ନୂଆଦିଲ୍ଲୀ,୧୦।୧: ଦିଲ୍ଲୀ ମହିଳା ଅଞ୍ଜଳି ସିଂଙ୍କୁ କାର୍ରେ ଧକ୍କା ଦେଇ ୧୩ କିଲୋମିଟର ପର୍ଯ୍ୟନ୍ତ ଘୋଷାଡ଼ିନେବା ଘଟଣାର ୬ ଅଭିଯୁକ୍ତଙ୍କୁ ୧୪ ଦିନ ପାଇଁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ସେମାନଙ୍କୁ ଜେଲ୍ ହାଜତକୁ ଅଣାଯାଇ ଭିଡିଓ କନ୍ଫରେନ୍ସ ଜରିଆରେ ରୋହିଣୀ କୋର୍ଟରେ ହାଜର କରାଯାଇଥିଲା। ଆଶୁତୋଷ ନାମକ ଅଭିଯୁକ୍ତ ଜାମିନ ପାଇଁ ଆବେଦନ କରିଛନ୍ତି। ପୋଲିସ ଘଟଣା ପଛରେ ଥିବା ଷଡ଼ଯନ୍ତ୍ରର ତଦନ୍ତ କରୁଛି। ୨୦ ଜଣ ସାକ୍ଷୀଙ୍କ ବୟାନ ରେକର୍ଡ କରାଯାଇଥିବା ପୋଲିସ କହିଛି। ଅଧିକ ରିମାଣ୍ଡର ଆବଶ୍ୟକ ନ ଥିବା ପୋଲିସ କହିବା ପରେ ଅଭିଯୁକ୍ତମାନଙ୍କୁ ଜେଲ ହାଜତକୁ ପଠାଯାଇଥିଲା। ଅଞ୍ଜଳିଙ୍କ ସ୍କୁଟରକୁ କାର ଧକ୍କାଦେବା ପରେ ସେ ଗାଡ଼ିରେ ଲାଖି ରହିଥିବା ସମ୍ପର୍କରେ ଅଭିଯୁକ୍ତମାନେ ଜାଣିଥିଲେ ବୋଲି ପୋଲିସ ନିକଟରେ ସ୍ବୀକାର କରିଛନ୍ତି। ତେବେ ଭୟରେ ସେମାନେ କାର୍ ଅଟକାଇ ନ ଥିଲେ ବୋଲି କହିଛନ୍ତି। ଅଭିଯୁକ୍ତମାନେ ମହିଳାଙ୍କ ଚିତ୍କାର ଶୁଣିପାରି ନ ଥିଲେ ବୋଲି କହିଥିବାରୁ ସେମାନଙ୍କ ଶ୍ରବଣଶକ୍ତିର ପରୀକ୍ଷା ହେବ ବୋଲି ପୋଲିସ କହିଛି।
