ନୂଆଦିଲ୍ଲୀ, ୧୨।୩ : ଇପିଏଫ୍ ଆକାଉଣ୍ଟ ଧାରକମାନଙ୍କୁ ଏକ ବଡ଼ ଝଟ୍କା ଲାଗିଛି। ଇପିଏଫ୍ ପାଇଁ ଜମା ହେଉଥିବା ଟଙ୍କା ଉପରେ ମିଳୁଥିବା ସୁଧ ହାର ହ୍ରାସ ପାଇଛି। ୨୦୨୧-୨୨ ଆର୍ଥିକ ବର୍ଷ ପାଇଁ, ଇପିଏଫ୍ଓରେ ଜମା ହୋଇଥିବା ପାଣ୍ଠି ଉପରେ ପ୍ରାପ୍ତ ସୁଧ ଗତ ୪୦ ବର୍ଷ ମଧ୍ୟରେ ସର୍ବନିମ୍ନ ହୋଇଛି। ଇପିଏଫ୍ଓର ବୈଠକରେ ସୁଧ ହାର ହ୍ରାସ କରିବାକୁ ନିଷ୍ପତ୍ତି ନିଆଯାଇଛି। ପୂର୍ବରୁ ଏହା ୮.୫ ପ୍ରତିଶତ ଥିଲା।
ଏବେ ଏହା ୮.୧ ପ୍ରତିଶତକୁ ହ୍ରାସ ପାଇଛି। ଗତ ୨୦୨୦-୨୧ ଆର୍ଥିକ ବର୍ଷରେ ସୁଧ ହାର ୮.୫ ପ୍ରତିଶତରେ ସ୍ଥିର ରହିଥିଲା। କିନ୍ତୁ ଶନିବାର ଦିନ ଏହାକୁ ସଂଶୋଧନ କରାଯାଇ ୮.୧ ପ୍ରତିଶତ କରାଯାଇଛି।
ଏହା ଦ୍ୱାରା ଦେଶର ପ୍ରାୟ ୬ କୋଟି କର୍ମଚାରୀଙ୍କୁ ବଡ଼ ଝଟ୍କା ଲାଗିଛି। କର୍ମଚାରୀଙ୍କ ପ୍ରୋଭିଡେଣ୍ଟ ଫଣ୍ଡ ଏବଂ ବିବିଧ ପ୍ରୋଭିଜନ୍ସ ଆକ୍ଟ, ୧୯୫୨ ଅନୁଯାୟୀ ପ୍ରୋଭିଡେଣ୍ଟ ପାଣ୍ଠି ସଞ୍ଚୟ ବାଧ୍ୟତାମୂଳକ। ଶ୍ରମ ମନ୍ତ୍ରଣାଳୟ ସୂତ୍ରରୁ ପ୍ରକାଶ ଯେ ୧୯୭୭-୭୮ପରଠାରୁ ଏହା ସର୍ବନିମ୍ନ ହାର ଥିଲା ଯେତେବେଳେ ଏହା ୮ ପ୍ରତିଶତ ଥିଲା।
କର୍ମଚାରୀଙ୍କ ପ୍ରୋଭିଡେଣ୍ଟ ଫଣ୍ଡ ଅର୍ଗାନାଇଜେସନ (ଇପିଏଫ୍ଓ) ର ପ୍ରାୟ ଛଅ କୋଟି ଗ୍ରାହକ ଅଛନ୍ତି। ଗୁଆହାଟୀରେ ଅନୁଷ୍ଠିତ ଇପିଏଫଓର କେନ୍ଦ୍ରୀୟ ଟ୍ରଷ୍ଟି ବୋର୍ଡର ବୈଠକରେ ଏହି ନିଷ୍ପତ୍ତି ନିଆଯାଇଛି। ବୋର୍ଡର ସୁପାରିଶ ଖୁବ ଶୀଘ୍ର ଅର୍ଥ ମନ୍ତ୍ରଣାଳୟକୁ ପଠାଯିବ।
