କଟକ ଅଫିସ,୨୬।୩: ମଧୁପାଟଣା ଥାନା ପୋଲିସ ଏକ ଲୁଟେରା ଗ୍ୟାଙ୍ଗ୍ର ୬ଜଣଙ୍କୁ ଗିରଫ କରିବା ସହ ସେମାନଙ୍କଠାରୁ ୪ ବନ୍ଧୁକ, ୮ ଗୁଳି, ୬ ମୋବାଇଲ ଫୋନ୍, ୨ବାଇକ୍ ସମେତ ନଗଦ ୫୫୦୦ ଟଙ୍କା ଜବତ କରିଛି। ଗିରଫ ହୋଇଥିବା ଲୁଟେରାମାନେ ହେଲେ ମଧୁପାଟଣା ଥାନା ଅଧୀନ ତିନିଘରିଆ ଅଞ୍ଚଳର ଜ୍ଞାନ ଓରଫ୍ ଦୀପକ କୁମାର ବେଉରା, ନିଆଳି ଥାନା ଅଞ୍ଚଳର ସନ୍ତୁ ଓରଫ୍ ସନ୍ତୋଷ ପାତ୍ର, ମାର୍ଶାଘାଇ ଥାନା ଅଞ୍ଚଳର ରାଜା ଓରଫ୍ ବିବେକାନନ୍ଦ ସେନାପତି, ମଙ୍ଗଳାବାଗ ତେଲିସାହି ଅଞ୍ଚଳର କୁନା ବେହେରା ଏବଂ ଜଗତ୍ସିଂହପୁର ବାଲିକୁଦା ଥାନା ଅଞ୍ଚଳର ସୁଧୀର ସ୍ବାଇଁ। ଏମାନଙ୍କୁ ଗୁରୁବାର କୋର୍ଟ ଚାଲାଣ କରାଯାଇଛି। ଡିସିପି ପ୍ରତୀକ୍ ସିଂ ତାଙ୍କ କାର୍ଯ୍ୟାଳୟରେ ଗୁରୁବାର ଏକ ଖବରଦାତା ସମ୍ମିଳନୀରେ ଏହି ସୂଚନା ଦେଇଛନ୍ତି।
ଡିସିପି କହିଛନ୍ତି, ବୁଧବାର ରାତିରେ ଏହି ଘଟଣା ଘଟିଥିଲା। ଲୁଟ୍ର ଶିକାର ହୋଇଥିବା କୁନା ବିଶ୍ୱାଳ ମଧୁପାଟଣା ଥାନାରେ ଅଭିଯୋଗ କରିଥିଲେ ଯେ, ସନ୍ତୋଷ ନଗରଠାରେ ୬ଜଣ ଦୁର୍ବୃତ୍ତ ବନ୍ଧୁକ ମୁନରେ ତାଙ୍କଠାରୁ ନଗଦ ଟଙ୍କା ଓ ମୋବାଇଲ ଫୋନ୍ ଲୁଟ୍ କରି ଦୁଇଟି ବାଇକ୍ ଯୋଗେ ଫେରାର ହୋଇଯାଇଥିଲେ। ମଧୁପାଟଣା ଥାନା ଅଧିକାରୀ ତୁଷାରକାନ୍ତ ସେଠୀଙ୍କ ନେତୃତ୍ୱରେ ଏକ ପୋଲିସ ଟିମ୍ ତୁରନ୍ତ ଘଟଣାସ୍ଥଳରେ ପହଞ୍ଚି ତଦନ୍ତ କରିବା ସହ ୫ ଅଭିଯୁକ୍ତଙ୍କୁ ଗିରଫ କରିଥିଲେ। ତେବେ ଜଣେ ସେଠାରୁ ଫେରାର ହୋଇଯାଇଥିଲେ। ଅଭିଯୁକ୍ତମାନେ ପୂର୍ବରୁ ଡକାୟତି, ରାହାଜାନି ଓ ଲୁଟ୍ ପରି ସଙ୍ଗିନ ମାମଲାରେ ଗିରଫ ହୋଇ ଜାମିନରେ ଆସିଥିଲେ। ସେମାନେ ବାଙ୍କୀ, ସାଲେପୁର, ଖୁଣ୍ଟୁଣି, ନିଆଳି ଆଦି ଅଞ୍ଚଳରୁ ଲକ୍ଷ ଲକ୍ଷ ଟଙ୍କା ଲୁଟ୍ପାଟ୍ କରିଛନ୍ତି। ଏପରି କି ଏକବର୍ଷ ମଧ୍ୟରେ ସେମାନେ ଏକ କୋଟି ଟଙ୍କାର ଲୁଟ୍ କରିଥିବା ପୋଲିସ ପାଖରେ ସ୍ବୀକାର କରିଛନ୍ତି। ସେମାନଙ୍କଠାରୁ ଗୋଟିଏ ୯ ଏମ୍ଏମ୍ ଓ ୭.୬୫ ଏମ୍ଏମ୍ର ଦେଶୀ ପିସ୍ତଲ, ଦୁଇଟି ରିଭଲଭର, ୮ଟି ଜୀବନ୍ତ ଗୁଳି, ୬ଟି ମୋବାଇଲ୍ ଫୋନ୍, ଗୋଟିଏ ହରନେଟ୍ ମୋଟର ସାଇକେଲ(ଓଡି ୦୫ ୟୁ ୦୭୫୮), ଗୋଟିଏ ଆପାଚି ବାଇକ୍ (ଓଡି ୦୬ ଏନ୍ ୫୬୪୬) ସମେତ ୫,୫୦୦ ଟଙ୍କା ନଗଦ ଟଙ୍କା ଜବତ ହୋଇଛି। ଅଭିଯୁକ୍ତ ଜ୍ଞାନଙ୍କ ନାମରେ ମଧୁପାଟଣା ଥାନାରେ ୧୯ଟି, ସନ୍ତୁ ନାମରେ ନିଆଳି, ଓଳଟପୁର, ଜଗତ୍ସିଂହପୁର ଥାନାରେ ୧୨ଟି, ସୁଧିର ନାମରେ ମଧୁପାଟଣା, କ୍ୟାଣ୍ଟନମେଣ୍ଟ, ଚାଉଳିଆଗଞ୍ଜ, ମଙ୍ଗଳାବାଗ, ଚୌଦ୍ୱାର, ବାଲିକୁଦା ଥାନାରେ ୧୦ଟି ଏବଂ ରାଜା ନାମରେ ସଦର ଥାନାରେ ଗୋଟିଏ ସଙ୍ଗିନ ମାମଲା ଥିବା ଡିସିପି ସିଂ ସୂଚନା ଦେଇଛନ୍ତି।
