ଲେହ, ୨୦।୯: ପୂର୍ବ ଲଦାଖରେ ଭାରତୀୟ ଯବାନ ଏବଂ ଚାଇନା ସୈନ୍ୟ ବାହିନୀ ମଧ୍ୟରେ ଉତ୍ତେଜନା ବଢ଼ିବାରେ ଲାଗିଛି। ଇତିମଧ୍ୟରେ ଭାରତୀୟ ଯବାନ ପୋଙ୍ଗାଙ୍ଗ୍ ହ୍ରଦ ନିକଟରେ ଥିବା ୬ଟି ଅଞ୍ଚଳ ଉପରେ ନିଜର କବ୍ଜା ସାବ୍ୟସ୍ତ କରିଛନ୍ତି। ଅଗଷ୍ଟ ୨୯ରୁ ସେପ୍ଟେମ୍ବର ଦ୍ୱିତୀୟ ସପ୍ତାହ ମଧ୍ୟରେ ଏସବୁ ଅଞ୍ଚଳ ଭାରତୀୟ ଯବାନଙ୍କ କବ୍ଜାକୁ ଆସିଛି। ସେସବୁ ମଧ୍ୟରେ ମଗର ହିଲ୍, ଗୁରୁଙ୍ଗ୍ ହିଲ୍, ରେସେହେନ୍ ଲା, ରେଜାଙ୍ଗ୍ ଲା, ମୋଖପାରି ଏବଂ ଫିଙ୍ଗର-୪ ନିକଟରେ ଥିବା ଅଞ୍ଚଳ ଆଦି ରହିଛି। ଉଚ୍ଚ ପାହାଡ଼ରେ ଥିବା ଏହି ଅଞ୍ଚଳଗୁଡ଼ିକ ଭାରତୀୟ ଯବାନଙ୍କ ଦଖଲକୁ ଆସିବା ଦ୍ୱାରା ସହଜରେ ଚାଇନା ସୈନ୍ୟଙ୍କ ଗତିବିଧି ଉପରେ ନଜର ରଖାଯାଇ ପାରିବ ବୋଲି କୁହାଯାଉଛି। ଏହାକୁ ଦୃଷ୍ଟିରେ ରଖି ଚାଇନା ଏଲ୍ଏସିରେ ଅଧିକ ଯବାନ ମୁତୟନ କରିଛି। ଏହା ସହିତ ବିଭିନ୍ନ ଯୁଦ୍ଧ ସରଞ୍ଜାମ ମଧ୍ୟ ଚାଇନା ଠୁଳ କରିବାରେ ଲାଗିଛି। ବ୍ଲାକ୍ଟପ୍ ଏବଂ ହେଳମେଟ୍ ଟପ୍ ଚାଇନା ପଟେ ରହଛି। ଅପର ପକ୍ଷରେ ଭାରତୀୟ ଯବାନଙ୍କ କବ୍ଜାରେ ଥିବା ଅଞ୍ଚଳ ଭାରତ ସୀମା ଭିତରେ ରହିଥିବା ଭାରତୀୟ ସୁରକ୍ଷା ମୁଖପାତ୍ର କହିଛନ୍ତି।
