲା ୧୬ହଜାର ମହିଳା ଏସଏଚଜି ଗ୍ରୁପକୁ ୬୫୦କୋଟିର ଋଣ ଦିଆଯାଇଛି। ବିଜୁ ସ୍ବାସ୍ଥ୍ୟ ଯୋଜନା ଏକ ଯୁଗାନ୍ତକାରୀ ପଦକ୍ଷେପ। ଖୋର୍ଦ୍ଧା ଓ ଟାଙ୍ଗୀ ବ୍ଲକ ୧୫ଟି ଗ୍ରାମର ଏଗାରଜାତ ମାହଲ ସମସ୍ୟା ସମାଧାନ କରାଯିବ। ଖୋର୍ଦ୍ଧା ଜିଲା୍ର ୧୦୮ ଯୁକ୍ତ ଦୁଇ ଓ ଯୁକ୍ତ ତିନି କଲେଜର ଋପାନ୍ତରିତ ପାଇଁ ମୁଖ୍ୟମନ୍ତ୍ରୀ ୬୦ କୋଟି ଘୋଷଣା କରିଛନ୍ତି ।
ତେବେ ପାଣ୍ଡିଆନଙ୍କ ଗସ୍ତ ହେତୁ ପ୍ରବଳ ବର୍ଷା ସତ୍ତ୍ବେ ଶତାଧିକ ମହିଳା, ପୁରୁଷଙ୍କ ସମାଗମ ହୋଇଥିଲା। ଏଠାରୁ ସେ ଖୋର୍ଦ୍ଧା ବ୍ଲକ କାଫେରେ ପରିଦର୍ଶନ ସହ ସେଠାରେ ମିଶନଶକ୍ତି ମହିଳାଙ୍କ ସହ ଆଲୋଚନା କରଥିଲେ।